ಇಗರ್ಜೆಂತ್ ಆಯ್ತಾರಾಚಿ ದೊತೊರ್ನ್ ಚಲೊನ್ ಆಸ್ಲಿಂ.ತಿಸ್ರ್ಯಾ ಕ್ಲಾಸಿಕ್ ದೊತೊರ್ನೆಚಿ ಟೀಚರ್ ತೊಂಡ್ಪಾಶಿ ಮಾಗ್ಣಿಂ ವಿಚಾರ್ನ್ ಆಸ್ಲಿಂ,ಸರ್ವ್ ಶಿಕೊನ್ ಆಯ್ಲ್ಯಾನ್ ಪಟಾ...ಪಟಾ ಕರ್ನ್ ಚಾಲ್ತಿಂ ಮಾಗ್ಣಿಂ ಮ್ಹಣೊನ್ ಬಸ್ಲಿಂ.ಎಕಾ ಭುರ್ಗ್ಯಾಕ್ ಮಾತ್ರ್ ಕಿತೆಯ್ ಪ್ರೇತನ್ ಕೆಲ್ಯಾರಿಯ್ ತೊಂಡ್ಪಾಶಿ ಮಾಗ್ಣೆಂ ಮ್ಹಣೊಂಕ್ ಜಾಲೆಂ ನಾ.ಟೀಚೆರಿಕ್ ರಾಗ್ ಆಯಿಲೊ."ಸರ್ವ್ ಭುರ್ಗಿಂ ಶಿಕೊನ್ ಆಯ್ಲ್ಯಾಂತ್,ತುಕಾ ಕಿತೆಂ ಶಿಕೊನ್ ಯೆಂವ್ಕ್ ಚರಬ್?ಘರಾಂತ್ ಮಾಗ್ಣೆಂ ಕರಿನಾಂತ್?" ಮ್ಹಣೊನ್ ಜೋರಾನ್ ಯೆಟ್ಲೆಂ ತ್ಯಾ ಭುರ್ಗ್ಯಾಕ್ ಟಿಚೆರಿನ್.ಭುರ್ಗ್ಯಾಕ್ ಲಜ್ ದಿಸ್ಲಿಂ.ದುಕಾಂ ಘಳ್ಳಿಂ.
***
ದೊತೊರ್ನ್ ಸೊಂಪ್ಲಿ.ಭುರ್ಗಿಂ ದೊತೊರ್ನಿಚ್ಯಾ ಕ್ಲಾಸಿ ಥಾವ್ನ್ ಇಗರ್ಜೆಕ್ ಮಿಸಾಕ್ ಸುಟ್ಲಿ.ವಾಟೆರ್ ಎಕಾ ಬಾಂಕಾರ್ ಪ್ರಾಯೆಚಿ ವ್ಹಡ್ಲಿಮಾಂಯ್ ಥಕೊನ್ ಬಸೊನ್ ಆಸ್ಲಿಂ.ವಾಟೆರ್ ಭುರ್ಗಿಂ ಯೆಂವ್ಚೆ ಪಳೆವ್ನ್ ಎಕಾ ಚೆರ್ಕ್ಯಾಲಾಗಿ ತಿ ವಿಚಾರಿ;
"ಪುತಾ.ಮ್ಹಾಕಾ ಇಲ್ಲೇಶೆ ಪುರೊ ಜಾಲಾ ಪುತಾ,ಮ್ಹಾಕಾ ಪಿಯೊಂಕ್ ಉದಾಕ್ ಹಾಡ್ನ್ ದಿಶಿಗಿ?"
"ಉದಾಕ್?... ವ್ಹಡ್ಲಿಮಾಂಯ್, ಉದಾಕ್ ಹಾಂಗಾ ಖಂಯ್ ದಿಸಾನಾ ನೆಂ? ಸೊಧುನ್ ಹಾಡ್ತಾನಾ ಮಿಸಾಕ್ ವೇಳ್ ಜಾಯ್ತ್.ವಿಸಾಕ್ ರಿಗ್ತಾನಾ ವೇಳ್ ಜಾಲ್ಯಾರ್ ಪಾದ್ರ್ಯಾಬ್ ಗಾಳಿಂ ಗಾಲ್ತಾ.ತುಂ ಇಲ್ಲೇಶೆ ಹಾಂಗಾಚ್ ಬಚ್" ಮ್ಹಣುನ್ ಚೆರ್ಕೊ ಧಾಂವ್ಲೊಚ್
ಉಪ್ರಾಂತ್ ಆನ್ಯೇಕ್ಲೆ ಥಂಯ್ ಥಾವ್ನ್ ಪಾಶಾರ್ ಜಾಲೆಂ.ವ್ಹಡ್ಲಿಮಾಂಯ್ನ್ ತಾಚ್ಯಾಲಾಗಿಯ್ ಉದಾಕ್ ವಿಚಾರ್ಲೆ.ತಾಚೆಥಾವ್ನಿಯ್ ವ್ಹಡ್ಲಿಮಾಂಯ್ಕ್ ತಿಚ್ ಜಾಪ್.
ಥೊಡ್ಯಾ ಖಿಣಾನ್ ದೊತೊರ್ನಿಚ್ಯಾ ಕ್ಲಾಸಿಂತ್ ತೊಂಡ್ಪಾಶಿ ಮಾಗ್ಣೆಂ ಸಾಂಗಿನಾಸ್ತಾನಾ ಟೀಚೆರಿ ಥಾವ್ನ್ ಗಾಳಿಂ ಖೆಲ್ಲೆಂ ಭುರ್ಗೆಂ ಥಂಯ್ ಥಾವ್ನ್ ಪಾಶಾರ್ ಜಾತೆಲೆಂ.ವ್ಹಡ್ಲಿಮಾಂಯ್ನ್ ತಾಚ್ಯಾಲಾಗಿಯ್ ಉದಾಕ್ ವಿಚಾರ್ಲೆ.
""ಪುತಾ.ಮ್ಹಾಕಾ ಪುರೊ ಜಾಲಾ ಪುತಾ,ಇಲ್ಲೇಶೆ ಪಿಯೊಂಕ್ ಉದಾಕ್ ಹಾಡ್ನ್ ದಿಶಿಗಿ?"
ತೆಂ ಭುರ್ಗೆಂ ಜಾಪ್ ದೀವ್ನ್ ಮ್ಹಣಾಲೆಂ; "ವ್ಹಡ್ಲಿಮಾಂಯ್ ಉದಾಕ್ ಹಾಂಗಾ ಖಂಯ್ ದಿಸಾನಾ.ತುಂ ತಿಕ್ಕೇಶೆ ಹಾಂಗಾಚ್ ಬಸ್ಲಿಯ್ ತರ್ ಹಾಂವ್ ಉದಾಕ್ ಸೊಧುನ್ ಹಾಡ್ನ್ ದಿತಾ.ತುಂ ಹಾಂಗಾಚ್ ಬಚ್" ಮ್ಹಣೊನ್ ವಿಗಾರಾಚ್ಯಾ ಘರಾ ತೆವ್ಶಿನ್ ತೆಂ ಭುರ್ಗೆ ಧಾಂವ್ಲೆ..
ಹೆಂ ಸಕ್ಕಡ್ ದೊತೊರ್ನಿಚಿ ಟೀಚರ್ ಪಳೆವ್ನ್ ಆಸ್ಲಿಂ ಆನಿ ಚಿಂತುಕ್ ಲಾಗ್ಲಿ;"ಕೊಣೆಂ ಸಾರ್ಕಿ ದೊತೊರ್ನ್ ಸಾಂಗ್ಲಿಂ? ತೊಂಡ್ಪಾಶಿ ಮಾಗ್ಣೆಂ ಸಾಂಗ್ಲ್ಯಾನಿಂ ವಾ ವ್ಹಡ್ಲಿಮಾಂಯ್ಕ್ ಉದಾಕ್ ದಿಂವ್ಕ್ ದಾಂವ್ಲ್ಯಾನ್ ?" ಆಟವ್ ಕರುಂಕ್ ಲಾಗ್ಲಿಂ ಟೀಚೆರ್.ಜಾಪ್ ಜಾವ್ನ್ ತಿಕಾ ’ಬರ್ಯಾ ಸಾಮಾರ್ಯಾಗಾರಾಚಿ ವೊಪಾರ್’ ಉಡಾಸಾಕ್ ಆಯ್ಲಿ.
