ಗೊಟೊ ಆನಿಂ ನೆಕೆತ್ರ್

ಸಾಂತಾಕ್ಲೊಸ್ ತಾತಿ...

ವರ್ಸಾಚ್ಯಾ ಆಕ್ರೆಚೊ ಮಹಿನೊ ಜಾಲ್ಯಾರಿ,ದಸಂಬರ್ ಮಹಿನ್ಯಾಕ್ ಮೆಳ್‌ಲ್ಲೊ ಮಾನ್ ಮಾತ್ರ್ ವಿಶೇಷ್.ಆಮ್ಚೊ ಸೊಡ್ವಣ್ದಾರ್ ಜೆಜುಕ್ರಿಸ್ತ್ ಜಲ್ಮಲ್ಲೊ ಮಹಿನೊ ಮ್ಹಣ್ ಆಮಿ ಸರ್ವ್ ಭರ್ವಸ್ತಾಂವ್ ಜಾಲ್ಲ್ಯಾನ್, ಹ್ಯಾ ಮಹಿನ್ಯಾಕ್ ಮೆಳ್‌ಲ್ಲೊ ಮಾನ್ ಗರ್ಜೆ ಭಾಯ್ಲೊ ನ್ಹಯ್ ಮ್ಹಣ್ಯೆತಾ.ಮಹಿನ್ಯಾಚ್ಯಾ ಸುರ್ವೆರ್ ಥಾವ್ನ್ ಆರಂಭ್ ಜಾಲ್ಲೊ ಹ್ಯಾ ಮಹಿನ್ಯಾಚೊ ದಬಾಜೊ ಕ್ರಿಸ್ಮಸ್ ಉತ್ರೊನ್ ನವ್ಯಾ ವರ್ಸಾಚ್ಯಾ ಸಾಂಜ್ ಪರ್ಯಾಂತ್ ಲಾಂಭೊನ್ ವೆತಾ.ಹಾಚೆಂ ಸಾಂಗಾತಾ ಕ್ರಿಸ್ಮಸ್ ಉತ್ರಾಲ್ಲ್ಯಾ ಉಪ್ರಾಂತ್ ಕಾಜಾರಾಚೆಂ ಸಿಸನಿಯ್ ಆರಂಭ್ ಜಾತಾ. ತ್ಯಾ ದೆಕುನ್‌ಚ್ಚ್ ಆಮ್ಚ್ಯಾ ಮಧೆಂ ಸಭಾರಾಂಕ್ ದಸಂಬರ್ ಮಹಿನೊ ಮ್ಹಳ್ಯಾರ್ ಖುಶಿಚ್ಚ್ ಖುಶಿ. ದೋನ್ ವರ್ಸಾ ಪುಡೆಂ ಕ್ರಿಸ್ಮಸಾಚ್ಯಾ ಪಯ್ಲೆ ಸಂಸಾರ್ ಅಕೇರ್ ಜಾತಾ ಮ್ಹಳ್ಳಿ ವಾರ್ಯಾರ್ ಖಬರ್ ಆಸ್ಲಿ ತರೀ, ಆದ್ಲ್ಯಾ ವರ್ಸಾಚ್ ತಿ ಖಬರ್ ವಾರ್ಯಾರ್ ಉಬೊನ್ ಗೆಲ್ಯಾ ಜಾಲ್ಲ್ಯಾನ್, ಹ್ಯಾ ಪಾವ್ಟಿ ಖಂಚಾಯ್ ಆಡ್ಕಳೆಂ ವಿಣೆಂ ಸಂಭ್ರಮಾಚಿ ತಯಾರಾಯ್ ಜೊರಾನ್ ಮುಕಾರ್ಸುನ್ ಆಸಾ.

ವಾಡೊನ್ ಯೆಂವ್ಚ್ಯಾ ಸಂಸಾರಾಂತ್ ಆಧುನೀಕರಣಾ ನಿಮ್ತಿ ಕ್ರಿಸ್ಮಸ್ ಆಚರಣಾಂತ್ ತಾಂತ್ರಿಕತೆಚೊ ವಾಪಾರ್,ದುಡ್ವಾಚಿ ಗದ್ದಾಳಾಯ್ ಆನಿ ಹೆರ್ ಸವ್ಲತೆಚೊ ಉಪ್ಯೋಗ್ ಬರ್ಪೂರ್ ರೀತಿನ್ ಆಸ್ಲ್ಯಾರಿ ಪುರ್ವಿಲ್ಯಾ ವೆಳಾಕ್ ಸರಿಂ ಕೆಲ್ಯಾರ್,ಆರ್ವಿಲ್ಯಾ ಕಾಳಾಚೆ ಕ್ರಿಸ್ಮಸ್ ಆಚರಣ್ ಇಲ್ಲೆಶೆಂ ಚಪ್ಪೆಂಚ್ಚ್ ಮ್ಹಣ್ಯೆತ್. ಪುಟೊನ್ ಲ್ಹಾನ್ ಜಾಲ್ಲೆಂ ಕುಟಾಮ್,ಕುಟ್ಮಾಂತ್ ಉಣೊ ಜಾಲ್ಲೊ ಸಾಂದ್ಯಾಚೊ ಸಂಖೊ,ಮಾರ್ಕೆಟಿಂತ್ ಮೆಳ್ಚೊ ರೆಡಿಮೇಡ್ ಕುಸ್ವಾರ್,ಗೊಟೊ ಆನಿ ಶೃಂಗಾರ್,ಹ್ಯಾ ವರ್ವಿ ಮನ್ಶ್ಯಾಂ ಥಂಯ್ ಚಡೊನ್ ಆಯ್ಲೆಲಿ ಆಳ್ಸಾಯ್ ಹೆಂ ಸಕ್ಕಡ್ ಪಳೆಯ್ತಾನಾ  ಖಂಯ್ಸರ್‌ಗಿ ಆಮಿ ನಾಟಕೀಯ್ ಸಂಭ್ರಮ್ ಯಾ ದಬಾಜೊ ಚಲೊವ್ನ್ ಆಸಾಂವ್‌ಗೀ ಮ್ಹಳ್ಳೆಂ ಸವಾಲ್ ಮ್ಹಾಕಾ ಉದೆತಾ.

ತವಳ್ ಇಸ್ಕೊಲಾಚ್ಯಾ ಸಮಾಜ ಪಾಠಾಂತ್ ಆಮಿ ಶಿಕ್ಚೆಂ ಆವಿಭಕ್ತ ಕುಟ್ಮಾಚೆಂ ಘರಾಣೆ ಆಮ್ಚೆಂ. ಘರಾಂತ್ ಆಬ್-ಮಾಂಯ್,ಬಾಬ್-ಮಾಂಯ್,ತೇಗ್ ಬಾಪ್ಪು ಆನಿ ದೋನ್ ಮೌಶ್ಯೊ, ಆನಿಂ ತಾಂಚಿ ಭುರ್ಗಿಂ,ಅಕಯ್, ಸಾಂಗಾತಾ ಮ್ಹಜೆ ಬಾಯ್ ಆನಿಂ ಹಾಂವ್. ಆಶೆಂ ಸಗ್ಳೆಂ ಕುಟಾಮ್ ತವಳ್ ಸಾಂಗಾತಾ ಆಸ್ಲ್ಯಾನ್ ಆಮ್ಚಿ ಲ್ಹಾನ್-ವ್ಹಡ್ ಫೆಸ್ತಾಂಕ್ ಕಸ್ಲಿ ಗದ್ದಾಳಾಯ್,ಕಸ್ಲಿ ಸುಂರ್ಗಾರಾಯ್ ಆನಿ ಕಸ್ಲಿಂ ಸರ್ಭರಾಯ್.ಫಿರ್ಗಜೆಚೆ ವ್ಹಡ್ಲೆಂ ಫೆಸ್ತ್, ಧಾಕ್ಟೆಂ ಫೆಸ್ತ್ (ಪಾತ್ರೊನ್ ಫೆಸ್ತ್) ,ಮೊಂತಿ ಫೆಸ್ತ್ ಆನಿಂ ಕಿಸ್ಮಸ್ ಲಾಗಿಂ-ಲಾಗಿಂ ಆಯ್ಲೆ ಮ್ಹಣ್ತಾನಾ, ಆಮ್ಚ್ಯಾ ಘರ್ಚ್ಯಾ ಲೇಡಿಸ್ ಡಿಪಾರ್ಟ್‌ಮೆಂಟಾಕ್ ಹಿಶಿನ್ -ತಿಶಿನ್ ಧಾಂವ್ಚ್ಯಾಂತ್ ಪೆಂಕಾಟ್ ಥೆಂಕುನ್ ಬಸೊಂಕ್ ಪುರ್ಸೊತ್ ಮೆಳಾನಾತ್ಲಿ ಆನಿ ತಾಂಚ್ಯಾ ಸಾಂಗಾತಾ ದಾದ್ಲ್ಯಾಂಕ್‌ಯ್ ತಿಂ, ಹೆಂ ಹಾಡ್-ತೆಂ ಹಾಡ್ ಮ್ಹಣೊನ್ ತಾಂಚ್ಯೊ ಬಾರಾ ಬ್ರೆಸ್ತಾರ್,ತೆರಾ ಸುಕ್ರಾರ್ ಕರ್ನ್ ಸೊಡ್ತಾಲಿಂ.

ಡಿಸೆಂಬರ್ ಮಹಿನ್ಯಾಚ್ಯಾ ಸುರ್ವೆರ್‌ಚ್ಚ್ ಆಮ್ಚ್ಯಾ ಘರ್ಚೆ ಲೇಡಿಸ್ ಡಿಪಾರ್ಟ್‌ಮೆಂಟ್ ಚುರುಕ್ ಜಾವ್ನ್ ನಿವ್ರ್ಯೊ,ಚಾಕ್ಲಿ, ತುಕ್ಡ್ಯೊ,ಕರಕಡ್ಡಿ,ಪೊಡಿ,ಲಾಡು,ಗುಳಿಯೊ ಆನಿಂ ಸಗ್ಳೆ ಕರ್ನ್ ಜಾತೆಚ್ ಹಿಶಿನ್-ತಿಶಿನ್ ಉರ್ಲ್ಯಾ ಪಿಟಾಂತ್ ಮತಿಂತ್ ಚಿಂತ್‌ಲ್ಲೆ ಕರ್ಚ್ಯಾಂತ್ ವ್ಯಸ್ಥ್ ಜಾತೆಲಿ. ಹಾಂಗಾಸರ್ ಕುಸ್ವಾರ್ ಬಾಸ್ಚ್ಯಾ ಸಾಂಗಾತಾ ಲೇಡಿಸ್ ಮಿಟಿಂಗಿಯಿ ಚಲ್ತಾಲೆಂ ಜಾಲ್ಲ್ಯಾನ್ ಟೈಮ್ ಪಾಸ್ ಕರುಂಕ್ ಕಿತೆಂಯ್ ಉಬ್ಗೊಣ್ ಭೊಗಾನಾತ್ಲಿ. ಆಮ್ಚ್ಯಾ ಘರ್ಚ್ಯಾ ಲೇಡಿಸ್ ಡಿಪಾರ್ಟ್‌ಮೆಟಾಂಚಿ ಸಾಂದೆ ಉಣೆಂ ಮ್ಹಣ್ ಕೊಣ್ಣಾ ಸೆಜಾರ್ಚಿ ಜೆಸ್ಸಿ ಆಂಟಿ, ಲೂಸಿ ಅಂಟಿಯ್ ಆಮ್ಗೆರ್‌ಚ್ಚ್ ಕುಸ್ವಾರ್ ಬಾಜುಂಕ್, ಗರ್ಜ್ ಆಸ್ಲ್ಯೊ ಬಿಡ್ಕ್-ಬಿಜಾರ್ ಬಾಂದುನ್ ಯೇವ್ನ್ ಬಸ್ತಾಲಿ. ಹಾಂಚ್ಯಾ ಸಾಂಗಾತಾ ಆಮ್ಚೆ ಚಿನ್ನಕ್ಕಯ್ ಕುಸ್ವಾರ್ ಬಾಜುಂಕ್ ಆಮ್ಕೆರ್‌ಚ್ಚ್ ತಂಬು ಮಾರ್ತಾಲೆ.

ತವಳ್ಚ್ಯಾ ದಿಸಾನಿಂ,ಆತಾಂಚ್ಯಾ ಪರಿಂ ಮಾರ್ಕೆಟಿಂತ್(ಅಂಗ್ಡಿಂತ್)ಕುಸ್ವಾರ್ ಮೆಳ್ತಾಲೊಗಿ? ಯಾ ನಾಂಗಿ? ತೆಂ ಮ್ಹಜ್ಯಾ ಜಾಣ್ವಾಯೆಂತ್ ನಾತ್ಲೆಂ.ಪುಣ್ ಆಮ್ಗೆರ್ ಮಾತ್ರ್ ತ್ಯಾ ದಿಸಾನಿಂ ಬಾಯ್ರ್ (ಅಂಗ್ಡಿ) ಥಾವ್ನ್ ಕುಸ್ವಾರ್ ಹಾಡ್ಚಿ ರಿವಾಜ್ ನಾತ್ಲಿ. ಕಿತೆಂಯ್ ಜಾಲ್ಯಾರಿ ಕುಸ್ವಾರ್ ಘರಾಂತ್‌ಚ್ಚ್ ಕರ್ಚೊ ಆಸ್ಲೊ. ಆನಿಂ ಆಶೆಂ ತಯಾರ್ ಕಲ್ಲೊ ಕುಸ್ವಾರ್ ಜೆಸ್ಸಿ ಅಂಟಿಗೆರ್, ಲೂಸಿ ಅಂಟಿಗೆರ್, ಸಿಲ್ಲಿಮಾಂಯ್‌ಗೆರ್ ಮ್ಹಣ್ ವಾಂಟುನ್ ಘೆಂವ್ಚೊ ಆಸ್ಲೊ. ಆನಿ ತಾಣಿ ತಯಾರ್ ಕೆಲ್ಲೊ ಕುಸ್ವಾರಿಯ್ ಆಮ್ಗೆರ್ ಯೆತಾಲೊ. ದೆಕುನ್ ಆಮ್ಕಾಂ ಆಮ್ಚ್ಯಾ ಘರ್ಚ್ಯಾ ಆಸ್-ಪಾಸ್ ಆಸ್ಚ್ಯಾ ಸರ್ವ್ ಘರಾಂಚ್ಯಾ ಕುಸ್ವಾರಾಚಿ ರೂಚ್ ಚಾಕೊಂಕ್ ಮೆಳ್ತಾಲಿ. ಹ್ಯಾ ಶಿವಾಯ್ ಆಮ್ಗೆರ್ ಕಾಮಾಕ್ ಯೆಂವ್ಚ್ಯಾ ಚಿನ್ನಕ್ಕ, ವನಜಕ್ಕ, ಗೌರಕ್ಕಗೆರ್ ಆಮ್ಚೊ ಕುಸ್ವಾರ್ ವ್ಹಸೊನ್ ಪಾವ್ತಾಲೊ. ಆನಿಂ ತಾಚೆಂ ಥಾವ್ನಿಯ್ ದಿಪಾವಳಿ ಫೆಸ್ತಾಕ್, ಆಮ್ಗೆರ್ ತಾಣಿಂ ತಯಾರ್ ಕೆಲ್ಲೆಂ ಗೊಡ್ಶೆಂ ಯೇವ್ನ್ ಪಡ್ತಾಲೆಂ.

ಆಮ್ಗೆರ್ ಕೆಲ್ಲಿ ಘಟ್-ಮುಟ್ ಬೊರಾಂ ಇಸ್ಕೊಲಾಕ್ ವೆತಾನಾ ಚಡ್ಡ್ಯೆಚ್ಯಾ ಬೊಲ್ಸಾಂತ್ ಯಾ ಕಂಪಾಸ್ ಬೊಕ್ಸಾಂತ್ ಗಾಲ್ನ್ ಇಸ್ಕೊಲಾಂತ್ ಪಾವ್ಲ್ಯಾ ಉಪ್ರಾಂತ್ ಮ್ಹಜೆ ಚಡ್ಡಿ ದೊಸ್ತ್ ರವಿ, ಸಂತೋಷ, ಮಂಜುನಾಥ ಆನಿ ಪುನೀತಾ ಸರ್ಶಿ ವಾಂಟುನ್ ಘೆಂವ್ಚೆ, ಆನಿ ಕ್ಲಾಸಿ ಮಧೆಂ ಅಸ್ಚ್ಯಾ ವಿರಾಮ ತವಳ್ ತೊಡಾಂತ್ ಘಾಲ್ನ್ ಚಾಬ್ಚೆಂ ಆಸ್ಲೆಂ. ಎಕ್ ದಿಸ್ ಆಶೆಂ ಬೊರಾಂ ಚಾಬೊನ್ ಆಸ್ತಾನಾ ಆಮ್ಚೊ ದಿವಾಕರ ಮಾಸ್ಟರ್ ವಿಜ್ಞಾನ ಪಾಠ್ ಕರುಂಕ್ ಕ್ಲಾಸಿಂತ್ ರಿಗ್ಲೊಚ್ಚ್. ಚಾಬ್ತಾನಾ ಕಟಾ-ಕಟಾ ಆವಾಜ್ ಜಾಂವ್ಚ್ಯಾನ್ ತಿಂ ಬೊರಾಂ ಆಮ್ಕಾ ತವಳ್ ಚಾಬೊಂಕಿಯ್ ಜಾಯ್ನಾಸ್ತಾನಾ, ಗಿಳುಂಕಿಯ್ ಜಾಯ್ನಾಸ್ತಾನಾ ಯಾ ಉಡೊಂಕಿಯ್ ಜಾಯ್ನಾಸ್ತಾನಾ ಸರ್ವೆಸ್ಪರಾ, ಹ್ಯಾ ಬೊರಾಂ ಆನಿ ಮಾಸ್ಟರಾ ಥಾವ್ನ್ ಆಮ್ಕಾಂ ರಾಕ್ ಮ್ಹಣ್ ಮಾಗ್ಣೆ ಕರ್ನ್ ತೊಡಾಂತ್‌ಚ್ಚ್ ದವರುನ್ ಬಸ್ಲ್ಯಾಂವ್.ಪುಣ್ ಆಮ್ಚ್ಯಾ ಮಂಜುನಾಥಚ್ಯಾ ಗ್ರಚಾರಾಕ್ ಮಾಸ್ಟರಾನ್ ತವಳ್‌ಚ್ಚ್ ವಿಸಾರ್ಲ್ಯಾ ಸವಾಲಾ ನಿಮ್ತಿ ಜವಾಬ್ ದಿಂವ್ಕ್ ದುಸ್ರಿ ವಾಟ್ ನಾಸ್ತಾನಾ ತಾಣೆಂ ದೋನ್ ಬೊರಾಂ ಸಗ್ಳಿಚ್ಚ್ ಗಿಳಾಜೆಯ್ ಪಡ್ಲಿಂ.

ಆಮ್ಚ್ಯಾ ಘರ್ಚೆ ಲೇಡಿಸ್ ಡಿಪಾರ್ಟ್‌ಮೆಂಟ್ ಕುಸ್ವಾರ್ ಕರ್ಚ್ಯಾಂತ್ ಮೆತೆರ್ ಜಾವ್ನ್ ಆಸ್ಲ್ಯಾರ್,ಆಮಿ ಭುರ್ಗಿ ಆಮ್ಚ್ಯಾ ದಾಕ್ಟ್ಯಾ ಬಾಪ್ಪು ಸಾಂಗಾತಾ ಗರ್ದನಾಚೊ ಗೊಟೊ ಕರ್ಚ್ಯಾ ವಾವ್ರಾಂತ್ ಮೆತೆರ್ ಜಾವ್ನ್ ಆಸ್ತೆಲ್ಯಾಂವ್. ಫಿರ್ಗಜೆಚ್ಯಾ ವ್ಹಡ್ಲ್ಯಾ ಫೆಸ್ತಾಕ್ ಆಬ್-ವ್ಹಡ್ಲಿಮಾಂಯ್,ಬಾಬ್-ಮಾಂಯ್,ಬಾಪ್ಪು-ಮಾಶಿ ಆನಿಂ ಮಾಮ್-ಮಾಮ್ಯೆನ್ ದಿಲ್ಲ್ಯಾ ವಿಸ್-ತಿಸ್ ರೂಪಾಯ್ ಸಾಂಗಾತಾ ಘಾಲುನ್ ವರ್ಸಾ-ವರ್ಸಾಕ್ ೪ - ೫ ಗರ್ದಾನ್ಯಾ ಗೊಟ್ಯಾಚೊ ಬೊಕ್ಡ್ಯೊ,ರಾಯ್,ಗೈರುಂ ಇತರ್ ಸಾಹೆತ್ ಎಕ್ಟಾಂಯ್ ಕರ್ಚ್ಯೊ ಆಸ್ಲ್ಯೊ.

ಕ್ರಿಸ್ಮಸ್ ಲಾಗಿಂ ಆಯ್ಲೆ ಮ್ಹಣ್ತಾನಾ ಗುಡ್ಯಾರ್ ವ್ಹಚೊನ್ ಸಾರ?ಯಾ ಬೊಡಿಯೊ ಹಾಡ್ನ್ ಗರ್ದನಾಚ್ಯಾ  ಗೊಟ್ಯಾಚೆ ಮಿಸಾಂವ್ ಸುರು ಕರ್ಚೆ ಆಸ್ಲೆಂ. ಆಮ್ಚೆ ಚಡ್ಡಿ ದೊಸ್ತ್ ಆವಿಟಾ ಆನಿ ಆಶ್ವಿನ್ ತಾಂಚ್ಯಾ ಧಾಕ್ಟ್ಯಾ ಬಾಪ್ಪು ಸಾಂಗಾತಾ ಗರ್ದನಾಚ್ಯಾ ಗೊಟ್ಯಾಚ್ಯಾ ಕಾಮಾಂತ್ ವ್ಯಸ್ಥ್ ಜಾಲ್ಯಾರ್,ಆಮಿ ಆಮ್ಚ್ಯಾ ಧಾಕ್ಟ್ಯಾ ಬಾಪ್ಪು ಸಾಂಗಾತಾ. ಆಮ್ಚ್ಯಾ ಭುರ್ಗ್ಯಾ ಮಧೆಂ ಕೊಣಾಚೊ ಗರ್ದನಾಚೊ ಗೊಟೊ ಸೊಭಿತ್ ಜಾತಾ ಮ್ಹಳ್ಳೆ ಕೊಂಪಿಟೀಶನ್ ಚಲ್ತಲೆ ತರೀ,ಆಮ್ಚ್ಯಾ ಧಾಕ್ಟ್ಯಾ ಬಾಪ್ಲ್ಯಾ ಮಧೆಂ ಕಿತೆಂಚ್ಚ್ ಕೊಂಪಿಟೀಶನ್ ನಾತ್ಲೆ. ಪುಣ್ ಆಮಿ ಕಿತೆಂಯ್ ಸರ್ಕಸ್ ಕೆಲ್ಯಾರಿ ಗರ್ದಾನಾಚೊ ಗೊಟೊ ಸೊಭಿತ್ ಜಾಂವ್ಚೊ ಆಮ್ಚ್ಯಾ ಸ್ಟೀವನಾಚೊತ್ತ್ ಜಾವ್ನ್ ಆಸ್ಲೊ. ತಾಚ್ಯಾ ಗೊಟ್ಯಾನ್ ಬಾಂಯ್, ನ್ಹಂಯ್, ಗಾದೆ, ತಾಳೆಂ, ಮಾರೊಗ್, ರಾನ್ ಇತ್ಯಾದಿ ಸರ್ವ್ ಕರ್ತಲೊ.

ಲ್ಹಾನ್ ಆಸ್ತಾನಾ ಮತಿಚಿ ಜಾಣ್ವಾಯ್ ತಿಕ್ಕೆಶಿ ಉಣಿ ಆಸ್ಲ್ಯಾನ್ ಡಿಸೆಂಬರ್ ಮಹಿನ್ಯಾಂತ್ ಆಮ್ಕಾಂ ಪಳೆಂವ್ಕ್ ಮೆಳ್ಚೊ ಸಾಂತಾಕ್ಲೊಸ್‌ಚ್ಚ್ ದೇವ್ ಮ್ಹಳ್ಳೆ ಚಿಂತಾಪ್ ಮತಿಂತ್ ಖಂಚೊನ್ ಗೆಲ್ಲೆಂ. ತ್ಯಾ ದೆಕುನ್‌ಚ್ಚ್ ದೊತೊರ್ನಿಚ್ಯಾ ಕ್ಲಾಸಿಂತ್ ಸಿಸ್ಟರಿನ್ ದೇವ್ ಕಸೊ ಆಸಾ? ಮ್ಹಣ್ ವಿಚಾರ್ತಾನಾ ದೇವ್, ಲಾಂಬ್ ಧವೆಂ ಕೇಸ್, ಲಾಂಬ್-ಲಾಂಬ್ ಮಿಶಿಯೊ ಆನಿ ಖಾಡ್ ಆಸ್ಚೊ ಮ್ಹಾತಾರೊ ಮ್ಹಣ್ ಜವಾಬ್ ದಿಲ್ಲಿಯ್ ಆಸಾ. ವ್ಹಡ್ ಜಾವ್ನ್ ಯೆತಾನಾ,ಗಿನ್ಯಾನ್ ವಾಡೊನ್ ಯೆತಾನಾ ಮ್ಹಜೆ ಚಿಂತಾಪ್ ಚೂಕ್ ಮ್ಹಣ್ ಕಳ್ಳೆಂ. ದಸಂಬರ್ ಮಹಿನ್ಯಾಂತ್ ದಿಸೊನ್ ಯೆಂವ್ಚೊ ಆಬ್ ಸಾಂತಾಕ್ಲೊಸ್ ಮ್ಹಣ್ ಸಮ್ಜೊನ್ ಆಯ್ಲೆ.

ಕ್ರಿಸ್ಮಸಾಚ್ಯಾ ದಿಸಾನಿಂ ಆಮ್ಚ್ಯಾ ಫಿರ್ಗೆಜೆಚೆ ಐಸಿವೈಎಮಾಚೆ ಸಾಂದೆ ಕ್ಯಾರಲ್ಸಾ ಸಾಂಗಾತಾ ಜೆಜು ಬಾಳ್ಕಾಚಿ ಇಮಾಜ್ ಘೆವ್ನ್ ಘರ್-ಘರಾನಿಂ ಕಿಸ್ಮಸ್ ಸಂದೇಶ್ ಹಾಡುನ್ ಯೆತಾಲೆ. ಥೊಡೆ ಪಾವ್ಟಿಂ ಹಾಣಿ ಆಮ್ಚ್ಯಾ ಘರಾ ಯೆತಾನಾ ರಾತ್ ಜಾತೆಲಿ ಜಾಲ್ಯಾನ್ ಆಮಿ ಭುರ್ಗಿಂ ನಿದೊನ್ ಆಸ್ತೆಲ್ಯಾಂವ್.ಪುಣ್ ಕ್ಯಾರಲ್ಸ್ ಯೆತಾನಾ ಬಾಬಾನ್ ಮ್ಹಾಕಾ ಉಟೊನ್ ಸಾಂತಾಕ್ಲೊಸಾ ಸರ್ಶಿ ಆಪೊವ್ನ್ ವ್ಹರ್ಚೆಂ ಆಸ್ಲೆಂ. ತವಳ್ ಶೇಕ್ ಹ್ಯಾಂಡ್ ಕರುಂಕ್ ಲಾಗಿಂ ಯೆಂವ್ಚ್ಯಾ  ಸಾಂತಾಕ್ಲೊಸಾಕ್ ಪಳೆಚ್ನ್ ಭೆಂ ದಿಸೊನ್ ಜೊರಾನ್ ಹಾಂವೆ ಬೊಬಾಟ್ ಘಾಲ್ಚಿ ಆಸ್ಲಿ. ಸಾಂತಾಕ್ಲೊಸ್ ವೇಸ್ ಘಾಲ್ಲೆಲ್ಯಾನ್ ತೊಡಾಂಚೊ ವೇಸ್ ಕಾಡ್ನ್ ಅಪ್ಲಿಂ ವೊಳೊಕ್ ಸಾಂಗೊನ್ ಚೊಕ್ಲೆಟಾಂ ದಿಲ್ಯಾರಿ ಮ್ಹಜಿ ಬೊಬ್ ಮಾತ್ರ್ ರಾವಾನಾತ್ಲಿಂ. ಆನಿ ಆಸ್ಲಿ ಎಕ್ ಭಿರಾಂತ್ ಲ್ಹಾನ್ -ಪಣಿಂ ಸುಮಾರ್ ವರ್ಸಾಂ ಪರ್ಯಾಂತ್ ಮ್ಹಾಕಾ ಸಾರ್ಕಿ ಸಮ್ಜಣಿ ಯೆಂವ್ಚ್ಯಾ ಪರ್ಯಾಂತ್ ಆಸ್ಲಿ.

ತರ್ನಾಟೊ ಜಾವ್ನ್ ಐಸಿವೈಎಮಾಚೊ ಸಾಂದೊ ಜಾತಾನಾ ಸಗ್ಳೆಂ ಉಲ್ಟೆಂಚ್ಚ್ ಜಾಲ್ಲೆಂ. ಲ್ಹಾನ್ ಪ್ರಾಯೆರ್ ಕ್ರಿಸ್ಮಸ್ ದಿಸಾನಿಂ ಹಾಂವ್ ಕೊಣಾಕ್ ಪಳೆವ್ನ್ ಭಿಯೆತಾಲೊಂಗಿ, ತಾಚೊ ವೇಸ್ ನ್ಹೆಸೊನ್ ಇಗರ್ಜೆಂತ್, ತಶೆಂಚ್ಚ್ ಫಿರ್ಗಜೆಚ್ಯಾ ಘರ್-ಘರಾನಿಂ ಬೊಂವ್ಚಿ ನಾಕಾ ಜಾಲ್ಲಿ ಬರಿ ಶಿಕ್ಷಾ ಮ್ಹಾಕಾ ಫಾವೊ ಜಾಲ್ಲಿ. ತ್ಯಾ ದಿಸಾನಿಂ ಸಾಂತಾಕ್ಲೊಸಾಚೊ ವೇಸ್ ನ್ಹೆಸೊನ್,ಕ್ಯಾರಲ್ಸ್ ಕರ್ನ್ ಘರ್-ಘರಾನಿಂ ಭಂವ್ಲ್ಯಾ ತವಳ್ ಸಾಂಗಾತ್ಯಾ ಸಾಂಗಾತಾ ಜಾಲ್ಲೊ ಆನ್ಬೋಗ್ ಮಾತ್ರ್ ಕ್ರಿಸ್ಮಸಾಚ್ಯಾ ಕುಸ್ವಾರಾ ಪರಿಂ ಗೊಡ್ಸೊ ಮ್ಹಣ್ಯೆತ್.

ಕ್ರಿಸ್ಮಸ್ ಕ್ಯಾರಲ್ಸ್ ಕರ್ನ್ ಬೊವ್ತಾನಾ ಹರ್ಯೆಕಾ ಘರಾ ಸಕ್ಟಾಂಚ್ಯಾ ಪಯ್ಲೆ ಸಾಂತಾಕ್ಲೊಸ್ ಪಾವಾಜೆಯ್ ಜಾಲ್ಲ್ಯಾನ್ ಹಾಂವೆ ವೆಗ್ಗಿ-ವೆಗ್ಗಿ ಚಲಾಜೆಯ್ ಆಸ್ಲೆ. ಪಯೆಂಚ್ಚ್ ದುಂಡು-ಗುಂಡು ಜೀವ್ ಮ್ಹಜೊ, ಹಾಚೆಂ ಶಿವಾಯ್ ಪೋಟ್ ವ್ಹಡ್ಲೆಂ ದಿಸೊಂಕ್ ಎಕ್ ಉಶೆಂ ಮ್ಹಜ್ಯಾ ಪೊಟಾಕ್ ಬಾಂದ್ಲ್ಯಾನ್ ಚಲೊಂಕ್ ಆಡ್ಕಳ್ ಜಾತಾಲಿ. ಹ್ಯಾಚ್ಚ್ ದೆಕುನ್ ಜಾಯ್ತೆ ಪಾವ್ಟಿ ಕ್ಯಾರಲ್ಸ್ ಗಾಯನ್ ಕರ್ತಾಲೆ ಆನಿ ಸಂಗೀತ್ ವಾಜಾಂತ್ರ್ ಖೆಳ್ತಾಲೆ ಮ್ಹಜ್ಯಾನಿಂ ಪಯ್ಲೆ ವಚೊನ್ ಮ್ಹಜಿ ವಾಟ್ ರಾಕೊನ್ ಬಸ್ತಾಲೆ. ಆನಿ ಜಾಯ್ತೆ ಪಾವ್ಟಿಂ ಪಯ್ಲೆಂ ಘರಾ ಪಾವ್ಲ್ಯಾ ಲಾಗಿಂ ಮ್ವಜ್ಯಾ ವೇಸಾಚಿ ವ್ಯವಸ್ಥಾ ಪಳೆವ್ನ್ ಸುಣ್ಯಾನಿಂ ಧಾವ್ಡೊನ್ ಹಾಡ್ಲೆಂ ದಾಕ್ಲೆಂಯ್ ಆಸಾತ್ ಆನಿಂ ಧಾಂವ್ತಾತಾ ಮಾಡಾ ಖಾಟ್ಯಾರ್ ಪಡ್ಲೊಲೊ ಆನ್ಬೋಗಿಯ್ ಆಸಾ.

ಕ್ಯಾರಲ್ಸಾ ವೆಳಾರ್ ಹರ್ಯೆಕಾ ಘರಾನಿಂ ದಿಲ್ಲೊ ಕುಸ್ವಾರ್, ಕೇಕ್, ಶರ್ಬತ್, ಜ್ಯೂಸ್, ಚಾ-ಕಾಫಿ ಮ್ಹಣೊನ್ ಸೆವ್ನ್, ಪೋಟ್ ಪುಗೊನ್, ಆನ್ಯೇಕಾ ವಾಟೆನ್ ಪುರಾಸಣೆನ್ ಹರ್ಯೆಕ್ಲೊ ಕ್ಯಾರಲ್ಸ್ ಸಂಪೊವ್ನ್ ಯೆತಾನಾ ಜೀವ್ ಆಸ್ಲೆಂ ಮೊಡೆಂ ಜಾತಾಲೆಂ. ಆನಿ ಥೊಡೆ ಜಣ್ ಕ್ಯಾರಲ್ಸ್ ಸಂಪ್ಚ್ಯಾ ಪಯ್ಲೆಂಚ್ಚ್ ಪನ್ನಾದೆ ಪದ್ರಾಡ್.ಪುಣ್ ಮ್ಹಜಿ ಆವಸ್ಥಾ ಹುನ್ ತೂಪ್ ಗಿಳುಂಕಿಯ್ ನ್ಹಯ್ ಯಾ ಉಡೊಂವ್ಕಿಯ್ ನ್ಹಯ್ ಮ್ಹಳ್ಯಾ ಪರಿಂ.

ಆಶೆಂ ಎಕ್ ಪಾವ್ಟಿ ಕ್ಯಾರಲ್ಸಾಚ್ಯಾ ಸಂಜೆಚ್ಯಾ ವೆಳಾರ್ ಎಕಾ ವಾಡ್ಯಾಚ್ಯಾ ಗುರ್ಕಾರಾಗೆರ್ ಆಮ್ಕಾಂ ಜೆವಾಣ್. ಹಾಂವ್ ಸಾಂತಾಕ್ಲೊಸ್ ನ್ಹೆಸಾಣ್ ನಿಕ್ಳೊವ್ನ್, ಜೆವಾಣ್ ಕರ್ನ್ ಉರ್ಲ್ಯಾಂಚೆ ಜೆವಾಣ್ ಜಾಂವ್ಚ್ಯಾ ಪರ್ಯಾಂತ್ ವಿಶೆವ್ ಘೆಂವ್ಕ್ ಇಲ್ಲೆಶೆಂ ನಿದ್ಯಾಂ ಮ್ಹಣ್ ಚಿಂತುನ್ ಘರ್ಚ್ಯಾ ಚಾವ್ಡೆರ್ ಆಡ್ ಪಡ್ಲ್ಯಾ ಲಾಗಿಂ ಜೊರಾನ್ ನೀದ್ ಆಯ್ಲಿ ಕಳೊಂಕ್‌ಚ್ಚ್ ನಾತ್ಲೆಂ. ಪಯ್ಲೆಂಚ್ಚ್ ಪುರಾಸಣೆನ್ ಜಿವೆ ಮೊಡೆ ಜಾಲ್ಲೆ ಮ್ಹಜೆ ಸಾಂಗಾತಿ ಜೆವಾಣ್ ಕರ್ನ್, ಕ್ಯಾರಲ್ಸ್ ಮುಕಾರ್ಸುನ್ ವೆತೆ ರಾವ್ಲೆ. ಆಶೆಂ ಚಾರ್-ಪಾಂಚ್ ಘರಾನಿಂ ಕ್ಯಾರಲ್ಸ್ ಸಂಪಯ್ಲ್ಯಾ ಉಪ್ರಾಂತ್ ಎಕಾ ಘರಾ ಸಾಂತಾಕ್ಲೊಸ್ ಯೇಂವ್ಕ್ ನಾಂಗಿ? ಮ್ಹಣ್ ವಿಚಾರ್ಲೆಂ ಖಂಯ್. ಆಮ್ಚ್ಯಾಂಕ್ ತೆದಾಳಾಚ್ಚ್ ಹಾಂವ್ ತಾಂಚೆ ಸಾಂಗಾತಾ ನಾ ಮ್ಹಣೊನ್ ಜ್ಞಾನೋದಯ ಜಾಲ್ಲೆಂ. ಹಾಂವ್ ತಾಂಚ್ಯಾ ಸಾಂಗಾತಾ ನಾ ಮ್ಹಣೊನ್ ಖಳಿತ್ ಜಾಲ್ಲೆಚ್ಚ್, ಮ್ಹಾಕಾ ಸೊಧುಂಕ್ ತಾಣಿ ಮುಕಾರ್ ಗೆಲ್ಯಾ ವಾಟೆರ್ ಥಾವ್ನ್‌ಚ್ಚ್ ಪಾಟಿ ಯೇವ್ನ್ ಜೆವಾಣ್ ಕೆಲ್ಲ್ಯಾ ಗುರ್ಕರಾಚ್ಯಾ ಘರಾ ಪಾವ್ತಾನಾ ಹಾಂವ್ ಚಾವ್ಡೆರ್ ನಿದೆಂತ್ ಗೊರಾಣಿ ಮಾರ್ತಲೊ.

-ಮೆಲ್ವಿನ್ ಕೊಳಲ್ ಗಿರಿ

('ಕಿಟಾಳ್.ಕೊಮ್’ ಜಾಳಿಜಾಗ್ಯಾರ್ ಪ್ರಕಟಿತ್ ಪ್ರಬಂಧ್)

ತಪ್ಪಲ್ ಪೆದ್ಯಾಕ್ ರಾಕೊನ್ ಬಸ್ಚ್ಯಾ ತಶೆಂ ಕೆಲ್ಲೆಂ ಪತ್ರ್

ಮ್ಹಜ್ಯಾ ವಯುಕ್ತಿಕ್ ಆಭಿಪ್ರಾಯೆ ಪರ್ಮಾಣೆ ಆಜ್-ಕಾಲ್ ಕೊಣಿಯ್ ಏಕ್ಲೊ ಖಂಚಾಯ್ ಪತ್ರಾಚೊ ವರ್ಗಣಿದಾರ್ ಜಾತಾ ತರ್,ತೆಂ ಚಡಾವತ್ ಜಾವ್ನ್ ಕೊಣಾಚಾಯ್ ಎಕ್ಲ್ಯಾಚ್ಯಾ ದಾಕ್ಷೆಣೆಕ್ ಲಾಬ್ದೊನ್ ವಾ ವೊತ್ತಾಯೆಕ್ ಲಾಗೊನ್ ಮ್ಹಣ್ಯೆತ್.ಪುಣ್ ಏಕ್ ಖರ್ಯಾ ಕೊಂಕ್ಣಿ ಸಾಹಿತ್ ಆಭಿಮಾನಿಕ್ ಆಶೆಂ ವೊತ್ತಾಯೆಚಿ ವರ್ಗಣಿ ಗರ್ಜ್ ನಾ.ತೊ ಅಪ್ಣಾಸಕ್ತಿಂ ಕೊಂಕ್ಣಿ ಪತ್ರಾಚಿ  ವಾಂಚ್ಚಿ ಆಭುರುಚ್ ದಾಕಯ್ತಾ.ತಾಚ್ಯಾ ಆಭಿರುಚೆ ಪರ್ಮಾಣೆ ಸಾಹಿತ್ಯ್ ಮಾತ್ರ್ ತಾಕಾ ತ್ಯಾ ಪತ್ರಾ ಥಾವ್ನ್ ವಾಂಚುಕ್ ಮೆಳಾಜೆಯ್ ತಿತ್ಲೆಚ್.ಕೆದಳಾ ಸಾಹಿತ್ಯ್ ಉಣೆ ಜಾವ್ನ್ ಜಾಹಿರಾತ್ ಚಡ್ಲೆಂ,ತೆದಳಾಂ ತೊ ವ್ಯಕ್ತಿಂ ತ್ಯಾ ಪತ್ರಾ ಥಾವ್ನ್ ಪಾಟಿಂ ಗುಂವ್ತಾಂ.ಪುಣ್ ವೊತ್ತಾಯೆಚೆ ವಾ ದಾಕ್ಷೆಣೆಚಿ ವರ್ಗಣಿ ಕೆಲ್ಲ್ಯಾಂಕ್ ಚಡ್ ಜಾಹಿರಾತ್ ಆಸ್ಲ್ಯಾರಿಯ್,ಉಣೆಂ ಸಾಹಿತ್ಯ್ ಆಸ್ಲ್ಯಾರಿಯ್ ಕಿತೆಚ್ ಫರಕ್ ಪಡನಾ.ಕಿತ್ಯಾಕ್, ತಾಕಾ ಕೊಂಕ್ಣಿ ಪತ್ರ್ ವಾಂಚ್ಚಿ ಆಸಕ್ತ್ ಚ್ ಆಸಾನಾ.

ಆಜ್ ’ನಮಾನ್ ಬಾಳೊಕ್ ಜೆಜು’ ಪತ್ರ್ ವಾಡೊನ್ ಆಯಿಲ್ಲಿ ರೀತ್ ತಿಂ ವೆಗ್ಳಿಚ್ ಮ್ಹಣ್ಚ್ಯಾ ತಸ್ಲಿಂ.ಹೆಂ ಹಾಂವ್ ದೋನ್ ಹಂತಾನಿಂ ವರಯ್ಲ್ಯಾಂತ್.

1.      ಪಯ್ಲ್ಯಾನ್- ಕೇವಲ್ ಏಕ್ ವರ್ಗಣಿದಾರ್ ಜಾವ್ನ್

2.     ದುಸ್ರ್ಯಾನ್- ಪತ್ರಾಚೊ ಬರವ್ಪಿ ಜಾವ್ನ್

ಸುರ್ವೆರ್ ಚ್ ಸಾಂಗ್ಲೆಪರಿಂ ಹಾಂವೆ ಆಮ್ಗೆರ್ ಯೇವ್ನ್ ಪಾಂವ್ಚ್ಯಾ ಕೊಂಕ್ಣಿ ಪತ್ರಾಚಿ ವರ್ಗಣಿ ಕೆಲ್ಲಿಂ ದಾಕ್ಷೆಣೆಕ್ ನ್ಹಯ್ ವಾ ವೊತ್ತಾಯೆಕ್ ನ್ಹಯ್.ಬಗಾರ್ ಸಾಹಿತ್ಯಾಚಾ ಮೋಗಾನ್.ಮ್ಹಣ್ತಚ್ ಪತ್ರಾರ್ ಮ್ಹಾಕಾ ವಾಂಚುಕ್ ಮೆಳ್ಚೆಂ ಸಾಹಿತ್ಯ್ ಚ್ ಮ್ಹಾಕಾ ಪ್ರಮುಕ್ ಜಾತಾ. ತಶೆಂ ಮ್ಹಣೊನ್ ಪತ್ರಾಂತ್ ಜಾಹಿರಾತ್ ಆಸೊಂಕ್ ನ್ಹಜೊ ಮ್ಹಣೊನಿಯ್ ನ್ಹಯ್.ಜಾಹಿರಾತಾಂ ಪತ್ರಾಚ್ಯಾ ಆಭಿವೃದ್ಧೆಕ್ ಗರ್ಜೆಚೆ.ತ್ಯಾ ದೆಕುನ್ ಗರ್ಜೆಚಿ ಜಾಹಿರಾತ್ ಪತ್ರಾಕ್ ಆಸಾಜೆಯ್ ಚ್.

ಕೇವಲ್ ಏಕ್ ವರ್ಗಣಿದಾರ್ ಜಾವ್ನ್ ’ನಮಾನ್ ಬಾಳೊಕ್ ಜೆಜು” ಪತ್ರಾ ವಿಶಿಂ ಸಾಂಗ್ಚೆ ತರ್ ಪಾಟ್ಲ್ಯಾ ಸಾತ್ ವರ್ಸಾನಿಂ ಹ್ಯಾ ಪತ್ರಾನ್ ವಾಂಚುಕ್ ಆನಿಂ ನಿಯಾಳುಂಕ್ ದಿಲ್ಲೆಂ ಸಾಹಿತ್ಯ್ ಊಂಚ್ಲೆಂ.ಪತ್ರಾಂತ್ ಜಾಹಿರಾತಾಂ ಚಡ್ ಆಸ್ಲ್ಯಾ ವೆಳಾಂ ಪತ್ರಾಚಿಂ ಪಾನಾಂಯ್ ಚಡೊನ್ ಏಕ್ ಸಮತೋಲಿತ್ ಪತ್ರ್ ವಾಂಚ್ಪ್ಯಾಕ್ ಫಾವೊ ಕೆಲಾ.ಹಾಂವೆ ನ.ಬಾ.ಜೆ ಪತ್ರಾಂ ಮುಕೆನ್ ಥೊಡ್ಯಾ ಮಹಿನ್ಯಾ ಪಯ್ಲೆಂ ಎದೊಳ್ ಚ್ ಸಾಂಗ್ಲೆ ಪರ್ಮಾಣೆ ಪಾಟ್ಲ್ಯಾ 7 ವರ್ಸಾಂ ಮಧೆಂ ಹ್ಯಾ ಪತ್ರಾನ್ ಅಪುಡ್ಲೆಲೆಂ ಥೊಡೆಂ ಸಂಕೀರ್ಣ್ ವಿಷಯ್ ಮೆಚ್ವೊಂಚ್ಯಾ ತಸ್ಲೆಂ.ಜಾಂವ್ಕ್ ಪುರೊ ತೆಂ ಲೈಂಗಿಕ್ ದಂದ್ಯಾ ವಿಶ್ಯಾಂತ್,ಪೊರ್ನೊಗ್ರಾಫಿ ವಿಶ್ಯಾಂತ್,ಸಂಪೂರ್ಣ್ ಕವಿತಾ ಆಂಕೊ,ಶಿಕ್ಷಣ್,ಲಾಯಿಕ್ ಮುಕೆಲ್ಪಣ್,ಯುವಜಣಾಂಕ್ ಸಮರ್ಪಿತ್ ಆಂಕೊ,ವಿಡಂಬನ್ ಆಂಕೆಂ ವಾ ಹೆರ್ ಖಂಚೆಯ್ ವಿಷಯ್.ತಶೆಂ ಮ್ಹಣೊನ್ ಧಾರ್ಮಿಕಾನಿಂ ಚಲೊವ್ಚೆಂ ಪತ್ರ್ ಜಾಲ್ಲ್ಯಾನ್ ಧಾರ್ಮಿಕ್ ಸಂಗ್ತಿಂ ಥಾವ್ನ್ ಯ್ ಪತ್ರ್ ಪಯ್ಸ್ ವಚೊಂಕ್ ನಾ.

ನ.ಬಾ.ಜೆ ಪತ್ರಾಚೊ ಬರವ್ಪಿ ಜಾವ್ನ್ ಸಾಂಗ್ಚೆತರ್,ಬರ್ಪಾಂಚ್ಯಾ ಉತ್ರಾಂಚೆರ್ ಆಡ್ಕಳ್ ಹಾಡುನ್ ಬರೊವ್ಪ್ಯಾಚಾ ಚಿಂತ್ಪಾಚೆರ್ ವಾ ವಿಚಾರಾಂಚೆರ್ ಕುರಾಡ್ ಕೆದಳಾಯ್ ಹ್ಯಾ ಪತ್ರಾನ್ ಮಾರುಂಕ್ ನಾ.ಬರವ್ಪ್ಯಾನ್ ಕಶೆಂ ಲಿಕ್ಲಾಂ ತಶೆಂ ಚೂಕ್ ಆಸ್ಲ್ಯಾರ್ ಪತ್ರಾಚ್ಯಾ ಧೋರಣಾಂ ಪ್ರಕಾರ್ ಸಾರ್ಕೆ ಕರುನ್,ಸ್ಪಷ್ಟ್ ವ್ಯಾಕರಣ ಸವೆಂ ಫಾಯ್ಸ್ ಕೆಲಾಂ.ಜಾಗೊ ಉರ್ಲ್ಯಾ ಕೊನ್ಶ್ಯಾಂತ್ ಕವಿತಾ ಲೊಟುನ್ ಕವಿಂಕ್ ಆನಿಂ ಕವಿತೆಕ್ ಆಕ್ಮಾನ್ ಕರ್ಚ್ಯಾ ಥೊಡ್ಯಾಂ ಪತ್ರಾಂ ಮುಕಾರ್ ಕವಿತೆಕ್ ವಿಶಿಷ್ಟ್ ಸ್ಥಾನ್ ದಿಲ್ಲ್ಯಾನ್,ನ.ಬಾ.ಜೆ ಪತ್ರ್ ವಿಶೇಷ್ ಜಾವ್ನ್ ಸೊಭ್ತಾ.ಮ್ಹಾಕಾ ಜಾಯ್ತ್ಯಾ ಪಾವ್ಟಿ ಖಂಚಾಯ್ ಏಕ್ ವಿಷಯಾಚೆರ್ ಏಕ್ ಬರಪ್ ದಿಂವ್ಕ್ ಉಲೊ ದಿಲ್ಲ್ಯಾ ವೆಳಾ "ಕಿತ್ಲ್ಯಾ ಉತ್ರಾಂಕ್ ?" ಸಂಪಾದಕಾಕ್ ವಿಚಾರ್ಲ್ಯಾ ವೆಳಾ "ಉತ್ರಾಂ ಕಿತ್ಲಿಯ್ ಆಸುಂ,ಲಗಾಮ್ ನಾ.ಬರವ್ನ್ ಧಾಡ್" ಮ್ಹಳ್ಳಿಂ ಜಾಪ್ ಸಂಪಾದಕ ಥಾವ್ನ್ ಮೆಳ್ತಾನಾ ಹ್ಯಾ ಪತ್ರಾಕ್ ಲೇಖಕಾಚೆರ್ ಕಿತ್ಲೊ ಮಾನ್ ಆಸಾ ಮ್ಹಣ್ ಖಳಿತ್ ಜಾತಾ.ಪತ್ರಾನ್ ವಿಂಚ್ಲೆಂ ವಿಷಯ್ ಖಂಚೆಯ್ ಆಸುಂ,ತಾಕಾ ಧಾರ್ಮಿಕ್ ವಾ ಸಮಾಜಿಕ್ ನದರ್ ಆಸಾ ಮ್ಹಣ್ ಅಪ್ಲ್ಯಾ ಸಂಪಾದಕೀಯಾಂತ್ ಸಾರಾಂಶ್ ಮುಕಾಂತ್ರ್ ಸಂಪದಕಾನ್ ವಾಂಚ್ಪ್ಯಾಕ್ ಫಾಲೊ ಕೆಲಾ.ಮ್ಹಾಕಾ ವಯುಕ್ತಿಕ್ ಜಾವ್ನ್ ನವೊ ಮಹಿನೊ ಸುರು ಜಾತಾನಾ ತಪ್ಪಲ್ ಪೆದ್ಯಾಕ್ ರಾಕೊನ್ ಬಸ್ಚ್ಯಾಂ ತಶೆಂ ಹ್ಯಾ ಪತ್ರಾನ್ ಕೆಲಾಂ.

ಖಂಡಿತ್ ಜಾವ್ನ್ ಆಜ್ ಏಕ್ ಅಪುರ್ಬಾಯೆಚ್ಯಾ ಪತ್ರಾನ್ ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ಧಾದೊಸ್ಕಾಯೆಚೆ ಸಾತ್ ವರ್ಸ್ ಸಂಪಯ್ಲ್ಯಾ.ದೆಕುನ್ ಹ್ಯಾ ಪತ್ರಾ ಪಾಟ್ಲ್ಯಾನ್ ವಾವ್ರ್ ದಿಲ್ಲ್ಯಾ ಸಂಪಾದಕ್ ಬಾಪ್ ಸ್ಟೀವನ್,ಸಹ-ಸಂಪಾದಕ್ ಬಾಪ್ ಜೊ.ಸಿ ಸಿದ್ದಕಟ್ಟೆ,ಸಂಪಾದಕೀಯ್ ಮಂಡಳಿ,ಕಾರ್ಮೆಲಿತ್ ವ್ಹಡಿಲಾಂಕ್ ಆನಿಂ ಯಾಜಕಾಂಕ್ ಹಾಂವ್ ಪರ್ಬಿ ಪಾಟಯ್ತಾ ಆನಿಂ ’ನ.ಬಾ.ಜೆ’ ಲಾಂಭ್ ಜಿಯೊಂ ಮ್ಹಣ್ ಮಾಗ್ತಾ.

-ಮೆಲ್ವಿನ್ ಕೊಳಲ್ ಗಿರಿ

ರಸ್ತ್ಯಾ ವಯ್ಲಿಂ ದುರಾಂತ್ ಚಿತ್ರಾಂ

ರಸ್ತ್ಯಾ ವಯ್ಲಿಂ ದುರಾಂತ್ ಚಿತ್ರಾಂ

1

ಪಯ್ಣಾ ವಾಟೆರ್
ತರ್ನ್ಯಾ ವಾಟ್ಸುರ್ಯಾಚಿ
ಖುನ್...
ರಸ್ತ್ಯಾನ್ ಸುಫಾರಿ ಘೆತ್ಲ್ಯಾ...
ಪುಕ್ಯಾಂಕ್...

2

ಮಧನೆಚ್ಯಾ ವೊತಾಂತ್ 

ಸುಕೊನ್ ತಾನೆಲ್ಲ್ಯಾ 

ರಸ್ತ್ಯಾನಿಂ ತರ್ನೆ ರಗತ್

ಪಿಯೊನ್ ಸೊಡ್ಲೆಂ...

ಕೊಬಾ ಜ್ಯೂಸಾ ತಶೆಂ

ರಸ್ತ್ಯಾ ಖಾಟ್ಕೆ ಥಾವ್ನ್ 

ದೆವೊನ್ ಸುಕ್ಲೆಂ ರಗತ್ 

ಸಾಕ್ಸ್ ದಿತಾಲೆಂ...

3

ತೆಂ ದೋಗ್

ಎಕಾಮೆಕಾ ಆಪ್ಟೊನ್ 

ಪಡ್ಲೆಂ ಪಳೆವ್ನ್

ರಸ್ತೊಯ್ ಮೊವಾಳ್ಳೊ

ರಡ್ಲೊ ಆನಿಂ

ರಗ್ತಾ ದುಃಕಾಂಚ್ 

ಘಳಯ್ ಲಾಗ್ಲೊ

4

ವ್ಹಯ್...ಹಾಂವೆ 
ವೆಗ್ಗಿಚ್ ಘರಾ ಪಾವಾಜೆಯ್
ರಾತ್ ಜಾಂವ್ಚ್ಯಾ ಪುಡೆಂ..,
ಮಾಸಾಕ್ ಭುಕೆಲ್ಲಿ
ರಗ್ತಾಕ್ ತಾನೆಲ್ಲಿ
ಸಭಾರ್ ಆಸಾತ್ ವಾಟೆರ್...
ರಸ್ತೊ ಸಮೇತ್...

(ಪ್ರೇರಣ್:ವಿಲ್ಸನ್ ಕಟೀಲ್’ಚಿ ’ಭುಕ್’ ಕವಿತಾ)

5

ಹೊ ರಸ್ತೊ ಕಿತ್ಲ್ಯಾ

ತೆಂಪಾ ಥಾವ್ನ್

ಭುಕೆನ್ ಆಸ್ಲೊ

ಕೋಣ್ ಜಾಣಾಂ?

ಮೆಂದು ಸಮೇತ್

ಫಾಪ್ಸುನ್ ಖೆಲಾಂ..

6

ಫೊಲೀಸ್ ಪೆದೊ

ರಸ್ತ್ಯಾರ್ ಮಾಸಾ 

ಕುಡ್ಕೆಂ ವಿಂಚ್ತಾ

ಗೊಣಿಯೆಂತ್ ಗಾಲ್ತಾ...

ಗುಜರಿ ವಿಂಚ್ತ್ಯೆಲ್ಯಾಚೊ

ಉಡಾಸ್ ಹಾಡಯ್ತಾ...

7

ರಸ್ತ್ಯಾ ಆವ್ಗಡಾಂತ್
ಸಂಪಡ್ನ್ ಜೀವ್ ಸೊಡ್ಲ್ಯಾ
ಮೊಡ್ಯಾಕ್ ತಾಣಿಂ
ನಾಣೆಯ್ಲೆಂ....
ಮಾಂಯ್ನ್
ಶಿಂದ್ಲ್ಯಾ ಮಾಸಾ 
ಪೊಡಿಯಾಂಕ್ ಧುಂವ್ಚೆಪರಿಂ

ಹವ್ಯಾಸಿ ಮಾಸ್ಳಿ ಪಾಗ್ಪಿ ಕರವಾಳೆಚೆ ಕೊಂಕ್ಣಿ ಕ್ರಿಸ್ತಾಂವ್

'ಮಾಸ್ಳಿ' ಕರಾವಳೆಚ್ಯಾ ಲೋಕಾಂಚೆ ಪ್ರಮುಖ್ ಖಾಣ್. ಜಾತ್-ಧರ್ಮ್ ಭೇದ್ ನಾಸ್ತಾನಾ ಹಾಂಗಾಸರ್ ವಸ್ತಿ ಕರ್ಚ್ಯಾ  ಚಡಾವತ್ ಲೋಕಾಂಕ್ 'ಮಾಸ್ಳಿ' ನಾಸ್ತಾನಾ ಶೀತ್ ಗಳ್ಯಾ ಥಾವ್ನ್ ಪೋಟಾಕ್ ದೆಂವ್ಚೆಂ ನಾ. ಇತ್ಲೆಚ್ಚ್ ನ್ಹಯ್ ಥೊಡೆಂ ಪಾವ್ಟಿಂ ಪ್ರವಾಸ್ ಕರ್ನ್ ಯಾ ಇತರ್ ಕಾರ್ಯಕ್ರಮಾಂ ಪಾಸತ್ ಪಯ್ಶಿಲ್ಯಾ ಬೆಂಗ್ಳುರ್,ಮೈಸೂರ್ ಯಾ ಇತರ್ ಕರವಾಳ್ ಪ್ರದೇಶಚೆ ನ್ಹಯ್ ಆಸ್ಲೆಂ ಲೋಕ್ ಹಾಂಗಾಸರ್ ಪಾವ್ತಾನಾ,ಮಾರ್‍ಗಾಯೆಚೆ ಗಣ್ಣೆಂ ಕರಿನಾಸ್ತಾನಾ ತಾಣಿಂ ಸೇಂವ್ಕ್ ಆಶೆಂವ್ಚೆಂ ಖಾಣ್ ಜಾವ್ನಾಸಾ 'ಮಾಸ್ಳಿ'.ಹ್ಯಾಚ್ಚ್ ರೀತಿನ್ ಮಾಸ್ಳಿ ಸೆಂವ್ಚ್ಯಾತ್ ಆಮಿಂ ಕರಾವಳೆಚೆ ಕೊಂಕ್ಣಿ ಕ್ರಿಸ್ತಾಂವ್ ಪಾಟಿಂ ಮ್ಹಳ್ಯಾರ್ ಭೋವ್ ವ್ಹಡ್ ಅಪ್ವಾದ್ ಜಾಯ್ತ್ ಕೊಣ್ಣಾ .

ಚಡಾವತ್ ಆಮ್ಚ್ಯಾ ಕರಾವಳ್ ಪ್ರದೇಶಾಂತ್ ಮಾಸ್ಳಿ ಧರ್ಚೊ ವಾವ್ರ್ ಮೊಗೊರ್ ಸಮುದಾಯ್ ಚಲಯ್ತಾ. ಮಾಸ್ಳಿ ಪಾಗ್ಚೆಂ ಕಾಮ್ ತಾಂಚ್ಯಾಂ ಸಮುದಾಯಾಕ್ ತಾಂಚ್ಯಾಂ ಪುರ್ವಜಾಂ ಥಾವ್ನ್ ಲಾಭ್ಲೆಲೆ ಕಾಮ್ ಆನಿಂ ತೆಂ ಕಾಮ್ ಆಜೂನಿಯ್ ಜಾಲ್ಯಾರಿಯ್ ತೆ ಮುಕಾರ್ಸುನ್ ಆಸಾತ್. ಪುಣ್ ಕರಾವಳೆಂತ್ ವಸ್ತಿ ಕರ್ಚೆಂ ಆಮಿಂ ಕೊಂಕ್ಣಿಂ ಕ್ರಿಸ್ತಾಂವ್ ಹವ್ಯಾಸಿ ಮಾಸ್ಳಿ ಪಾಗ್ಪಿಂ ಮ್ಹಣೊನ್ ಆಮ್ಕಾಚ್ಚ್ ಆಮಿ ವೊಲಾಯ್ಲ್ಯಾರ್ ಚೂಕ್ ಜಾಂವ್ಚಿ ನಾ ಕೊಣ್ಣಾ? ಕರಾವಳೆಂತ್ ವಸ್ತಿ ಕರ್ನ್ ಆಸ್ಚೊ ಚಡಾವತ್ ಲೋಕ್ ನ್ಹಯ್ ಜಾಲ್ಯಾರಿಯ್ ಹಳ್ಳೆಂತ್ಲೊ ನಂಯ್ಚ್ಯಾ ತಡಿರ್ ಯಾ ದರ್ಯಾಚ್ಯಾ ತಡಿರ್ ವಸ್ತಿ ಕರ್ನ್ ಆಸ್ಚೊ ಕೊಂಕ್ಣಿಂ ಕ್ರಿಸ್ತಾಂವ್ ಲೋಕ್ ಹವ್ಯಾಸಿ ಮಾಸ್ಳಿ ಪಾಗ್ಪಿ ಮ್ಹಣ್ಯೆತ್.

ಕರಾವಳೆಚ್ಯಾ ಕೊಂಕ್ಣಿ ಕ್ರಿಸ್ತಾಂವಾನಿಂ ವಾಪಾರ್ಚಿಂ ಸಂಪ್ರದಾಯಿಕ್ ಮಾಸ್ಳಿ ಧರ್ಚಿಂ ವಿಧಾನಾ:

ಜಾಳ್ ವೊಡ್ಚಿಂ: ಹ್ಯಾ ವಿಧಾನಾಂತ್ ಎಕಾ ದೊಣಿರ್ ಜಾಳ್ ಘೆವ್ನ್ ದೋಗ್-ತೇಗ್ ಸಾಂಗಾತಾ ಮೆಳೊನ್ ನಂಯ್ಚ್ಯಾ ಮಧೆಂ ವ್ಹಸೊನ್ ಮಾಸ್ಳಿ ಧರ್ಚೆ ಕಾಮ್ ಚಲ್ತಾ. ಆಶೆಂ ದೊಣಿರ್, ಜಾಳ್ ಘೆವ್ನ್ ಮಾಸ್ಳಿ ಧರುಂಕ್ ವೆಚ್ಯಾ ವ್ಯಕ್ತಿಂಕ್ ಜಾಳ್ ಸೊಡೊವ್ನ್ ಉಡೊಂವ್ಚ್ಯಾಂತ್, ಜಾಳ್ ವೊಡ್ಚ್ಯಾಂತ್,ದೋಣ್ ವೊಚ್ಚುಚ್ಯಾಂತ್ ತಾಂಕಾಂ ಜಾಣ್ವಾಯೆ ಸವೆಂ ಆನ್ಬೋಗಿಯ್ ಆಸೊಂಕ್ ಜಾಯ್. ಇತ್ಲೆಚ್ಚ್ ನಂಯ್ ಖಂಚ್ಯಾ ಸುವಾತೆರ್ ಗೆಲ್ಯಾರ್ ಮಾಸ್ಳಿ ಭರ್ಯಾನ್ ಲಾಭ್ತಾ ಮ್ಹಳ್ಳಿ ಮುಳಾವಿಂ ಜಾಣ್ವಾಯ್ ಆಸೊಂಕ್ ಜಾಯ್. ಥೊಡೆಂ ಪಾವ್ಟಿಂ ಆಮ್ಚೆಂ ಕೊಂಕ್ಣಿ ಕ್ರಿಸ್ತಾಂವ್ 'ಬೋಟ್' ಘೆವ್ನ್ ದರ್ಯಾ ಮಧೆಂ ವ್ಹಸೊನ್,ಜಾಳ್ ವಾಪಾರ್ನ್ ಮಾಸ್ಳಿ ಧರ್ಚ್ಯಾ ವ್ಯವಹಾರಾಕ್ ಹಾತ್ ಗಾಲ್ತಾತ್.

ಎಂಡಿಂ ವೊಡ್ಚಿಂ: ಹೆಂ ಎಪ್ರಿಲ್-ಮೇ ಯಾಚ್ಯಾ ಗಿಮ್ಶಿಲ್ಯಾ ದಿಸಾನಿಂ ಬಯ್ಲ್ಯಾಂಚ್ಯಾ ತಳ್ಯಾಂತ್ಲೆ ಉದಾಕ್ ಉಣೆಂ ಜಾವ್ನ್ ಯೆತಾನಾ, ಆಸ್ಲೆಂ ಉದಾಕ್ ಕೊದ್ವೊಳೊನ್, ತಳ್ಯಾಂಚ್ಯಾ ಕೊನ್ಶ್ಯಾಂಕ್ ಬಸ್ಲಿ ಮಾಸ್ಳಿ ಧಾವ್ಡೊನ್, ಧರ್ಚ್ಯಾ ಭೊವ್ ಸಂಪ್ರಾದಾಯಿಕ್ ವಿಧಾನ್. ಹಿಂ ಯೆಂಡಿಂ ಜಾಳಿಂತ್ ಕೆಲ್ಲೆಂ ಸಾಹೆತ್ ಜಾಲ್ಯಾರಿಯ್,ದೊನಿಯ್ ಖುಶಿನ್ ಮಟ್ವ್ಯಾ ತೆಂಕ್ಡೆಚೊ ಆಧಾರ್ ಆಸ್ತಾ. ಹೆಂ ವಿಧಾನ್ ವಾಪಾರ್ನ್ ಮಾಸ್ಳಿ ಧರ್ತಾನಾ ತಳ್ಯಾಂಚೆ ಉದಾಕ್ ಕೊದ್ವೊಳೊನ್ ಮಾಸ್ಳಿಂ ಹಿಶಿನ್-ತಿಶಿನ್ ಧಾಂವ್ಡೆಯ್ತಾನಾ ಹ್ಯಾ ಜಾಳಿತ್ ಕೆಲ್ಲ್ಯಾ ಯೆಂಡ್ಯೆಂತ್ ಮಾಸ್ಳ್ಯೊಂ ಶಿರ್ಕಾತಾತ್.ಸಾಮಾನ್ಯ್ ಜಾವ್ನ್ ೧೦-೧೨ ಜಣಾಂ ಸಾಂಗಾತಾ ಮೆಳೊನ್ ಹ್ಯಾ ವಿಧಾನಾಂತ್ ಮಾಸ್ಳಿ ಧರ್ಚೆಂ ಪ್ರಯತ್ನ್ ಕರ್ತಾತ್. 

ರಾಂಪೊಳ್ ದವರ್ಚೊ: ವಾರ್ಯಾ ಪಾವ್ಸಾಕ್ ನಂಯ್ಚೆ ಉದಾಕ್ ಭರೊನ್ ಆವ್ರ್ ತೊಡಾಕ್ ಯೆತಾನಾ ವಾ ಥೊಡೆ ಪಾವ್ಟಿ ಕೊದ್ವೊಳ್ ಜಾಲ್ಯಾ ನಂಯ್ಚ್ಯಾ ಉದ್ಕಾಕ್, ಎಕಾ ದೊರ್ಯೆಕ್ ಮಧೆಂ-ಮಧೆಂ ೧೫ ಥಾವ್ನ್ ೨೦ ಗರಿ ಬಾಂದುನ್, ತಾಕಾ ಕುಕ್ಡಾಂಚ್ಯೊ ಆನ್ಕಿಟ್ಯೊ ಶಿರ್ಕಾವ್ನ್ ದವರ್ನ್ ಮಾಸ್ಳಿ ಧರ್ಚೆಂ ವಿಧಾನ್ ಹೆಂ. ಹ್ಯಾ ವಿಧಾನಾಂತ್ ಭರ್ಲೆ ಆವ್ರ್ ನ್ಹಂಯ್ಕ್ ದೆಂವ್ತಾನಾ,ಆನ್ಕಿಟಿಂ ಖಾಂವ್ಕ್ ಆಯ್ಲ್ಯೊ ಮಾಸ್ಳ್ಯೊ ರಾಂಪೊಳಾಕ್ ಶಿರ್ಕೊನ್ ಆಸ್ತಾತ್. ಎಕೆಕ್ ರಾಂಪೊಳಾಂತ್ ೧೫ ಥಾವ್ನ್ ೨೦ ವಾ ಥೊಡೆಂ ಪಾವ್ಟಿ ತಾಚ್ಯಾಕಿಯ್ ಚಡ್ ಗರಿ ಬಾಂದುನ್ ಕುಂಕ್ಡಾಚಿ ಅನ್ಕಟಿ ಶಿರ್ಕಾವ್ನ್ ದವರ್ತಾತ್.

ಘರಿ ಗಾಲ್ಚಿಂ: ಗಾಯ್ದೊಳ್, ಸುಕ್ಟಾಂ ವಾ ಕುಕ್ಡಾಚ್ಯೊ ಆನ್ಕಿಟಿ ಶಿರ್ಕಾವ್ನ್ ಘರಿ ಗಾಲ್ನ್ ಮಾಸ್ಳಿ ಧರ್ಚೆ ವಿಧಾನ್ ಸಾಮಾನ್ಯ್ ಜಾವ್ನ್ ಆಮ್ಕಾಂ ಚಡಾವತ್ ಜಣಾಂಕ್ ಖಳಿತ್ ಆಸಾ ಮ್ಹಣ್ಯೆತ್. ದೋಣ್ ಘೇವ್ನ್ ಥೊಡೆಂ ಜಣ್ ನಂಯ್ಚ್ಯಾ ಮಧೆಂ ವ್ಹಸೊನ್ ಹೆಂ ವಿಧಾನ್ ವಾಪಾರ್ನ್ ಮಾಸ್ಳಿ ಧರ್ಚೆಯ್ ದಿಸೊನ್ ಯೆತಾ. ಥೊಡೆಂ ಪಾವ್ಟಿ ಹೆಂ ವಿಧಾನ್, ಮಾಸ್ಳೆಚೆ ಸುಟಿ ಕೆಲ್ಲೆ ಮಂಡೆಂ ಗಾಲ್ನ್ ಕುರ್ಲಿ ಧರುಂಕಿಯ್ ವಾಪಾರ್ತಾತ್. ಪುಣ್ ಹ್ಯಾ ವಿಧಾನಾಂತ್ ಸಂಯಮ್ ಭೊವ್ ಗರ್ಜೆಚೆ.

ಉಬರ್ ಮಾಸ್ಳಿಂ ಧರ್ಚಿಂ: ಜೂನ್-ಜುಲಾಯ್ ಮಯ್ನ್ಯಾಚ್ಯಾ ಜೊರಾನ್ ಯೆಂವ್ಚ್ಯಾ ಪಾವ್ಸಾಕ್ ನ್ಹಂಯ್ತ್ ಉದಾಕ್ ಭರೊನ್ ಕೊದ್ವೊಳ್ ಜಾತಾನಾ ಕೊರ್ಜಾಣೆನ್ ಮಾಸ್ಳಿ ನ್ಹಂಯ್ಚ್ಯಾ ತಡಿರ್ ಯೇವ್ನ್ ಯಾ ಗಾದ್ಯಾನಿಂ ಉಡೊನ್ ಯಾ ತೋಡಾ ದೆಗೆನ್ ಯೇವ್ನ್ ಬಸ್ತಾತ್.ಆಶೆಂ ತಡಿರ್ ಯೇವ್ನ್ ಬಸ್ಲ್ಯಾ ಮಾಸ್ಳಿ ರಾತಿಂಕ್ ಗ್ಯಾಸ್ ಲೈಟ್ ಘಾಲ್ನ್‌ಗಿ ಯಾ ಟಾರ್‍ಚ್ ಲೈಟ್ ಘಾಲ್ನ್‌ಗಿ ಸೊಧುನ್ ತಲ್ವಾರಿಂತ್ ಯಾ ಕೊಯ್ತೆತ್ ಮಾರ್ ಗಾಲ್ನ್ ಮಾಶ್ಳಿ ಧರ್ಚಿ ಆಸಾ. ಆನಿಂ ಆಶೆಂ ಧರ್ಲ್ಯಾ ಮಾಸ್ಳೆಕ್ ಉಬಾರಾಯೆಚಿ ಮಾಸ್ಳಿ ಮ್ಹಣ್ ಅಪಯ್ತಾತ್.ಉಬಾರಾಯೆಚಿ ಮಾಸ್ಳಿ ಧರ್ಚೆ ಸಾಮಾನ್ಯ್ ಜಾವ್ನ್ ಹಳ್ಳ್ಯಾನಿಂ ಬಯ್ಲಾ ತಡಿರ್ ಚಡಾವತ್ ಪಳೆಂವ್ಕ್ ಮೆಳ್ತಾ. ಉಬಾರ್ಯೆರ್ ಮಾಸ್ಳಿ ಮಾತ್ರ್ ನ್ಹಂಯ್ ಆಸ್ತಾನಾ ಕಾಸೊ,ಕುರ್ಲಿ ಮೆಳ್ಚಿಯ್ ಆಸಾ.

ಗುಳೊ ಗಾಲ್ಚೊ: ಹಾಂವ್ ಲ್ಹಾನ್ ಆಸ್ತಾನಾ ಖಡಾಪ್ ಪುಟೊಂವ್ಕ್ ಯಾ ಧರ್ನಿಚೊ ಮುರೊ ಪುಟೊಂಕ್ ವಾಪಾರ್ಚೊ ಗುಳೊಂ ನಂಯ್ಚ್ಯಾ ಉದ್ಕಾತ್ ಗಾಲ್ನ್ ಮಾಸ್ಳಿ ಧರ್ಚೆ ವಿಧಾನ್ ದಿಸೊನ್ ಯೆತಾಲೆ. ಪುಣ್ ಹೆಂ ಎಕ್ ಕಾನೂನುಬಾಹಿರ್ ವಿಧಾನ್ ಜಾಲ್ಲ್ಯಾನ್ ಆಶೆಂ ಮಾಸ್ಳಿ ಧರ್ಚೆ ವಿಧಾನ್ ಹ್ಯಾ ದಿಸಾನಿಂ ದಿಸೊನ್ ಯೆತಾ. ಹಾಚೆ ಶಿವಾಯ್ ಆಸ್ಲೆಂ ವಿಧಾನ್ ವಾಪಾರ್ತಾಲ್ಯಾಂಕ್ ಶಿಕ್ಷಾ ಆಸಾ.

ಇತ್ಲೆಂಚ್ಚ್ ನಂಯ್ ಆಸ್ತಾ,ಮ್ಹಜ್ಯಾ ಜಾಣ್ವಾಯೆ ಬಾಯ್ರ್ ಜಾಗ್ಯಾ-ಜಾಗ್ಯಾಚ್ಯಾಂ ವಿವಿಧತಾ ಪರ್ಮಾಣೆ,ವಿವಿಧ್ ಗಾಂವಾನಿಂ, ವಿವಿಧ್ ರೀತಿನ್ ಮಾಸ್ಳಿ ಧರ್ಚೆಂ ಹವ್ಯಾಸ್ ಆಮ್ಚೆ ಕರಾವಳೆಚ್ಯಾ ಕೊಂಕ್ಣಿ ಸಮುದಾಯಾಂತ್ ಆಸೊಂಕ್ ಪುರೊ. ಕಿತೆಂಯ್ ಜಾಂವ್ದಿ,ಮೊಗೊರ್ ಸಮುದಾಯಾ ಪರಿಂ ಭೋವ್ ವ್ಹಡ್ ಮಾಫಾನ್ ನಂಯ್ ಜಾಲ್ಯಾರಿಯ್.ಅಪ್ಲ್ಯಾ ಪುರ್ವಾಜಾಂ ಥಾವ್ನ್ ಆತಾಂಚ್ಯಾ ಪಿಳ್ಗೆಕ್ ಆಯ್ಲ್ಯಾ ಹ್ಯಾ ಥೊಡ್ಯಾ ಸಂಪ್ರದಾಯಿಕ್ ಮಾಸ್ಳಿ ಧರ್ಚ್ಯಾ ಸಾಹೆತಾಚ್ಯಾ ಜಾಣ್ವಾಯೆ ದ್ವಾರಿಂ ಮಾಸ್ಳಿ ಧರ್ಚೊ ಹವ್ಯಾಸ್ ಆಮ್ಚ್ಯಾ ಲೋಕಾಂ ಮಧೆಂ ದಿಸೊನ್ ಯೆತಾ. ಪಾವ್ಳಿಲ್ಲ್ಯಾ ದಿಸಾನಿಂ ಥೊಡ್ಯಾ ಪಾವ್ಟಿ ಲ್ಹಾನ್-ಲ್ಹಾನ್ ಕಾಮಾಕ್ ವೆಚ್ಯಾ ಲೋಕಾಂಕ್ ಕಾಮ್ ನಾತ್ಲ್ಯಾ ವೆಳಾಂ, ಆಶೆಂ ಮಾಸ್ಳಿ ಧರುನ್,ವಿಕುನ್ ಅಪ್ಲೊ ಪೊಟಾಚೊ ಗ್ರಾಸ್ ಜೊಡ್ಚೆಂ ಆತಾಯ್ ಜಾಲ್ಯಾರ್ ಆಮ್ಚ್ಯಾ ಹಳ್ಳೆಂನಿಂ ಆಸಾತ್ ಮ್ಹಳ್ಳೆ ಸತ್ ಜಾವ್ನಾಸಾ.

(ವಿಜಯ ಕರ್ನಾಟಕ "ಆಮ್ಚಿಂ ಕೊಂಕ್ಣಿ್"ವಿಭಾಗಾರ್ ಪ್ರಕಟಿತ್ ಬರಪ್)

ಕೊಳಲ್‌ಗಿರಿ ಪೊಸ್ಟ್: 'ತುಜೆಂ ರುಪ್ಣೆಂ' ಮನಾಂತ್ ಪಿಚಾರ್ ಜಾತಾನಾ...

ಕೊಳಲ್‌ಗಿರಿ ಪೊಸ್ಟ್: 'ತುಜೆಂ ರುಪ್ಣೆಂ' ಮನಾಂತ್ ಪಿಚಾರ್ ಜಾತಾನಾ...

'ತುಜೆಂ ರುಪ್ಣೆಂ' ಮನಾಂತ್ ಪಿಚಾರ್ ಜಾತಾನಾ...

ಕೊಂಕ್ಣಿ ಸಾಹಿತ್ಯ್ ಆನಿಂ ಸಂಗೀತ್ ವೊಡ್ತಾಂತ್ ಹ್ಯಾ ವೆಳಾ ವಸಂತ್‌ಕಾಳ್.ಎಕಾ ನಂತರ್ ಏಕ್ ಅಪೂರ್ಬಾಯೆಚ್ಯೊ ಕೊವ್ಳ್ಯೊಂ ತಶೆಚ್ ಪುಸ್ತಕ್ ಕೊನ್ಶ್ಯಾ-ಕೊನ್ಶ್ಯಾಚ್ಯಾ ತಾಲೆಂತಾ ಥಾವ್ನ್ ಕೊಂಕ್ಣಿ ವೊಡ್ತಾಂತ್ ಪುಲೊನ್ ಆಯ್ಲ್ಯಾತ್.ಪರಿಗತ್ ಆಶಿಂ ಆಸ್ತಾ ಕೊಂಕ್ಣೆಕ್ ಭಾಂಗಾರಾಚೊ ಪುಡಾರ್ ಆಸಾ ಮ್ಹಣ್ ಜಾಲೆಂ.ಕೊಂಕ್ಣಿ ಸಂಗೀತ್ ವಿಶಿಂ ಸಾಂಗ್ಚೆ ತರ್ ಏಕ್ ಕಾಳ್ ಆಸ್‌ಲ್ಲೊ, ಸಂಗೀತ್‌ಗಾರಾನಿಚ್ ಅಪ್ಣಾಚ್ಯಾಚ್ ಉತ್ರಾಂಕ್ ತಾಳೆಂ ಬಸೊವ್ನ್ ಸಂಗೀತ್ ನಿರ್ದೇಶಕ್ ಮಾರಿಫಾತ್ ಸಂಗೀತ್ ಸಜವ್ನ್ ಕೊವ್ಳೆಂ ಮುಕಾಂತ್ರ್ ರಸಿಕಾಂಚ್ಯಾ ಹಾತಿಕ್ ಪಾವಂವ್ಚೊ. ಪುಣ್ ಆರ್ವಿಲ್ಯಾ ದಿಸಾನಿಂ ಫರ್ಜಳ್ಚೆಂ ತಾಲೆಂತ್‌ವೊಂತ್ ತರ್ನೆ ಸಂಗೀತ್‌ಕಾರ್ ಅಪ್ಣಾಚ್ಯಾ ಉತ್ರಾಂ ಸಾಂಗಾತಾ ಕೊಂಕ್ಣಿ ಕವಿಂಚ್ಯಾ ಕಾವ್ಯಾಳ್ ಉತ್ರಾಂಕ್ ತಾಳೊ  ಬಸವ್ನ್ ಸಂಗೀತ್ ರೂಪ್ ದೀವ್ನ್ ರಸಿಕಾಚ್ಯಾಂ ಕಾನಾಂ ಭೊವಾರಿ ವಾಳಾಶೆಂ ಕರ್ತಾತ್. ದೆಕುನ್ ಆಜ್-ಕಾಲ್ ಕೊಂಕ್ಣಿ ಸಂಗೀತಾಚೆ ಟ್ರೆಂಡ್ ಬದಲ್ಲಾ.ಆಜ್ ಮಟ್ಟಾಚ್ಯಾ ಸಂಗೀತಾ ಸವೆಂ ಗ್ರೇಸ್ತ್ ಕಾವ್ಯಾಳ್ ಉತ್ರಾಂಯಿ ಆಮ್ಚ್ಯಾ ಕಾನಾಂ ಭೊಂವಾರಿ ವಾಂಜ್ತಾತ್. 

'ಸಂಗೀತ್' ಮ್ಹಣ್ತಾನಾ ಹರ್ಯೆಕ್ಲಾಚೆ ಆಭಿರುಚೆ ಪರ್ಮಾಣೆ ವೆವೆಗ್ಳೆಂ ವ್ಯಾಕ್ಯಾನ್ ಆಸಾ.ಮ್ಹಾಕಾಯ್ ಮ್ಹಜಿಚ್ ಆಭಿರುಚ್ ಆಸಾ.ತಶೆಂ ಮ್ಹಣೊನ್ ಏಕ್ ಸಂಗೀತ್ ವಾ ಗಾಯಾನ್ ವಿಮರ್ಸೊ ಕರುಂಕ್ ಹಾಂವ್ ಕಾಂಯ್ ಸಂಗೀತ್‌ಕಾರ್ ನ್ಹಯ್. ಜಶೆಂ ಏಕ್ ವಾಂಚ್ಪಿ ಸಾಹಿತಾಚೊ ಖರೊ ವಿಮರ್ಶಕ್,ಜಶೆಂ ಸಂಗೀತಾ ವಿಶಿಂ ಹಾಂವ್ ಏಕ್ಲೊ ಆಭಿರುಚ್ ಆಸ್ಲೊ ಆಯ್ಕೊಪಿ. ಮ್ಹಾಕಾ ವಾಜಾಂತ್ರಾಚೆ ಸಂಗೀತ್‌ಚ್ ಚಡ್ ಆಸೊನ್ ಗಾಯಾನಾಂತ್ ಆನಿಂ ಉತ್ರಾಂತ್ ಸ್ವಷ್ಟತಾ ನಾ ಜಾಲ್ಯಾರ್ ತಸ್‌ಲ್ಲೆಂ ಸಂಗೀತ್ ಮ್ಹಾಕಾ ಆಂವಡ್ನಾ. ಕಿತ್ಯಾಕ್ ಸಂಗೀತಾ ಸಾಂಗಾತಾ ಗಾಯಾಕ್/ಗಾಯಿಕಾಚೊ ತಾಳೊ ಆನಿಂ ಉತ್ರಾಂಚಿ ಗೊಡ್ಸಾಣ್ ಚಾಕ್ಚೊ ಆಯ್ಕೊಪಿ ಹಾಂವ್. ಏಕ್ ಕೊವ್ಳಿ ಮ್ಹಣ್ತಾನಾ ತಿಂ ಕೊವ್ಳಿ ಸಂಗೀತ್ ರಸಿಕಾಂಕ್ ಪರತ್-ಪರತ್ ವೋಡ್ನ್ ಹಾಡ್ನ್ ಆಯ್ಕೊಚ್ಯಾ ಪರಿಂ ಕರಿಜೆಯ್.ತಿಂ ವಾಂಜ್ತಾನಾ ಸೆಜಾರ್ಚ್ಯಾಕಿಯ್ ಮಧುರತಾ ಭೊಗೊನ್ ಪಿಸೊಳೆಂ ಮಕರಂಧ್ ಸೊಧುನ್ ಆಯ್ಲೆಪರಿಂ ಖಂಚಿ ಕೊವ್ಳಿ? ಮ್ಹಣ್ ವಿಸಾರುಂಕ್ ಯೆಜೆಯ್.ಜರ್ ಉತ್ರಾಂಚಿ ಸ್ವಷ್ಟಾತಾ ನಾಸ್ತಾನಾ ಆರ್ಟಿಫಿಶಿಯಲ್ ಸಂಗೀತಾ ಮಧೆಂ ತಾಳೊ ಬುಡೊನ್ ಸಂಗೀತ್ ಕಚ್ರೊಂ ಜಾಲ್ಯಾರ್ ತಸ್ಲೆಂ ಸಂಗೀತ್ ಆಸ್ವಾದನ್ ಕರುಂಕ್ ಜಾಯ್ತ್?.

ಆಶೆಂ ಆಭಿರುಚೆ ವಿಶಿಂ ಉಲಯ್ತಾನಾ ಪಾಟ್ಲ್ಯಾ ದಿಸಾನಿಂ ಕಾವ್ಯಾಳ್ ಉತ್ರಾನಿಂ ನೆಟೆಯ್ಲಿ,ಸುಂದರ್ ಸಂಗೀತಾಂತ್ ಸೊಭಾಯ್ಲಿ.ಉತ್ರಾಂ ಸಾಂಗಾತಾ ಗಾಯಾಕ್/ಗಾಯಿಕಾಚ್ಯಾ ತಾಳ್ಯಾಂತ್ ಸ್ವಷ್ಟಾತಾ ಆಸ್ಲಿಂ 'ತುಜೆಂ ರುಪ್ಣೆಂ' ಕೊವ್ಳಿಂ ಉಜ್ವಾಡಾಕ್ ಯೇವ್ನ್  ಮ್ಹಾಕಾ ಆಂವಡ್ಲ್ಯಾ ಸಭಾರ್ ಕೊವ್ಳ್ಯಾಂ ಪಯ್ಕೆತ್ಲಿಂ ಏಕ್ ಕೊವ್ಳಿಂ ಜಾಂವ್ಕ್ ಪಾವ್ಲ್ಯಾ.ದೋಗ್ ಕೊಂಕ್ಣೆತ್ಲೆ ಕವಿ ಆನಿಲ್ ಪೆರ್ನಾಲ್ ಆನಿಂ ವಿಲ್ಫ್ರೇಡ್ ಆರ್.ಪಾಂಗ್ಳಾ ಹಾಂಚ್ಯಾ ಕಾವ್ಯಾಳ್ ಉತ್ರಾಂಕ್ ಸಂಗೀತ್‌ಕಾರ್ ಮರಿಯಾನ್ ಪೆರ್ನಾಲಾನ್ ತಾಳೆಂ ಬಸೊವ್ನ್ ತೆಗಾಂಚ್ಯಾ ಸಾಂಗಾತ್ಪಾಣಾಖಾಲ್ ಘಡ್ಲ್ಯಾ '3 ಸೋಜಾಸ್' ಬೊಂದೆರಾಖಾಲ್ ಉಜ್ವಾಡಾಕ್ ಆಯಿಲ್ಲಿಂ ದುಸ್ರಿಂ ಕೊವ್ಳಿಂ ಹಿಂ. ಚಾರ್ ವರ್ಸಾಂ ಪುಡೆಂ 'ತುಜೆಂ ಚರಣಿ' ಮ್ಹಳ್ಳಿಂ ಏಕ್ ಧಾರ್ಮಿಕ್ ಗೀತಾಂಚಿ ಕೊವ್ಳಿ ಹಾಣಿಂ ಉಜ್ವಾಡಾಕ್ ಹಾಡ್ಲೆಲಿ ಆಸಾ. ಹ್ಯಾ ಶಿವಾಯ್ ಕವಿ ಆನಿಲ್ ಪೆರ್ನಾಲ್ ಆನಿಂ ವಿಲ್ಫ್ರೇಡ್ ಆರ್.ಪಾಂಗ್ಳಾ'ಚಿ ಕಾವ್ಯಾಳ್ ಉತ್ರಾಂ ಸಭಾರ್ ಕನ್ನಡ ಧಾರ್ಮಿಕ್ ಕೊವ್ಳಿನಿಂ ತಶೆಂಚ್ ಕೊಂಕ್ಣಿ ಭಾವ್‌ಗೀತ್ ಕೊವ್ಳೆನಿಂ ಪೊದಾಂ ರೂಪಾರ್ ಯೇವ್ನ್ ಸಂಗೀತ್ ರಸಿಕಾಚ್ಯಾಂ ಮನಾಂತ್ ಪಿಚಾರ್ ಜಾಲ್ಯಾತ್.

"ತುಂ ಯೇ ಮ್ಹಜೆ ಜಿಣ್ಯೆ೦ತ್, ಫಾ೦ತ್ಯಾ ದೊವಾಬರಿ೦

ಥ೦ಡಾಯ್ ಭರುನ್ ರಾವ್ ಸದಾ೦ ಕಾಳ್ಜಾವೆರಿ೦.

ಪೆರಾ೦ಕ್ ಸೊಧ್ಚ್ಯಾ ಕೀರಾಬರಿ೦, ತಡಿಕ್ ವೆ೦ಗ್ಚ್ಯಾ ಲ್ಹಾರಾ೦ಬರಿ೦

ತು೦ ಯೇಗೋ..............ತು೦ ಯೇಗೋ

ಜಿಣಿಯೆ೦ತ್ ಮ್ಹಜ್ಯಾ ಕಿರ್ಣಾ ಬರಿ೦"

ಕೊವ್ಳೆತ್ಲೆಂ ಪುಡ್ಲೆಂ 'ತು ಯೇಗೊ' ಪೊದಾಚೆ ಕವಿ ಆನಿಲ್ ಪೆರ್ನಾಲಾಚಿ ಕಾವ್ಯಾಳ್ ಉತ್ರಾಂ ಹಿಂ. ಉತ್ರಾಂ ವಾಂಚ್ತಾನಾಚ್ ಥೊಡಿಂ ಪ್ರತಿಕಾಂ ದೊಳ್ಯಾಂ ಮುಕಾರ್ ಉಭಿಂ ಜಾತಾತ್. ಹ್ಯಾ ಅಪುರ್ಬಾಯೆಚ್ಯಾ ಉತ್ರಾಂಕ್ ಪ್ರಜೋತ್ ಡೆಸಾ'ನ್ ಗಾವ್ನ್ ಉತ್ರಾಚಿಂ ಗ್ರೇಸ್ತ್‌ಕಾಯ್ ಅಪ್ಲ್ಯಾ ತಾಳ್ಯಾಂತ್ ಅಪುರ್ಬಾಯೆನ್ ಸೊಬಯ್ಲಾ

"ತವಳ್ ದೀಸ್ ಕಿತ್ಲೆ ಉರ್ಭೆಚೆ ಅಸ್‌ಲ್ಲೆ, ಖುಶೆನ್ ಮಜೆನ್ ಮಸ್ತೆನ್ ಆಮಿ೦ ಸಾರ್‌ಲ್ಲೆ

ಕಾ೦ಟ್ಯಾ೦-ಖು೦ಟ್ಯಾ೦ಚಾ ಫಾತ್ರಾಟಿ ವಾಟೆರ್, ರಿತ್ಯಾ ಪಾ೦ಯಾನಿ೦ ಮಸ್ತುನ್ ಕಾಡ್‌ಲ್ಲೆ

ಪಾವ್ಸಾ ವ್ಹಾಳೊ ಧರ್ತೆಕ್ ದೆ೦ವ್ತಾನಾ, ಅ೦ಗ್ಣಾ೦ತ್ ಆ೦ಗ್ ದೀವ್ನ್ ನಾಚ್‌ಲ್ಲೆ"

ದೊತೊರ್ ಪ್ರಶಾಂತ್ ರಾಜಾಚ್ಯಾ ತಾಳ್ಯಾಕ್ ಖಂಚಾಯ್ ರೀತಿಚ್ಯಾ ಉತ್ರಾಂಕ್ ಜೀವ್ ದಿಂವ್ಚೊ ಆಪೂರ್ವ್ ಸಕತ್ ಆಸಾ.ಹ್ಯಾ ಕೊವ್ಳೆಂತ್ ಹಾಣಿಂ ಗಾಯ್ಲೆಲೆಂ ಆನಿಲಾಚಿ ವಯ್ಲಿಂ ಉತ್ರಾಂ ಆಟಾಪ್ಚೆಂ ಪೋದ್ 'ಭುರ್ಗ್ಯಾಪಣಾಂ' ಸರೊನ್ ಗೆಲ್ಲೆಂ ಲ್ಹಾನ್‌ಪಣಾಲೆಂ ದೀಸ್ ದೊಳ್ಯಾಂ ಮುಕಾರ್ ಪಾಶಾರ್ ಜಾಲ್ಲ್ಯಾ ತಶೆಂ ಪಿಂತ್ರಾಯ್ತಾ.

"ಕಾ೦ಟ್ಯಾ ಝಡಾ೦ ಮಧೆ೦ ಫುಲ್‌ಲ್ಲೊ

ಸೊಭಾಯೆಕ್ ನಾ ಕೊಣಿ೦ ಮಿಕ್ವಾಲ್ಲೊ

ವಿಶೇಶ್ ಸುವಾಸಾನ್ ಭರ್‌ಲ್ಲೊ

ಗುಲೊಬ್ ತು೦ ಆಮ್ಚಾ ವೊಡ್ತಾ೦ತ್ಲೊ"

ಭುರ್ಗ್ಯಾಚಿಂ ಪೊದಾಂ ಆಜ್-ಕಾಲ್ ಆಯ್ಕೊಂಕ್ ಮೆಳಾನಾಂತ್. ಮ್ಹಜ್ಯಾ ಉಡಾಸಾ ಪರ್ಮಾಣೆ ಆಮರ್ ವಿಲ್ಪಿ ರೆಬಿಂಬಸಾಚ್ಯಾ ಆನಿಂ ಮೆಲ್ವಿನ್ ಪೆರಿಸಾಚ್ಯಾ ಕೊವ್ಳೆನಿಂ ಭುರ್ಗ್ಯಾನಿಂ ಗಾಯ್ಲೆಲಿಂ ಪೊದಾಂ ಕೊವ್ಳೆಕ್ ಸೊಭಾಯ್ ದಿತೆಲಿಂ.ಕವಿ ಲೊಯ್ಡ್ ರೇಗೊ ತಾಕೊಡೆನ್ ಥೊಡ್ಯಾಂ ವರ್ಸಾ ಆದಿಂ ಭುರ್ಗ್ಯಾಚಿಚ್ ಏಕ್ ಕೊವ್ಳಿಂ ಕಾಡ್ಲೆಲಿ ಆಸಾ.ಪುಣ್ ಹ್ಯಾ ದಿಸಾನಿಂ ಭುರ್ಗ್ಯಾಚಿಂ ಪೊದಾಂ ಆಸ್ಲ್ಯೊ ಕೊವ್ಳ್ಯೊಂ ಉಡಾಸಾಕ್ ಹಾಡುಂಕ್ ಪ್ರಯತನ್ ಕೆಲ್ಯಾರಿಯ್ ಉಡಾಸಾಕ್ ಯೆನಾತ್.ತಶೆಂ ಆಸ್ತಾನಾ ಹ್ಯಾ ಕೊವ್ಳೆಂತ್ ಆಸಾ ಏಕ್ ಭುರ್ಗ್ಯಾನ್ ಗಾಯ್‌ಲೆಂ ಗೀತ್ 'ಗುಲೊಬಾ'. ಹ್ಯಾ ಗೀತಾಕ್ ಉತ್ರಾಂ ಬರಯ್ಲ್ಯಾತ್ ವಿಲ್ಫ್ರೇಡ್ ಆರ್.ಪಾಂಗ್ಳಾ'ನ್ ತರ್ ತಾಳೊ ಮೆಳೆಯ್ಲಾ ಬಾರ್ಕುರ್ಚೆ ನ್ಹೆಣ್ತುಲೆಂ ಸ್ವಸ್ತಿಕಾ ಆಮಿನಾನ್.

"ಕಳ್ಯಾ೦ಕ್ ಸೊಭಾಯ್, ಫುಲೊನ್ ಆಯ್ಲ್ಯಾರ್

ದರ್ಯಾಕ್ ಸೊಭಾಯ್, ಲಾರಾ೦ ತಿ೦ ಉಟ್ಲ್ಯಾರ್

ಚ೦ದ್ರಾಕ್ ಸೊಭಾಯ್, ಅ೦ದ್ಕಾರ್ ದಾ೦ವ್ಲ್ಯಾರ್

ಮ್ಹಕಾ ಸೊಬಾಯ್ ತುಜೊ ಸಾ೦ಗಾತ್ ಲಾಭ್ಲ್ಯಾರ್"

ಕಳೊ ಪುಲನಾ ತರ್ ಪುಲಾಂಕ್ ಖಂಯ್ ಸೊಭಾಯ್? ಲ್ಹಾರಾ ವಿಣೆಂ ದರ್ಯಾಕ್ ಸೊಭಾಯ್ ಆಸಾ? ಮ್ಹಾಕಾ ಆಮರ್ ವಿಲ್ಪಿಚ್ಯಾ ಪೊದಾಚೊ ಫರ್ಮಳ್ ದಿಲ್ಲೆಂ ಗೀತ್ ಹೆಂ. ಕೊವ್ಳೆಂತ್ ವಿಲ್ಫ್ರೇಡ್ ಆರ್.ಪಾಂಗ್ಳಾ' ಉತ್ರಾಂಕ್ ವಿಯೊನ್ನಾ ಕಾರ್ಡೊಜಾಚೊ ತಾಳೊ ಆಸಾ.

ಕೊವ್ಳೆಂತ್ ಆನಿಂ ಆಟ್ ಪೊದಾಂ ಆಸೊನ್ ಉತ್ರಾಚಿಂ ಗ್ರೇಸ್ತ್‌ಕಾಯ್,ಸರಿಂ ಜಾಲ್ಲೆಂ ತಾಳೆಂ ಆನಿಂ ಸಂಗೀತ್ ಸರ್ವ್ ಗೀತಾನಿಂ ಝಳ್ಕತಾ.ಹರ್ಯೆಕ್ ಪೊದಾನಿಂ ವಿಭಿನ್ನತಾ ಅಸೊನ್ ಕೊಂಕ್ಣೆತ್ ಎದೊಳ್‌ಚ್ ಆಪ್ಲೊಚ್ ಜಾಗೊ ಕೆಲ್ಲ್ಯಾ ಗಾಯಾಕ್-ಗಾಯಿಕಾನಿಂ ಗಾಯ್ಲೆಂ ಆಸಾ. ರೋನಿ ಕ್ರಾಸ್ತಾ ಆನಿಂ ಝೀನಾ ಪಿರೇರಾ ಜೊಡ್ಯಾನ್ 'ಫೇಸ್‌ಬುಕ್ ಚ್ಯಾಟಿಂಗ್' ಆನಿಂ ಹಾಸ್ಚೆ-ಉಡ್ತೆಂ ಪೋದ್ 'ಬೊಂಬ್ಲಿವಾಲಿಂ' ಗಾಯ್ಲೆಲೆಂ ಆಸೊನ್, 'ಬೊಂಬ್ಲಿವಾಲಿಂ' ಡಿಜೆ ಡ್ಯಾನಿಂ ಆನಿಂ ಡಿಜೆ ರೋಶ್ ಹಾಣಿಂ ಡಿಜೆ ವರ್‍ಶನ್ ಕೆಲಾಂ. ಹಾಂವೆ ಪಯ್ಲೆ ಪಾವ್ಟಿ ಆಯ್ಕಾಲ್ಲ್ಯಾನ್ ಜಾಯ್ಜೆಯ್ 'ಸಮ್ಜಾನಾ'ಪೋದ್ ಗಾಯ್ಲ್ಯಾ ಮರಿಯಾನಾಚೊ ತಾಳೊ ಮ್ಹಾಕಾ ವಿಶಿಷ್ಟ್ ಆನ್ಭೋಗ್ ದಿಲೊ ತರ್ ಹಾಣಿಂ ಕ್ಯಾರಲ್ ದಾಂತಿ ಸಾಂಗಾತಾ ಹಾಣಿಂ ಗಾಯ್ಲೆಲೆಂ 'ಜಲ್ಮಾಚೊ ದಿಸ್'ಕೊಂಕ್ಣೆಂತ್ ಜಲ್ಮಾ ಶುಭಾಶಯ್ ಪಾಟೊಂವ್ಕ್ ಜೊಕ್ತೆಂ ಪೋದ್ ಜಾವ್ನ್ ರೂಪಿತ್ ಜಾಲಾ. ಪ್ರಕಾಶ್ ಸೋಜ್ ಆನಿಂ ಝೀನಾ ಪಿರೇರಾನ್ ಗಾಯ್ಲೆಲೆಂ ಹ್ಯಾ ಕೊವ್ಳೆಂತ್ಲೆಂ 'ಜಮ್ಲ್ಯಾಂತ್ ಹಾಂಗಾ' ಪೋದ್ ಮುಕ್ಲ್ಯಾ ದಿಸಾನಿಂ ಲಗ್ನಾ ಸಾಲಾಂತ್ ಖಂಡಿತ್ ಜಾವ್ನ್ ಸೊಭ್ತೆಲೆಂ ತರ್ ದೊತೊರ್ ಪ್ರಶಾಂತ್ ರಾಜಾನ್ ಗಾಯ್ಲೆಲೆಂ ಆನ್ಯೇಕ್ ಪೋದ್ 'ತುಜೆ ಖಾತಿರ್‌ಗೊ' ಗೀತ್ ಚಲಿಯೆಚ್ಯಾ ರೋಸಾ ಮಟ್ವಾಂತ್. 'ಆಶಿ ಏಕ್ ಆಶಾ' ಮೊಗಾ ಭೊಗ್ಣಾಂಚೆ ಪೋದ್ ಆಶ್ವಿನ್ ಡಿ'ಕೊಸ್ಟಾನ್ ಅಪ್ಲ್ಯಾ ಗೊಡ್ಸಾಣೆಚ್ಯಾ ತಾಳ್ಯಾಂತ್ ಸುಂರ್ಗಾರಾಯ್ಲ್ಯಾ ತರ್ ಮಹಮ್ಮದ್ ಇಕ್ಬಾಲ್ ಗಾಯ್ಲೆಲೆ 'ರಹಿನಾ' ಪೊದ್‌ಯಿ ಅಪುರ್ಬಾಯೆಚೆ.

ಸಂಗೀತ್ ನಿರ್ದೇಶಕ್ ರೋಶನ್ ಸೋಜ್ ಆಂಜೆಲೊರ್ ಹಾಂಚ್ಯಾ ಸಂಗೀತಾನ್ ಸಜಯ್ಲಿ ಸಂಗೀತ್ ಗುರು ಜೊಯೆಲ್ ಪಿರೇರಾಚ್ಯಾ ಗುರ್ಕಾಲ್‌ಪಣಾಖಾಲ್ ಸಂದೇಶಾ ಸ್ಟುಡಿಯೊಂತ್ ಮುದ್ರಿತ್ ಜಾಲ್ಲ್ಯಾ ಹ್ಯಾ ಕೊವ್ಳೆನ್ ಸಂಪೂರ್ಣ್ 12+1 ಪ್ಯಾಕೆಜಿಚೆ ಕಾವ್ಯಾಳ್ ಉತ್ರಾಚೆಂ ಸಂಗೀತ್, ರಸಿಕಾಂಕ್ ಪಾವೊವ್ಚೆಂ ಪ್ರೇತನ್ ಕೆಲಾಂ. ಧಾರ್ಮಿಕ್ ಕೊವ್ಳೆಂ ಉಪ್ರಾಂತ್ '3 ಸೊಜಾಸ್' ಪುಡಾರ್ಯಾನಿಂ ಪಯ್ಲೆಂ ಪಾವ್ಟಿ ಕೊಂಕ್ಣಿ ಭಾವ್‌ಗೀತ್ ಕೊವ್ಳಿಂ ಸಂಗೀತ್ ವೊಡ್ತಾಕ್ ಕಾಣಿಕ್ ಜಾವ್ನ್ ದಿಲ್ಲ್ಯಾಕ್ ಆಭಿನಂದನ್. ಸಂಗೀತ್ ರಸಿಕಾನಿಂ ಕೊವ್ಳೆತ್ಲಿಂ ಪೊದಾಂ ನಕ್ಕಲ್ ಕರ್ನ್ ಆಯ್ಕಾನಾಸ್ತಾನಾ ಘಡ್ಣಾರಾಚ್ಯಾ ಮ್ಹಿನತೆಕ್ ಮಾನ್ ದೀವ್ನ್ ಮೊಲಾಕ್ ಘೆವ್ನ್ ಆಯ್ಕಾಜೆಯ್ ಮ್ಹಳ್ಳಿಂ ವಿನೊವ್ಣಿ.ಸಾಂಗಾತಾಚ್ '3 ಸೊಜಾಸ್' ಪುಡಾರ್ಯಾ ಥಾವ್ನ್ ಪುಡ್ಲ್ಯಾ ದಿಸಾನಿಂ ಅಪುರ್ಬಾಯೆಚ್ಯೊ ಕೊವ್ಳ್ಯೊಂ ಉಜ್ವಾಡಾಕ್ ಯೆಂವ್ದಿತ್ ಮ್ಹಳ್ಳಿಂ ಆಭಿಲಾಷಾ.

('ಉಜ್ವಾಡ್' ಪತ್ರಾರ್ ಪ್ರಕಟಿತ್ ಕೊವ್ಳಿ ವಿಶ್ಲೇಷಣ್)

ನಿದೊಂಕ್ ನಾತ್ಲ್ಯೊಂ ರಾತಿಂ

1

ಸ್ವಪ್ಣಾಂ ಆಸಾತ್

ರಾಸ್ ಭರ್

ಪುಣ್...

ಪಳೆಂವ್ಕ್ ಮಾತ್ರ್

ನಾ ನೀದ್..

2

ಆಮ್ಕಾಂ ನಿದೊಂಕ್

ನಾತ್ಲ್ಯೊO ರಾತಿಚ್ ಚಡ್

ಭೆಂ ಹರ್ಯೇಕ್

ಘಡಿ ಯೇವ್ನ್

ಗಳೊ ಚಿರ‍್ಡಿತಾ..

ಆಮಿಂ ವ್ಹಳ್ವಳ್ಚೆಂ ಮಾತ್ರ್...

ಲಗಾಡ್  ಕಾಡುಂಕ್

ತಾಕಾಯ್ ನಾಕಾ...

3

ಆಮಿ ವಿಶೆವ್ ಘೆಂವ್ಕ್

ದಿಸಾಕ್ ರಾಕ್ಚೆಂ

ಆನಿಂ ಸ್ವಪ್ಣಾಂ ಪಳೆಂವ್ಕ್

ಸಮೇತ್...

4

"ಆಮಿಂ

ಸ್ವಪ್ಣಾಂ ಪಳೆಂವ್ಕ್ ಚ್

ದಿಸಾಚೆ ನಿದ್ಚೆಂ...

ರಾತಿಕ್ ಆಮಿ

ತಾಂಚಿಂ ಸ್ವಪ್ಣಾಂ

ಸತ್ ಕರ್ಚೆಂ

ಆಮ್ಚಿಂ ಸ್ವಪ್ಣಾಂ

ಸತ್ ಜಾಯ್ನಾತ್

ತಾಂಚಿ ಸ್ವಪ್ಣಾಂ

ಆಮ್ಚೆಂ ಥಾವ್ನ್ ಸತ್"

5

ಆತ್ಮೊ ಮ್ಹಜೊ

ಕೆದಾಳಾಗಿಯ್ ಮೆಲಾಂ

ಆತಾಂ ಸ್ವಾಸ್ ಆಸ್ಲ್ಯಾ

ಮೊಡ್ಯಾನ್ ಮಾತ್ರ್

ತಾಚೆ ಸಂಗಿಂ ನಿದ್ಚೆಂ ...

ಜಾಗೆಂ ರಾವೊನ್...

ಆಮಿ ದೊಗಿ ಸೆಜಾರಾ ಆನಿಂ ದಾಯ್ಜಿಟಿವಿ’ಚೆರ್ ಹೆರ್ ಕೊಂಕ್ಣಿ ಕಾರ್ಯಕ್ರಮಾಂ

ಕಥೊಲಿಕ್ ಕೊಂಕ್ಣಿ ಸಮುದಾಯಾಂತ್ ಕುರ್ಲ್ಯಾ ಜಾತಿಚೆ ಚಡ್‌ಚ್ ಆಸ್ಲ್ಯಾನ್ ಆಮ್ಚಿಂ ಸಂಘಟನಾಂ ಯಾ ಸಂಸ್ಥ್ದೆ ಚಡ್ ತೆಂಪಾಕ್ ಬಳ್ವನಾಂತ್ ಮ್ಹಣ್ತೆಲ್ಯಾಂಕ್ ಲಜೆಕ್ ಗಾಲ್ಚ್ಯಾಪರಿಂ ಮಾಧ್ಯಮ್ ಶೆತಾಂತ್ ಕ್ರಾಂತಿ ಕೆಲ್ಲೆಂ ಜಾವ್ನಾಸಾ ದಾಯ್ಜಿವಲ್ಡ್.ಕೊಮ್ ಮಾಧ್ಯಮ್ ಸಂಸ್ಥ್ಯಾನ್. ಸುರ್ವೆರ್ ಬೆಳ್ಮಣ್ ನಂದಳಿಕೆಚ್ಯಾ ವಾಲ್ಟರ್ ಸೋಜಾಚ್ಯಾ ಲ್ಹಾನ್‌ಶಾ ಭ್ಲೋಗಾ ಥಾವ್ನ್ ಆರಂಭ್ ಜಾಲ್ಲೆಂ ಆವಿಭಜಿತ್ ಮಂಗ್ಳುರ್ ಕಥೊಲಿಕ್ ದಾಯ್ಜ್ಯಾಚೆ ಮಾಧ್ಯಮ್ ಉಪ್ರಾಂತ್ ದಾಯ್ಜಿವಲ್ಡ್.ಕೊಮ್ ನಾಂವಾರ್ ಜಾಳಿಜಾಗ್ಯಾಚಾ ಮಾಧ್ಯಮ್ ಶೆತಾಂತ್ ನಾಂವ್ ಜೊಡುಂಕ್ ಪಾವ್‌ಲೆ.ಹಾಚೆ ಉಪ್ರಾಂತ್ ಕರ್ನಾಟಕ ಥಾವ್ನ್ ಉಜ್ವಾಡಾಕ್ ಯೆಂವ್ಚೆ ಏಕ್ ಮಾತ್ರ್ ಇಂಗ್ಲೀಷ್ ಭಾಷೆಚೆ ಹಪ್ತ್ಯಾಳೆ ಪತ್ರ್ 'ದಾಯ್ಜಿವಲ್ಡ್ ವಿಕ್ಲಿ' ಸುರ್ವಾತ್ ಕರುನ್ ಆಜೂನ್ ಯಶಸ್ವೆನ್ ಫಾಯ್ಸ್ ಕರ್ಚಿ ಕೀರ್ತ್ ಆಮ್ಚ್ಯಾಚ್ ದಾಯ್ಜಿ ಸಂಸ್ಥ್ಯಾಕ್ ಫಾವೊ ಜಾತಾ. ಅಪುರ್ಬಾಯೆಚೊ ಪಯ್ಶಿಲೊ ದಿಷ್ಟಾವೊ ದವರ್ನ್ ಸುರ್ವಾತ್ ಕೆಲ್ಲ್ಯಾ ದಾಯ್ಜಿವಲ್ಡ್ 24x7 ಟಿವಿ ಚಾನೆಲಾಕ್ ಎದೊಳ್‌ಚ್ ಪ್ರಾಯ್ ಏಕ್ ಉತ್ರಾಲ್ಯಾ.ಸಾಂಗ್ಲ್ಯಾ ಬರಿಂ ಹ್ಯಾ ಸರ್ವ್ ಮಾಧ್ಯಮಾಚ್ಯಾ ಆನಿಂ ಸಂಸ್ಥ್ಯಾಚಾ ಪಾಟಿಂ ಆಸ್ಚೆಂ ವ್ಯಕ್ತಿ ಸಾಹಿತ್ಯಾತ್ ಹೆಳ್‌ಲೆ.ಸರ್ವ್ ಸಾಹಿತಿಕ್ ಮಿತ್ರಾಕ್ ಎಕ್ಟಾಯ್ ಕರುನ್ ಸ್ಥಾಪನ್ ಕೆಲ್ಲೆಂ 'ದಾಯ್ಜಿ ದುಬಾಯ್' ಆನಿಂ ಹಾಚೆ ಕೊಂಕ್ಣಿ ನಾಟಕ ಪಾಸತ್ ಮಿಸಾಂವ್ ದಿಂವ್ಚೆ ಸಹಸಂಘಟನ್ ದಾಯ್ಜಿ 'ರಂಗ್‌ಮಂದಿರ್' ಹಾಂಚ್ಯಾ ಪಾಟಿಚೊ ಕಣೊ. ಕ್ರಿಸ್ತಾಂವ್ ಮಾಧ್ಯಮಾ ನಾಂತ್,ಕ್ರಿಸ್ತಾಂವಾಕ್ ಮಾಧ್ಯಮಾ ಜಾಯ್ ಮ್ಹಣ್ಚಿಂ ಬೋಬ್ ದಾಯ್ಜಿ ಮಾಧ್ಯಮ್ ಸಂಸ್ಥ್ಯಾನ್ ಥಾಂಬಯ್ಲಾ.

ಆಮ್ಚಿಂ ಟಿವಿ-ಆಮ್ಚಿಂ ಕಾರ್ಯಕ್ರಮಾಂ:

ಕೊಂಕ್ಣಿ ಪತ್ರಾಂ, ಕೊಂಕ್ಣಿ ಜಾಳಿಜಾಗೆಂ, ಕೊಂಕ್ಣಿ ಸಂಗೀತ್ ಆನಿಂ ಭೋವ್ ಪ್ರಮುಕ್ ಜಾವ್ನ್ ಕೊಂಕ್ಣಿ ಸಾಹಿತ್ಯ್ ಜಾಯ್ ಪುರ್ತೆ ಜಾವ್ನ್ ಕೊಂಕ್ಣಿ ಲೋಕಾಂಕ್ ಲಾಭ್ಚ್ಯಾ ಅರ್ವಿಲ್ಯಾಂ ದಿಸಾನಿಂ ಕೊಂಕ್ಣಿ ದೃಶ್ಯ್ ಮಾಧ್ಯಮಾಚೆ ಸವಾಲ್ ಯೆತಾನಾ ಜವಾಬ್ ದಿಂವ್ಕ್ ಉಣೆಂಪಣೆ ದೊಸ್ತಾಲೆ.ಪುಣ್ ಪಾಟ್ಲ್ಯಾ ಏಕಾ ವರ್ಸಾ ಥಾವ್ನ್ ದೃಷ್ಯ್ ಮಾಧ್ಯಮಾಂತ್ ಕೊಂಕ್ಣೆಕ್ ಭೊಗ್‌ಲೆ ಉಣೆಂಪಣ್ ದಾಯ್ಜಿವಲ್ಡ್ 24x7 ಚಾನೆಲಾನ್ ಭರ್ತಿ ಕೆಲಾ ಮಾತ್ರ್ ನ್ಹಯ್ ಕೊಂಕ್ಣೆಕ್ ವೆಗ್ಳೊಚ್ ಭೊವಾರ್ ರೂಪಿತ್ ಕೆಲಾ.ಕುಟ್ಮಾಚೊ ತೇರ್ಸ್ ಆನಿಂ ಜೆವಾಣ್ ಸಂಪವ್ನ್ ಸಾಂಗಾತಾ ಟಿವಿ ಪಳೆಂವ್ಚೊ 9 ಥಾವ್ನ್ 10 ವೊರಾಚೊ ವೇಳ್ ಸೋಮಾರಾ ಥಾವ್ನ್ ಸುಕ್ರಾರಾ ಪರ್ಯಾಂತ್ ಕೊಂಕ್ಣೆ ಪಾಸತ್ ದಾಯ್ಜಿ ಚಾನೆಲಾನ್ ಆಮಾನತ್ ಕರ್ನ್ ದವರ್ಲೊ ನಿಜಾಯ್ಕಿ ಸಂತೊಸಾಚೊ.

ಸುರ್ವೆರ್ ಮುದ್ರಿತ್ ಸಂಗೀತ್ ಕಾರ್ಯೆ 'ಕೊಂಕ್ಣಿ ಸೊಭಾಣಾ' ಥಾವ್ನ್ ಸುರ್ವಾತ್ ಜಾವ್ನ್ ಉಪ್ರಾಂತ್ 'ಆಮ್ಚಿ ಮಾತಿ,ಆಮ್ಚಿ ಮ್ಹನ್ಶ್ಯಾಂ' 'ಸೋಧ್' 'ಆಮಿ ದೊಗಿ ಸೆಜಾರಾ' 'ಕಾಲ್ ಆಜ್ ಆನಿಂ ಫಾಲ್ಯಾ' 'ಕೊಂಕ್ಣಿ ನಕ್ತಿರಾಂ' 'ಆಡ್ಕುಲೊರೆ ಬುಡ್ಕಲೊ' 'ದೊರೆಮಿಫಾ' ಅನಿಂ ಥಂಯ್-ಹಾಂಗಾ ಮ್ಹಣೊನ್ ಚಲ್‌ಲಿ ಕೊಂಕ್ಣಿ ಸಂಗೀತ್ ಆನಿಂ ಹೆರ್ ಕಾರ್ಯಿ ಎದೊಳ್‌ಚ್ ದಾಯ್ಜಿವಲ್ಡ್ 24x7 ಚಾನೆಲಾಚೆರ್ ವಾಳೊನ್ ಯೇವ್ನ್ ಆಸಾತ್.ನವ್ಯಾ ಕೊಂಕ್ಣಿ ಗಾಯಕ್ ಅನಿಂ ಗಾಯಿಕಾಚ್ಯಾ ಸೊಧ್ನೆರ್ ಮಾಂಡ್ ಸೊಭಾಣಾಚ್ಯಾ ಗುರ್ಕಾರ್‌ಪಣಾಖಾಲ್ ಆಯೋಜಿತ್ ಕೆಲ್ಲೆಂ 'ಸೋಧ್' ಕಾರ್ಯೆ ಲೋಕಾಮೊಗಾಳ್ ಜಾವ್ನ್, ಆಮ್ಚಿಂ ನಕ್ತಿರಾಂ ಆವಿಭಜಿತ್ ಮಂಗ್ಳುರ್ಚ್ಯಾ ಕೊನ್ಶ್ಯಾ ಕೊನ್ಶ್ಯಾಂತ್ ವೊಳ್ಕೆಚಿ ಜಾಲ್ಯಾತ್. ಪೊನ್ನಾಸಾ ವಯ್ರ್ ಆವಸ್ವರ್ ಸಂಪಯ್ಲೆ 'ಆಮ್ಚಿ ಮಾತಿ ಆಮ್ಚಿ ಮ್ಹನ್ಶ್ಯಾಂ' ಕಾರ್ಯಾನ್, ವಿವಿಧ್ ಶೆತಾಚ್ಯಾ ಕೊಂಕ್ಣಿ ಸಾಧಕಾಂಚಿಂ ಪರಿಚಯ್ ಹರ್ಯೆಕ್ ವಿಕ್ಷಕಾಂಕ್ ಕರುನ್ ದಿಲಾ. 'ಕಾಲ್,ಆಜ್ ಆನಿಂ ಫಾಲ್ಯಾ' ರಾಜಕೀಯ್ ಚಿಂತನ್,ವಿಚಾರ್ ಮಂಥನ್,ಸಂಸ್ಕೃತಿಕ್ ಆನಿಂ ಸಮಾಜಿಕ್ ಸುಧಾರಣ್,ಸಾಹಿತಿಕ್,ಧಾರ್ಮಿಕ್ ಆಟವ್ ಆನಿಂ ಹೆರ್ ವಿಶ್ಲೇಷಣ್ ಚಲೊವ್ನ್ ವ್ಹರ್ತಾ ತರ್ 'ಆಮಿ ದೊಗಿಂ ಸೆಜಾರಾ' ಕೊಂಕ್ಣಿ ಜಾಣ್ವಾಯೆ ಸವೆಂ ಮನೋರಂಜನ್ ಆನಿಂ 'ಆಡ್ಕುರೊರೆ ಬುಡ್ಕಲೊ' ಸಾಮಾನ್ಯ್ ಜ್ಞಾನ್ ವಾಡೊವ್ಚ್ಯಾ ದಿಶೆನ್ ಸಕ್ರೀಯ್ ಜಾವ್ನ್ ಆಸಾ. ಪೊರ್‌ಚ್ ನವ್ಯಾನ್ ಸುರ್ವಾತ್ ಜಾಲ್ಲೆಂ 'ದೊ...ರೆ...ಮಿ...ಫಾ' ಕಾರ್ಯಾಕ್ರಮ್ ಕೊಂಕ್ಣಿಸಂಗೀತ್ ಸಾಧಕಾಂಕ್ ಮಾನ್ ಭಾಗವ್ನ್ ವೊಳೊಕ್ ಕರ್ನ್ ದಿಂವ್ಚೆ ಪ್ರೇತನ್ ಕರ್ನ್ ಆಸಾ.ಹ್ಯಾ ಕಾರ್ಯಾಕ್ರಮಾನಿಂ 'ಆಮಿ ದೊಗಿಂ ಸೆಜಾರಿ' 'ಕಾಲ್ ಆಜ್ ಆನಿಂ ಫಾಲ್ಯಾ' ಆನಿಂ 'ಆಡ್ಕುಲೊರೆ ಬುಡ್ಕುಲೊ' ಶೀದಾ ಪ್ರಸಾರಣಾಚೆ ಟೆಲಿಪೋನ್ ಸಂಭಾಷಣ್ ಕಾರ್ಯೆ ಜಾಲ್ಲ್ಯಾನ್ ವಿಕ್ಷಕಾಂಕಿಯ್ ಹ್ಯಾ ಕಾರ್ಯಕ್ರಮಾಂತ್ ಭಾಗಿಧಾರ್ ಜಾಂವ್ಕ್ ಆವ್ಕಾಸ್ ಕರ್ನ್ ದಿಲಾ.

'ಆಮಿ ದೊಗಿ ಸೆಜಾರಾ' ಕಾರ್ಯಕ್ರಮಾಕ್ 25  ಕಂತಾಚಿ ಪ್ರಾಯ್:

ದಾಯ್ಜಿವಲ್ಡ್ 24x7 ಚಾನೆಲಾರ್ ಪ್ರಥಮ್ ಜಾವ್ನ್ ಸುರ್ವಾತ್ ಜಾಲ್ಲೆಂ ಭೋವ್ ಅಪುರ್ಬಾಯೆಚೆ ಶೀದಾ ಪ್ರಸಾರಣಾಚೆ ಟೆಲಿಪೋನ್ ಸಂಭಾಷಣ್ ಕಾರ್ಯೆ 'ಆಮಿ ದೊಗಿ ಸೆಜಾರಾ' ಜುಲಯ್ಚ್ಯಾ 27 ತಾರೀಕೆರ್ 25 ಆವಸ್ವರಾಚಿ ಪ್ರಾಯ್ ಉತ್ರೊನ್ ಮುಕಾರ್ ಸರ್ತೆ ಆಸಾ. ಹರ್ಯೆಕಾ ಬುಧ್ವರಾ 9 ಥಾವ್ನ್ 10 ಪರ್ಯಾಂತ್ ಪ್ರಸಾರಣ್ ಜಾಂವ್ಚೆ ಹೆಂ ಕಾರ್ಯಕ್ರಮ್ ಫೆಬ್ರೆರ್ 11 ಥಾವ್ನ್ ನಿರಂತರ್ ವ್ಹಾಳೊನ್ ಆತಾಂ ಲೋಕಾ ಮೋಗಾಳ್ ಜಾಲಾ.ಪೆರ್ನಾಲ್ ಗಾಂವ್ಚೆ ತಾಲೆಂತ್‌ವೊಂತ್ ಫಾಮಾದ್ ಸೊಭಾಣಾಂ ನಿರ್ವಾಹಕ್ ಆರುಣ್ ದಾಂತಿ ಆನಿಂ ಆಲ್ವಿನ್ ದಾಂತಿ'ನ್ ಹೊಸ್ತ್ ಜಾವ್ನ್ ಚಲೊವ್ಚ್ಯಾ ಹ್ಯಾ ಕಾರ್ಯಾಕ್ರಮಾಚೆ ರಚ್ನಾರ್ ಹ್ಯಾ ದೊನ್ ದಾಂತಿ ಭಾಬಾವಾಂ ಸಂಗಿಂ ಕವಿ,ಲೇಖಕ್ ತಶೆಚ್ ದಾಯ್ಜಿಸಂಸ್ಥ್ಯಾಚೊ ವ್ಯವಹಾರಿಕ್ ಪ್ರಬಂಧಕ್ ಪ್ರವೀಣ್ ತಾರ್ವೊ ಕುಲ್ಶೆಕರ್ ಆನಿಂ ದಾಯ್ಜಿವಲ್ಡ್.ಕೊಮಾಚೊ ಪ್ರಧಾನ್ ಸಂಪಾದಕ್ ವಾಲ್ಟರ್ ನಂದಳಿಕೆ.ಹಾಂಚ್ಯಾ ಗೂಂಡ್ ಚಿಂತ್ಪನ್,ವಿಸ್ತಾರ್ ಯೋಜನಾಂತ್ ಸುರ್ವಾತ್ಲ್ಯಾ ಹ್ಯಾ ಕಾರ್ಯಾಕ್ರಮಾಚೊ ಪ್ರಮುಖ್ ಶೆವೊಟ್ ಕೇವಲ್ ಮನೋರಂಜನ್ ಮಾತ್ರ್ ನ್ಹಯ್ ಮನೋರಂಜನಾ ಸಂಗಿಂ ವಿಕ್ಷಕಾಂಕ್ ಕೊಂಕ್ಣಿ ಭಾಸ್,ಲೋಕ್ ವೇದ್,ಸಾಹಿತ್ಯ್,ಸಮುದಾಯ್ ಆನಿಂ ಸಂಗೀತಾಚಿ ಜಾಣ್ವಾಯ್ ವಾಡೊವ್ಚಿಂ ಮ್ಹಳ್ಳೆಂ ವಯ್ಲ್ಯಾನ್ ವರಯ್ತಾನಾ ದಿಸೊನ್ ಯೆತಾ. 

ಖರ್ಯಾನ್ 'ಆಮಿ ದೊಗಿಂ ಸೆಜಾರಾ' ಕಾರ್ಯಾಕ್ರಮ್ ಶೆವೊಟಾಕ್ ಪಾವೊಂವ್ಕ್ ನಾ ತರಿಯ್ ಹಳ್ತಾರ್ ಶೆವೊಟಾ ತೆವ್ಶಿನ್ ಮೆಟಾಂ ಕಾಡುನ್ ಆಸಾ.ಕೊಂಕ್ಣಿ ಸಂಸಾರಾಂತ್ ಲಿಪೊನ್ ಉರೊನ್,ನಾಪಯ್ಸ್ ಜಾಂವ್ಚ್ಯಾ ಸ್ಥಿತೆರ್ ಆಸ್ಚ್ಯೊ,ದಾಕ್ಲ್ಯಾಕ್ ಕೊಂಕ್ಣಿ ಗಾದಿಯೊ,ವೊವಿಯೊ-ವೆರ್ಸ್,ವಸ್ತುಚೆಂ,ರಾಂದ್ವಾಯೆಚ್ಯೊಂ ವಾ ಇತರ್ ವಸ್ತುಚೊಂ ಕೊಂಕ್ಣಿ ನಾಂವಾಂ ಆನಿಂ ಜಾಯ್ತ್ಯಾ ಇತರ್ ಸಂಗ್ತ್ಯಾಕ್ ಹ್ಯಾ ಕಾರ್ಯಕ್ರಮಾನ್ ನವೊ ಜೀವ್ ದಿಲಾ.ಬಣ್ಣಾಚ್ಯಾ ಫಿಲ್ಮಾಚೊ ಕಾಳ್ ಉತ್ರೊನ್ 3ಡಿ ಜಾವ್ನ್ ಡಿಜಿಟಲ್ ಜಾಲ್ಲ್ಯಾ ಹ್ಯಾ ಮಾಧ್ಯಮ್ ಸಂಸಾರಾಂತ್ ಕೊಂಕ್ಣೆಚಿ 'ಕಾಳ್ಯಾ ಆನಿಂ ಧವ್ಯಾ' ರಂಗಾಚಿ ಫಿಲ್ಮಾ ಆಯ್ಲಿಗಿ? ಮ್ಹಣ್ ಮ್ಹಾಕಾ ಹೆಂ ಕಾರ್ಯಕ್ರಮ್ ದೆಖ್ತಾನಾ ಭೊಗ್‌ಲೆ ಆಸಾ. ಹ್ಯಾ ಪಿಳ್ಗೆಚ್ಯಾ ಜಾಣ್ವಾಯೆಕ್ ಆಸ್ಲಿಂ ಮಾಹೆತ್ ದೀವ್ನ್ ಮಾಲ್ಗಡ್ಯಾ ಪಿಳ್ಗೆಚ್ಯಾ ಕೊನ್ಶ್ಯಾರ್ ಆಸ್‌ಲೊ ಉಡಾಸ್ ಪರತ್ ಜೀವಾಳ್ ಕೆಲ್ಲೊ ಶ್ರೇಯ್ ಹ್ಯಾ ಕಾರ್ಯಾಕ್ ಫಾವೊ ಜಾತಾ.

ಕೊಂಕ್ಣಿ ಸಬ್ದ್, ಕೊಂಕ್ಣಿ ನಾಂವಾಂ, ಕೊಂಕ್ಣಿ ಸಾಧಕ್,ಕೊಂಕ್ಣಿ ಸಾಹಿತ್ಯ್,ಕೊಂಕ್ಣಿ ಸಂಗೀತ್ ಆನಿಂ ಇತರ್ ಸಂಗ್ತೆಕ್ ಲಗ್ತಿಂ ಜಾಲ್ಲಿಂ ಸವಲಾಂ ತಯಾರ್ ಕರ್ಚ್ಯಾಂತ್ ಪ್ರವೀಣ್ ತಾರ್ವೊ'ಚಿ ಮ್ಹಿನತ್ ಶಾಭಾಸ್ಕಾಯೆಚಿ ಆನಿಂ ತೊಚ್ಚ್ ಪರ್ದ್ಯಾ ಪಾಟ್ಲ್ಯಾನ್ ಆಸ್ಚೊ ನಾಯಕ್ ಮ್ಹಣ್ತಾತ್ ಪೆರ್ನಾಲ್'ಚೆ ದಾಂತಿ ಭಾಭಾವ್.ಹ್ಯಾ ದಿಸಾನಿಂ ಕೊಂಕ್ಣಿ ವಿಷಯ್ ಸಂಬಂಧಿತ್ ಸಂಗೀತ್ ಏಕ್ಟಾಯ್ ಕರುಂಕ್ ಜೊಯೆಲ್ ಆತ್ತೂರ್ ಹಾಂಚೆ ಸವೆಂ ಮೆಳ್ಳಾಂ ಮ್ಹಳ್ಳಿ ಮಾಹೆತ್ ಆಸಾ. ಹ್ಯಾ ಶಿವಾಯ್ ಹ್ಯಾ ಕಾರ್ಯಾಕ್ರಮಾಂಕ್ ತಶೆಂಚ್ ಹರ್ಯೇಕ್ ಕೊಂಕ್ಣಿ ಕಾರ್ಯಕ್ರಮಾಕ್ ದಾಯ್ಜಿವಲ್ಡ್ ಮಾಧ್ಯಮ್ ಕಾರ್ಬಾರ್ಯಾ ಥಾವ್ನ್ ಬರ್ಪೂರ್ ಪಾಟಿಂಬೊ ಮೆಳೊನ್ ಆಸಾ.ಜಿಕೊನ್ ಆಯ್ಲ್ಯಾಕ್ ನಗ್ದೆನ್ ಇನಾಮ್,ಇತರ್ ಇನಮಾಂ ಆನಿಂ ಹೆರ್ ರೀತಿಚ್ಯಾ ಸಂಪನ್ಮೂಳ್ ಎಕ್ಟಾಯ್ ಕರ್ಚ್ಯಾಂತ್ ದಾಯ್ಜಿ ಕಾರ್ಬಾರಿ ಮುಕಾರ್ ಆಸಾತ್.ಕೊಂಕ್ಣಿ ಭಾಷೆಚ್ಯಾ ಮೊಗಾನ್ ಅನಿಂ ದಾಯ್ಜಿ ಸಂಸ್ಥ್ಯಾಚ್ಯಾ ವಾವ್ರಾಚ್ಯಾ ಆಭಿಮಾನಾನ್ ಕಾರ್ಯಕ್ರಮಾಕ್ ಪೋಷಕ್ ಜಾಂವ್ಕ್ ಕೊಣಿಯ್ ಪಾಟಿಂ ಸರನಾ ಮ್ಹಣೊನ್ ಹ್ಯಾ ಕಾರ್ಯಕ್ರಮಾಚೆ ಹೊಸ್ತ್ ದಾಂತಿ ಭಾಬಾವ್ ಆಭಿಮಾನಾನ್ ಉಚಾರ್ತಾತ್.  

ಸಭಾರ್ ವರ್ಸಾ ಪಯ್ಲೆಂ ಮಂಗ್ಳುರ್ಚ್ಯಾ ಆನಿಂ ಉಡುಪಿಚ್ಯಾ ಚಾನೆಲಾನಿಂ ಆಸ್ಲ್ಯಾಚ್ ರೀತಿಚ್ಯಾ ಕೊಂಕ್ಣಿ ಕಾರ್ಯಕ್ರಮ್ ಚಲೊನ್ ವ್ಹೆಲ್ಲ್ಯಾ ದಾಂತಿ ಭಾಭಾವಾಂಕ್ ಹೆಂ ಕಾರ್ಯೆ ಚಲೊವ್ನ್ ವ್ಹರ್ಚೆ ಉದಾಕ್ ಪಿಯೆಲ್ಲ್ಯಾ ತಿತ್ಲೆಚ್ ಸಲೀಸಾಯೆಚೆ.ಶೀದಾ ಪ್ರಸಾರಣಾ ವೆಳಾ ಕಸ್ಲಿಯ್ ತಾಂತ್ರಿಕ್ ಆಡ್ಕಳಿ ಉಭಿಂ ಜಾಲ್ಯಾರ್ ತಿಂ ಪುಡ್ ಕರುನ್ ಕಾರ್ಯಕ್ರಮ್ ಚಲೊಂವ್ಚಿ ಶಾಥಿ ತಾಂಕಾಂ ಆಸ್ಲ್ಯಾನ್ ಸೂಕ್ತ್ ವ್ಯಕ್ತಿ ಕಾರ್ಯೆ ಚಲೊನ್ ಆಸಾತ್ ಮ್ಹಳ್ಳಿಂ ವೈಯುಕ್ತಿಕ್ ಆಭಿಪ್ರಾಯ್.ಸಾಮಾನ್ಯ್ ಜಾವ್ನ್ ಎಕಾ ಆವಸ್ವರಾಂತ್ ಗಲ್ಫ್,ಆಸ್ಟ್ರೆಲಿಯಾ,ಕೆನಡ,ಯುಕೆ ಥಾವ್ನ್ ಹಜಾರಾ ವಯ್ರ್ ವಿಕ್ಷಕ್ ಟೆಲಿಪೋನ್ ಕರ್ತಾತ್ ತರಿಯ್ 25 ಥಾವ್ನ್ 30 ಪರ್ಯಾಂತ್ ವಿಕ್ಷಕಾಂಕ್ ಸಂಭಾಷಣಾಕ್ ಆನಿಂ ಸವಲಾ-ಜಾಪಿಕ್ ಆವ್ಕಾಸ್ ಮೆಳ್ತಾ. ಹಾಚೆಂ ಭಾಯ್ರ್ ಹಪ್ತ್ಯಾಚ್ಯಾ ಸವಾಲಾ ಮಾರಿಫಾತ್ ಸಾರ್ಕಿ ಜವಾಬ್ ಧಾಡ್ಲ್ಯಾ ಖಂಚಾಯ್ ಏಕಾ ವಿಕ್ಷಕಾಕ್ ಇನಾಮ್ ಆಪ್ಣಾವ್ಚೊ ಆವ್ಕಾಸ್ ಆಸಾ. 

ಕಿತೆಯ್ ಜಾಂವ್ದಿ ಮನೋರಂಜನ್ ಸವೆಂ ಕೊಂಕ್ಣಿ ಜಾಣ್ವಾಯ್ ವಾಡೊಂವ್ಚ್ಯಾ 'ಆಮಿ ದೊಗಿಂ ಸೆಜಾರಾ' ಕಾರ್ಯಾಕ್ ಆನಿಂ ಹ್ಯಾ ಕಾರ್ಯಾಚ್ಯಾ ಕಾರ್ಬಾರ್ಯಾಕ್ ಸಲಾಮ್.ಕೊಂಕ್ಣಿ ಲೋಕಾಂ ಪಾಸತ್ ಆಸ್ಲೆಂ ಏಕ್ ಕಾರ್ಯೆ ಫಾವೊ ಕೆಲ್ಲ್ಯಾ ದಾಯ್ಜಿ ಸಂಸ್ಥ್ಯಾಕ್ ಅಭಿನಂದನ್.ಕೊಂಕ್ಣಿ ಭಾಷೆ ವಿಶಿಂ ತಾತ್ಸಾರ್ ಕರಿನಾಸ್ತಾನಾ ಆಮ್ಚ್ಯಾ ಘರಾನಿಂ ಹೆಂ ಚಾನೆಲ್ ಪ್ರಾಪ್ತ್ ಜಾಂವ್ಚ್ಯಾ ಆನಿಂ ಇಂಟರ್ನೆಟ್ ಸೌಲಭ್ಯ್ ಆಸ್ಲ್ಯಾ ಹರ್ಯೆಕ್ಲ್ಯಾನಿಂ(www.daijiworld24x7.com) ಹಿಂ ಕಾರ್ಯಕ್ರಮಾಂ ಪಳೆಯ್ಜೆಚ್. ಎದೊಳ್ ಪರ್ಯಾಂತ್ ಹೆಂ ಕಾರ್ಯಕ್ರಮ್ ಅಪುರ್ಬಾಯೆನ್ ಪ್ರಸಾರಿತ್ ಜಾತಾ ತರಿಯ್ ರಾಜ್ಯ್ ಆನಿಂ ರಾಷ್ಟ್ರ್ ಹಂತಾರ್ ಶಿಕ್ಷಣ್, ಶಿಕ್ಷಕ್, ಖೆಳ್, ಸಾಹಿತ್ಯ್, ರಾಜಕೀಯ್, ಆಡಳಿತ್ ಆನಿಂ ಹೆರ್ ಶೆತಾಂತ್ ನಾಂವ್ ಜೊಡ್ಲ್ಯಾಂಕ್ ಕೊಂಕ್ಣಿ ಮ್ಹನ್ಶ್ಯಾಂಕ್ ವೊಳ್ಕುಂಚೆ, ಕೊಂಕ್ಣಿ ಮಾನ್-ಮ್ಹನ್ಶ್ಯಾಚೊ ತಾಳೊ ವೊಳ್ಕುಚ್ಯಾ ತಸ್ಲೆಂ ಪ್ರಯೋಗ್ ಹ್ಯಾ ಕಾರ್ಯಾಕ್ರಮಾಂತ್ ಕೆಲೆಂ ತರ್ ಹೆಂ ಕಾರ್ಯಕ್ರಮ್ ಚಡಿತ್ ಮಾಫಾನ್ ಸೊಭ್ತೆಲೆ.

-ಮೆಲ್ವಿನ್ ಕೊಳಲ್‌ಗಿರಿ

(ಆಗೊಸ್ತ್ ಮಹಿನ್ಯಾಚಾ ದುಸ್ರ್ಯಾ ಅಂಕ್ಯಾರ್ 'ಉಜ್ವಾಡ್' ಪತ್ರಾರ್ ಫಾಯ್ಸ್ ಜಾಲ್ಲೆಂ ಮನೋರಂಜನ್ ಮಾಹೆತ್)

ಪರತ್ ಆಯ್ಲೆಂ ಮೊಂತಿ ಫೆಸ್ತ್

ಮ್ಹಾಕಾ ದುಸ್ರ್ಯಾ ಗಾಂವ್ಚ್ಯಾ ಲೋಕಾಂ ವಿಶಿಂ ಚಡಿತ್ ಜಾಣ್ವಾಯ್ ನಾ.ಪುಣ್ ಆಮ್ಚ್ಯಾ ಗಾಂವ್ಚ್ಯಾ ಲೋಕಾಂಕ್ ಫೆಸ್ತ್-ಪರಬ್ ಮ್ಹಳ್ಯಾರ್ ಉರ್ಬಾ ತಿಕ್ಕೇಶಿ ಚಡ್‌ಚ್ಚ್. ಮಹಿನ್ಯಾ ಪಯ್ಲೆ ತಕ್ಲಿ ಸಕ್ಲಾ ಗಾಲ್ನ್,ಪಾಂಯ್ ವಯ್ರ್ ಕರ್ನ್ ಫೆಸ್ತಾಚ್ಯಾ ತಯಾರಾಯೆಚೊ ಸರ್ಕಸ್ ಕರ್ನ್‌ಚ್ಚ್ ಆಸ್ತಾತ್. ತಯಾರಾಯ್ ಮ್ಹಳ್ಯಾರಿ ಸಾಂಗ್ಚೆ ಕಿತೆಂ? ಫೆಸ್ತ್ ಸಂಪೊವ್ನ್ ಕುಡ್ಲೆಂ ಧುವ್ನ್ ಸುಕೊಂಕ್ ದವರ್ಲ್ಯಾರಿ ಫೆಸ್ತಾಚಿ ತಯಾರಾಯ್ ಸೊಂಪ್ಲಿ ಮ್ಹಣೊನ್ ನಾ.ನೀಜ್ ಸಾಂಗ್ಚೆ ತರ್, ಆಮ್ಚ್ಯಾ ಗಾಂವಾಂತ್ ಸರ್ವ್ ಸಮುದಾಯಾಂಚ್ಯಾ ಲೋಕಾಂಕ್ ಉರ್ಭೆಚೆ ಬೆಸಾಂವ್‌ಚ್ಚ್ ಆಮ್ಚ್ಯಾ ಸರ್ವೆಸ್ಪರಾನ್ ವೊತ್ಲಾ ಮ್ಹಣ್ಯೆತ್. ಆಮ್ಚ್ಯಾ ಹಿಂದೂ ಬಾವ್ಡಾಂಚ್ಯಾ ಮಾರಿ ಪರ್ಭೆ ಥಾವ್ನ್ ಧರ್ನ್ ಆಮ್ಚ್ಯಾ ಕ್ರಿಸ್ತಾಂವ್ ಸಮೊಡ್ತಿಕ್ ದೇವಾನ್ ದಿಲ್ಲೆ ಭೋವ್ ವ್ಹಡ್ಲೆ ಫೆಸ್ತ್ 'ಪಾಸ್ಕ್ ಪರ್ಭೆ' ಪರ್ಯಾಂತ್ ಖಂಯ್ಸರ್ ಕರಿನಾತ್ಲಿ ತಯಾರಾಯ್ ಕರ್ನ್‌ಚ್ಚ್ ಆಸ್ತಾತ್.

ಆಮ್ಚೊ ಗಾಂವ್ ಮ್ಹಳ್ಯಾರ್ ಆಸೊಚ್ಚ್.ಆಮಿ ಎಕಾಮೆಕಾಚ್ಯಾ ಫೆಸ್ತಾಚಿ ತಯಾರಾಯ್ ಕರಿನಾಂವ್ ಜಾಲ್ಯಾರೀ, ಎಕಾಮೆಕಾಂಚ್ಯಾ ಫೆಸ್ತಾಚಿಂ ಜಾಣ್ವಾಯ್ ಮಾತ್ರ್ ಆಮ್ಕಾಂ ಸರ್ವಾಂಕಿಯ್ ಆಸ್ತಾ. ಖಂಚ್ಯಾ ಮಹಿನ್ಯಾತ್ ಖಂಚೆ ಫೆಸ್ತ್ ಯೆತಾ? ಖಂಚಾ ಫೆಸ್ತಾಕ್ ಕಿತೆಂ ರಾಂದ್ತಾತ್? ಆಮಿ ಖಂಚಾ ಫೆಸ್ತಾಕ್ ಮಾಸ್-ಮಾಸ್ಳಿ ರಾದಿನಾಂವ್? ಹೆಂ ಸಗ್ಳೆ ಆಮ್ಚ್ಯಾ ಎಕಾಮೆಕಾಚ್ಯಾ ಗಮಾನಾಂತ್ ಆಸ್ತಾ. ತ್ಯಾ ದೆಕುನ್ ಆಮ್ಚ್ಯಾ ಗಾಂವಾತ್ ಎಕಾಮೆಕಾಚ್ಯಾ ಫೆಸ್ತಾಕ್ ಅಪೊವ್ಣೆ ದಿಂವ್ಚೆಯ್ ಆಸಾ ಆನಿಂ ಎಕಾಮೆಕಾ ಹಾಜರ್ ಜಾವ್ನ್ ಪರ್ಭಿ ಪಾಟೊಂವ್ಚೆಯ್ ಆಸಾ. ಮ್ಹಜ್ಯಾ ಚಿಂತ್ಪಾನಿಂ ಹಾಕಾಚ್ಚ್ ಮ್ಹಣ್ತಾತ್ ಕೊಣ್ಣಾ ಎಕಾಮೆಕಾಚ್ಯಾ ಸಮುದಾಯಾ ಸಂಗಿ ಭಾವ್ ಬಾಂದವ್ಪಣಾಂಚೆ ಜಿವಿತ್ ಮ್ಹಣೊನ್. 

ಹ್ಯಾ ದಿಸಾನಿಂ ಆಮ್ಚ್ಯಾ ಗಾಂವಾಂತ್ ಮೊಂತಿ ಫೆಸ್ತಾಚಿ ತಯಾರಾಯ್ ಸುರು ಜಾಲಾ.ಲ್ಹಾನಾಂ ಥಾವ್ನ್ ಮಾಲ್ಗಡ್ಯಾಂ ಪರ್ಯಾಂತ್ ಆಪ್ಣಾಕ್ ಸಂಬಂಧಿತ್ ಜಾಲ್ಯಾ ತಯಾರಾಯೆತ್ ವ್ಯಸ್ಥ್ ಜಾಲ್ಯಾಂತ್. ಲ್ಹಾನಾಂ ವೊಡ್ತಾಂತ್ ಆನಿ ಘರ್ಚ್ಯಾ ದೊರ್ಯಾ ವಯ್ರ್ ಮ್ಹಣೊನ್ ಮರಿಯೆ ಮಾಯೆಕ್ ಪುಲಾಂ ವಿಂಚ್ಚ್ಯಾರ್ ವ್ಯಸ್ಥ್ ಜಾಲ್ಯಾರ್, ಆಮ್ಚಿ ಮಾಲ್ಗಡಿಂ ಕುಟ್ಮಾಂಚಿ ಸರ್ವ್ ಸಾಂಗಾತಾ ಮೆಳೊನ್ ನವೆಂ ಜೆಂವ್ಕ್ ತಯಾರಾಯ್ ಕರ್ನ್ ಆಸಾತ್.

ಗೊಂಯಾಂತ್ ಆಕ್ರಿಸ್ತಾಂವ್ ಕೊಂಕ್ಣೆಂ ಜಾವ್ನ್ ಆಸ್ಲೆಂ ಆಮ್ಚೆ ಪುರ್ವಜ್, ಪೊರ್ಚುಗೀಸ್ ಮಿಶೊನರಿ ಮುಖಾಂತ್ರ್ ಕಥೊಲಿಕ್ ಕ್ರಿಸ್ತಾಂವ್ ಜಾಲೆ. ಕ್ರಮೇಣ್ ಥೊಡ್ಯಾ ಸಾಮಾಜಿಕ್,ವ್ಯವಹಾರಿಕ್,ಅರ್ಥಿಕ್ ಆನಿಂ ರಾಜಕೀಯ್ ಕಾರಣಾ ಲಾಗೊನ್ ಕೆನರಾ(ಉ.ಕನ್ನಡ,ಉಡುಪಿ,ಮಂಗ್ಳುರ್,ಕಾಸರ್‌ಗೋಡು)ಯೇವ್ನ್ ಪಾವ್ಲೆ. ಕ್ರಿಸ್ತಾಂವ್ ಜಾಲ್ಯಾರಿ ಥೊಡ್ಯಾ ಹಿಂದೂ ಆಚರಣಾ ಥಾವ್ನ್, ಸಂಸ್ಕೃತಿ ಥಾವ್ನ್ ಆನಿಂ ರಿವಾಜಿ ಥಾವ್ನ್ ಆಮ್ಚ್ಯಾ ಪುರ್ವಜಾಂಕ್ ಪಯ್ಸ್ ಯೇಂವ್ಕ್ ಜಾಂವ್ಕ್ ನಾ. ಹಾಂತು ನವೆಂ ಫಳ್ ಸ್ವಿಕಾರ್ ಕರ್ನ್ ಜೆಂವ್ಚಿ ರಿವಾಜ್ ಎಕ್ ಮ್ಹಣ್ಯೆತ್ ಕೊಣ್ಣಾ. ಹೆಂಚ್ಚ್ ಮತಿಂತ್ ದವರ್ನ್ ಕ್ರಿಸ್ತಾಂವ್ ಮಿಶೊನರಿನಿಂ ಕಥೋಲಿಕಾಂ ಥಂಯ್ ಮರಿಯೆಚ್ಯಾ ಜಲ್ಮಾದಿಸಾಚಿ ಪರಬ್ ಸಂಭ್ರಮಿಕ್ ರೀತಿನ್ ಆಚರಣ್ ಕರುಂಕ್ ಸುರ್ವಾತ್ ಕರುನ್, 'ನವೆಂ ಫಳ್ ಜೆಂವ್ಚಿ'  ರಿವಾಜ್ ಮೊಂತಿ ಫೆಸ್ತಾ ದಿಸ್ ಆಚರಣ್ ಕರುಂಕ್ ಸುರ್ವಾತ್ಲೆ ಜಾಯ್ಜೆಯ್. 

ಆಮ್ಚ್ಯಾ ಗಾಂವ್ಚ್ಯಾಕ್ ಮೊಂತಿ ಫೆಸ್ತ್ ಮ್ಹಳ್ಯಾರ್ ಭಾರಿಚ್ಚ್ ಖುಶಿ.ಗಾಂವ್ಚೊ ಲೋಕ್ ಮ್ಹಳ್ಯಾರ್ ಮ್ಹಾಕಾಯ್ ಧರ್ನ್ಚ್‌ಚ್ಚ್ ಮ್ಹಣೊನ್ ಉಡಾಸಾಕ್ ಆಸೊಂದಿ. ಪಾವ್ಶಿಲ್ಯಾ ದಿಸಾಂನಿ ಯೆಂವ್ಚೆ ಹೆಂ ಅಪುರ್ಬಾಯೆಚೆ ಫೆಸ್ತ್, ಗಾಂವ್ಚ್ಯಾ ಬಯ್ಲಾಂತ್ ಸಾಗೊಳೆಚೊ ವಾವ್ರ್ ಸಂಪೊವ್ನ್ ನವ್ಯಾ ಫಳಾಂಚ್ಯಾ ಯೆಣ್ಯಾಕ್ ಅತ್ರೆಗಾನ್ ರಾಕೊನ್ ಆಸ್ಚ್ಯಾ ಅಮ್ಚ್ಯಾ ರೈತಾಂಕ್ ಹೆಂ ಫೆಸ್ತ್ ಸಂತೋಸ್ ಹಾಡಯ್ತಾ. ಅಪ್ಣಾಚ್ಯಾ ಕಷ್ಟಾಂ ವಾವ್ಟಿಚಿ ಮಿನ್ಹತೆನ್ ವಾರ್ಯಾ ಪಾವ್ಸಾ ಥಾವ್ನ್, ನ್ಹಂಯ್ಚ್ಯಾ ಉದ್ಕಾಚ್ಯಾ ಆವ್ರಾ ಥಾವ್ನ್ ಉತ್ರೊನ್ ಫಳ್ ಜಾವ್ನ್ ಉದೆವ್ನ್ ಯೆತಾನಾ, ಆಮ್ಚೊ ರೈತ್ ಖಂಯ್ ನಾತ್ಲೊ ಸಂತೋಸ್ ಪಾವ್ತಾ. ಆನಿಂ ಮೊಂತಿ ಫೆಸ್ತಾಕ್ ಸರ್ವೆಸ್ಪರಾಕ್ ಸಮರ್ಪುನ್ ಆರ್ಗಾ ಪಾಟಾಯ್ತಾಂ ಆನಿಂ ಯಾಜಕಾ ಮಾರಿಫಾತ್ ಆಶಿರ್ವಾದಿತ್ ಕರ್ನ್ ಆಪ್ಲ್ಯಾ ಕುಟ್ಮಾಂ ಸಾಂಗಾತಾ ಸ್ವಿಕಾರ್ ಕರ್ತಾ. ಹೆಂ ಸಗ್ಳೆ ಆಮಿ ಜಾಣಾಂವ್ ಜಾಲ್ಯಾರೀ ಮೊಂತಿ ಫೆಸ್ತ್ ಯೆತಾನಾ ಪರತ್-ಪರತ್ ಅಯ್ಕೊಂಕ್ ಕಿತೆಂಯ್ ಉಬ್ಗೊಣ್ ಭೊಗಾನಾ.
ಆಮ್ಚ್ಯಾ ಫಿರ್ಗಜೆಂತ್ ವಾಡ್ಯಾಚ್ಯಾ ಗುರ್ಕಾರಾಂನಿಂ ನವ್ಯಾ ಫಳಾಂಚೊ ಕನ್ಶ್ಯೊಂ ಹಾಡ್ಚಿ ರಿವಾಜ್. ಆರ್ವಿಲ್ಯಾಂ ದಿಸಾಂನಿಂ ಪಾವ್ಸಾಚ್ಯಾ ಘಳಾಯೆನ್ ಆಮ್ಚ್ಯಾ ಗಾಂವ್ಚ್ಯಾ ಬೊಯ್ಲ್ಯಾಂತ್ ಸಾಗೊಳೆಚೊ ವಾವ್ರ್ ಆಟಿ ಮಹಿನ್ಯಾ ಪರ್ಯಾಂತ್ ಲಾಂಭೊನ್ ವೆತಾ ಜಾಲ್ಲ್ಯಾನ್,ಮೊಂತಿ ಫೆಸ್ತಾಕ್ ಬೆಂಜಾರ್ ಕರುಂಕ್ ನವ್ಯಾ ಫಳಾಚ್ಯೊ ಕನ್ಶ್ಯೊ ಮೆಳೊಂಕ್ ಇಲ್ಲೇಶೆ ಆಮ್ಚ್ಯಾ ಫಿರ್ಗಜೆಚ್ಯಾ ಗುರ್ಕಾರಾಂಕ್ ಇಲ್ಲೆಶೆ ಕಷ್ಟ್ ಭೊಗ್ತಾ. ತಶೆಂ ಮ್ಹಣೊನ್ ಆಮ್ಚೆ ಗುರ್ಕಾರ್ ಕಿತೆಂಯ್ ಹಾತ್ ಬಾಂದುನ್ ಬಸ್ಚೆಂ ಮುನಿಸ್ ನ್ಹಯ್.ಖಂಯ್ಸರ್ ಥಾವ್ನಿಯಿ ಸರ್ಕಸ್ ಕರ್ನ್ ವೆಳಾರ್ ಕನ್ಶ್ಯೊ ಇಗರ್ಜೆಕ್ ವ್ಹರ್ನ್ ಪಾವಾಯ್ತಾತ್.
ಹಾಂವ್ ಲ್ಹಾನ್ ಆಸ್ತಾನಾ ಆಮ್ಚ್ಯಾ ವಾಡ್ಯಾಚೊ ಗುರ್ಕಾರ್ ನವ್ಯಾ ಫಳಾಂಚೊ ಕನ್ಶ್ಯೊ ಘೇವ್ನ್ ವಾಜಪಾ ಮುಖಾಂತ್ರ್ ಇಗರ್ಜೆಕ್ ವ್ಹರ್ನ್ ವಾವೊಂವ್ಚೆ ಆಸ್ಲೆಂ ಆನಿಂ ಆಮಿ ಲ್ಹಾನ್ ಭುರ್ಗ್ಯಾನಿಂ ತಾಚ್ಯಾ ಸಾಂಗಾತಾ ಪುಲಾಂ ಘೇವ್ನ್ ಚಲೊನ್ ವೆಚೆ ಆಸ್ಲೆಂ. ಪುಣ್ ಹ್ಯಾ ದಿಸಾನಿಂ ವಾಜಪ್ ಘೇವ್ನ್ ನವೆಂ ಫಳ್ ಇಗರ್ಜಿಕ್ ವ್ಹರ್ಚೆ ಚಡಿತ್ ಮಾಫಾನ್ ದಿಸೊನ್ ಯೆನಾ ಜಾಲ್ಯಾರಿ ಆಮ್ಚ್ಯಾ ಗಾಂವಾಂತ್ ಥೊಡ್ಯಾ ವಾಡ್ಯಾಚೆಂ ಗುರ್ಕಾರ್ ಸಾಂಗಾತಾ ಮೆಳೊನ್ ವಾಜಪಾ ಮುಖಾಂತ್ರ್ ನವೆಂ ಹಾಡ್ನ್ ಇಗರ್ಜೆಕ್ ಅಜೂನಿಯ್ ಪಾವೊವ್ನ್ ಅಸಾತ್. 

ಆಮ್ಚ್ಯಾ ಮಾಲ್ಗಡ್ಯಾಂಚಿ ಆನಿಂ ಹ್ಯಾ ದಿಸಾನಿಂ ಹೆಣೆ-ತೆಣೆಂ ದಿಸೊನ್ ಯೆಂವ್ಚಿ ವೊಜ್ಯಾಚಿಂ ಸಂಸ್ಕೃತಿ ಹ್ಯಾ ಎಕ್ ಪುರ್ಶಾವಾಂಕ್ ಪಾಟಿಂಬೊ ಜಾಯ್ಜೆಯ್.ಆಶೆಂ ಹೆಂ ವಾಂಜ್ಪಿಂ ಸಕಾಳಿಂಚೆ ಗುರ್ಕಾರಾಂ ಸಾಂಗಾತಾ ಇಗರ್ಜೆಕ್ ನವೆಂ ಪಾವಿತ್ ಕರುಂಕ್ ಗೆಲ್ಯಾರ್,ದನ್ಪರಾ ಜೆಂವ್ಣಾ ಉಪ್ರಾಂತ್ ವಾಜಪ್ ಘೇವ್ನ್ ಆಮ್ಚ್ಯಾ ಕ್ರಿಸ್ತಾಂವ್ ಘರಾಂನಿಂ ಭೊಂವ್ಚೆ ಆಮ್ಚ್ಯಾ ಗಾಂವಾಂತ್ ಆಜೂನಿಯ್ ದಿಸೊನ್ ಯೆತಾ. ಹೆಂ ವಾಜ್ಪಿಂ ಆಮ್ಚೆ ಕ್ರಿಸ್ತಾಂವ್ ಮುನಿಸ್ ನ್ಹಯ್ ತರೀ ಮೊಂತಿ ಫೆಸ್ತಚೊ ನಾದ್ ತಾಣಿಯ್ ತಾಂಚ್ಯಾ ವಾಜಪಾ ಮುಖಾಂತ್ರ್ ಭಾಯ್ರ್ ಕಾಡ್ತಾನಾ ಆಮ್ಚೊಯ್ ಸಂತೊಸ್ ದೊಡ್ತೊ ಜಾತಾ. 

ನೋವ್ ದಿಸಾಚ್ಯಾ ನೊವೆನಾಕ್ ಘರ್ಚ್ಯಾ ವೊಡ್ತಾಂತ್ ಯಾ ಸೆಜಾರ್ಯಾಚ್ಯಾ ವೊಡ್ತಾಂತ್ ಪುಲ್‌ಲಿಂ ಪುಲಾಂ ಘೇವ್ನ್ ಇಗರ್ಜೆಕ್ ಭಾಯ್ರ್ ಸರ್ಚಿ ನೆಣ್ತಿ ಬಾಳಾಂ, ಸಪ್ಟಂಬರ್ ೮ ತಾರೀಕೆರ್ ಪುಲಾಂ ತಿಕ್ಕೆಶಿ ಚಡಿತ್ ಮಾಫಾನ್ ವ್ಹರ್ನ್ ಫಿರ್ಗಜ್ ವಿಗಾರಾಕ್ ಯಾ ದೊತೊರ್ನೆಚ್ಯಾ ಟೀಚೆರಿಕ್ ಇಪ್ರೆಸ್ಸ್ ಕರುಂಕ್ ಸಪ್ಟಂಬರ್ ೭ ತಾರೀಕೆರ್ ಪುಲಾಂ ಎಕ್ಟಾಯ್ ಕರುಂಕ್ ಕೊಣಿಯ್ ಕರುಂಕ್ ನಾತ್ಲೊ ಸರ್ಕಸ್ ಕರ್ತಾತ್. ಸಪ್ಟಂಬರ್ ೮ ತಾರೀಕೆರ್ ಎಕಾಮೆಕಾಚಿ ಪುಲಾಚಿಂ ವಾಟ್ಲಿ ಲಾಗ್ಗಿ-ಲಾಗ್ಗಿ ದವರ್ನ್ ಕೊಣಾಚ್ಯಾಂತ್ ಚಡ್ ಪುಲಾಂ ಆಸಾತ್ ಮ್ಹಳ್ಳೆ ಕೊಂಪಿಟಿಶನ್ ಆಮ್ಚ್ಯಾ ಗಾಂವ್ಚ್ಯಾ ಭುರ್ಗ್ಯಾ ಮಧೆಂ ಹಾಂವ್ ಲ್ಹಾನ್ ಆಸ್ತಾನಾಯ್ ಚಲ್ತಾಲೆ, ಆತಾಂಯ್ ಚಲೊನ್ ಆಸಾ,ಮುಖಾರಿಯ್ ಚಲ್ತಾಲೆ ಕೊಣ್ಣಾ?ಪುಣ್ ತ್ಯಾ ದಿಸ್ ಮಿಸ್ ಅಖೇರ್ ಜಾತೆತ್ ಎಕ್ ಕೊಬು ಮೆಳ್ತಾನಾ, ಒಲಂಪಿಕ್ ದಿವ್ಯಾ ಪರಿಂ ಹಾತಾಂತ್ ಘೇವ್ನ್ ಆತಾಯ್ ಥೊಡ್ಯಾ ಭುರ್ಗ್ಯಾನಿಂ ಚಲೊನ್ ಘರಾಂ ವೆಚೆ ಪಳೆಯ್ತಾನಾ ಮ್ಹಾಕಾಯ್ ಮ್ಹಜೊ ಲ್ಹಾನ್ ಪಣಾಂಚೊ ಉಡಾಸ್ ಯೆತಾ.
ಲ್ಹಾನ್ ಪಣಾರ್ ಆಮಿಯ್ ಜಾಲ್ಯಾರ್ ತಶೆಂಚ್ಚ್ ಆಸ್ಲ್ಯಾಂವ್, ಸಂಜೆಚೆ ಇಸ್ಕೊಲ್ ಸುಟ್‌ಲ್ಲೆಂಚ್ ಇಸ್ಕೊಲಾಕ್ ವ್ಹರ್‍ಚೆಂ ಬ್ಯಾಗ್ ಘರ್‍ಚ್ಯಾ ಮುಲ್ಯಾರ್ ಆಸ್ಚ್ಯಾ ಬಾಂಕಾ ವಯ್ರ್ ಉಡವ್ನ್, ಗುಡ್ಯಾರ್‌ಗಿ ವಾ ಕೊಣಾಚ್ಯಾಯ್ ಘರಾ ಪಾಟ್ಲ್ಯಾನ್‌ಗಿ, ತ್ಯಾ ಪಾವ್ಸಾಂತ್ ಭಿಜೊನ್ ಕೇದ್ ಜಾಲ್ಲಿಂ ಮಾತಿ ಗಜಿ-ಬಿಜಿ ಕರ್‍ನ್ ಗುಡ್ಡಾವ್ನ್, ತ್ಯಾ ಘಾಣ್ ಹುಂಬ್ಲ್ಯಾಚೆಂ ಮಾರ್ ಖಾವ್ನ್ ಜಿಡ್ಡೆ ಫುಲಾಂಗಿ, ದಾಸವಾಳಾಗಿ, ಮಿಟಾಯ್ ಫುಲಾಂಗಿ ಎಕ್ಟಾಂಯ್ ಕರ್‍ನ್ ಹಾಡ್ನ್ ಮಾಮ್ಮಿನ್ ದಿಲ್ಲ್ಯಾ ತ್ಯಾ ಕುರ್‍ಪೊಣ್ಯಾಂತ್ ರಾಸ್ ಘಾಲ್ಚಿಂ ಆಸ್‌ಲ್ಲಿಂ. ಸದಾನೀತ್ ಚಡ್ ಫುಲಾಂ ವ್ಹರ್‍ನ್ ಪಾದ್ರ್ಯಾಬಾಕ್ ಖುಶಿ ಕೆಲ್ಯಾರ್, ಫೆಸ್ತಾ ದಿಸಾ ಏಕ್ ಕೊಬು ಚಡ್‌ಚ್ ಮೆಳತ್ ಮ್ಹಳ್ಳ್ಯಾ ಇರಾದ್ಯಾನ್ ಹೆರಾಂ ಸಾಂಗಾತಾ ಮ್ಹಜೆಂ ಚಡ್ ಫುಲಾಂ ವ್ಹರ್‍ಚೆಂ ಕೊಂಪಿಟೀಶನ್. ತ್ಯಾ ದಿಸಾಂನಿ ಬಸ್ಸಾರ್ ಗೆಲ್ಯಾರ್ ಫುಲಾಂ ಬೊಶಿಯೆಂತ್ ದಾಳ್‌ಲ್ಲಿಂ ಜಡೊನ್ ಪಡ್ತಿತ್ ಆನಿ ಇಗರ್‍ಜಿಕ್ ಪಾವ್ತಾನಾ ಫಕತ್ ಬೊಶಿ ಮಾತ್ರ್ ಉರ್‍ತೆಲಿ ಮ್ಹಳ್ಳ್ಯಾ ಭಿಯಾನ್ ಇಗರ್‍ಜಿಕ್ ಚಲೊನ್‌ಚ್ ವೆಚೆಂ ಆಸ್‌ಲ್ಲೆಂ.ತವಳ್ಚ್ಯಾ ದಿಸಾಂನಿ ಆರ್‍ವಿಲ್ಯಾ ದಿಸಾಂಪರಿಂ ಸದಾಂನೀತ್ ಲಾಡು, ಜಿಲೆಬಿ, ಪಪ್ಸ್ ಮೆಳನಾತ್‌ಲ್ಲೆ. ಫಕತ್ ಆಕ್ರೆಚ್ಯಾ ದಿಸಾಚ್ಯಾ ಎಕಾ ಕೊಬಾಖಾತಿರ್ ಸದಾಂಯ್ ಫುಲಾಂ ವ್ಹರ್‍ಚಿಂ ಆಸ್‌ಲ್ಲಿಂ.
ಆಮ್ಚ್ಯಾ ಗಾಂವಾಂತ್ ಚಡಿತ್ ಮಾಫಾನ್ ಫೆಸ್ತಾಚಿ ತಯಾರಾಯ್ ಕರ್ಚಿ ಆಮ್ಚ್ಯಾ ಸ್ತ್ರೀಯಾನಿಂ. ಹಪ್ತ್ಯಾ ಪಯ್ಲೆಚ್ಚ್ ಸಾತೆಕ್ ವಚೊನ್ ಬೆಂಡೆ, ಅಲ್ಸಡ್ಡೆ, ಗೊಸಾಳೆಂ ಆನಿಂ ಹೆಂ-ತೆಂ ಮ್ಹಣೊನ್ ಜಾಯ್ ಜಾಲ್ಲ್ಯೊ ರಾಂದ್ವಾಯೆ ಹಾಡುನ್ ಕುಂಜ್ನಾಂತ್ ಅಟ್ಟಿ ಗಾಲ್ನ್ ದವರ್ತಾತ್. ಆಮ್ಚ್ಯಾ ಘರಾಂತಿಯ್ ಹ್ಯಾ ವಿಶ್ಯಾಂತ್ ಕಿತೆಂಯ್ ಪಾಟಿಂ ನಾಂತ್.ಪುಣ್ ಕಿತ್ಲಿ ತಯಾರಾಯ್ ಕೆಲ್ಲ್ಯಾರಿ,ಹಪ್ತ್ಯಾ ಪಯ್ಲೆಚ್ಚ್ ಗರ್ಜೆಚೊ ರಾಂದ್ಪಾಚೊ ಸಾಮಾನ್ ರಾಸ್ ಗಾಲ್ನ್ ದವರ್ಲ್ಯಾರೀ,ಫೆಸ್ತಾ ದಿಸಾ ಅಂಬಾಡೆ ರುಕಾರ್ ಥಾವ್ನ್ ಅಂಬಾಡೆ ಕಾಡ್ಚೆ ಕಾಮ್ ಮಾತ್ರ್ ಅಜೂನ್ ಪರ್ಯಾಂತ್ ಚುಕೊಂಕ್ ನಾ.


ಆಮ್ಕಾಂ ಯುವಜಣಾಂಕ್ ಮೊಂತಿ ಫೆಸ್ತಾ ದಿಸಾಚಿ ಖಂತ್‌ಚ್ಚ್ ವೆಗ್ಳಿಚ್ಚ್. ಆಮ್ಕಾಂ ನವಿಂ ಫಳಾಂ ಎಕ್ಟಾಯ್ ಕರ್ಚಿ ಖಂತ್ ನ್ಹಯ್, ಪುಲಾಂ ವ್ಹರ್ನ್ ಕೊಬು ಜೊಡ್ಚೊ ಖಂತ್ ನಾ, ಅಂಬಾಡ್ಯಾ ರುಕಾರ್ ಥಾವ್ನ್ ಅಂಬಾಡೆ ಕಾಡ್ಚೆ ಕಾಮ್ ಆಸ್ಲ್ಯಾರಿ ರಾಂದ್ಚಿ ಖಂತ್ ನಾಂಚ್ಚ್ ನಾ.ಆಮ್ಕಾಂ ಮೊಂತಿ ಫೆಸ್ತಾ ದಿಸಾ ಅಸ್ಚೊ ಎಕ್‌ಚ್ಚ್ ಖಂತ್ ಮ್ಹಳ್ಯಾರ್ ಫೆಸ್ತಾಚ್ಯಾ ಸಂಜೆಚೆ ಸಾಂಸ್ಕೃತಿಕ್ ಕಾರ್ಯೆ ಕಶೆಂ ಮಾಂಡುನ್ ಹಾಡ್ಚೆಂ?ಫಿರ್ಗಜಿಚ್ಯಾ ಲೋಕಾಂಕ್ ಕಶೆಂ ಇಪ್ರೆಸ್ಸ್ ಕರ್ಚೆ.ಹೆಂಚ್ಚ್ ಆಮ್ಚಿಂ ಭೋವ್ ವ್ಹಡ್ ಖಂತ್. ಆಮ್ಚ್ಯಾ ಗಾಂವಾಂತ್ 'ಮೊಂತಿ ಫೆಸ್ತ್' ಆಕೇರ್ ಜಾಂವ್ಚೆ ಆಮಿ ಯುವಜಣಾಂನಿ ಮಾಂಡುನ್ ಹಾಡ್ಚ್ಯಾ ಸಾಂಸ್ಕೃತಿಕ್ ಕಾರ್ಯಾ ಥಾವ್ನ್. ಹ್ಯಾಚ್ಚ್ ದಿಶೆನ್ ಪೋರ್ ಎಕ್ಲೊ ಮೊಂತಿ ಫೆಸ್ತಾ ದಿಸಾ ಸಂಜೆರ್ ಸಾಂಸ್ಕೃತಿಕ್ ಕಾರ್ಯೆ ನಾ ತರ್ ಫೆಸ್ತ್ ಥಂಡ್ ಜಾತಾ ಮ್ಹಣಾಲೊ.
ಮೊಂತಿ ಫೆಸ್ತಾ ದಿಸಾ ಆಮ್ಚ್ಯಾ ಗಾಂವ್ಚ್ಯಾ ಮಾಲ್ಗಡ್ಯಾಂಚಿ ತಯಾರಾಯ್ ವಿಶಿಷ್ಟ್. ತಾಂಚಿ ತಯಾರಾಯ್ ಆಪ್ಲ್ಯಾ ಕುಟ್ಮಾಂ ಸಾಂಗಾತಾ ಮೆಳೊನ್ ನವೆಂ ಜೆಂವ್ಕ್ ಅತ್ರೆಗಾನ್ ರಾಕೊನ್ ರಾಂವ್ಚಿ.ಸಂಸಾರಾಚ್ಯಾ ಪೊಂತಾಂ ಪೊಂತಾಂನಿಂ ವಾವ್ರಾ ಖಾತಿರ್ ಶಿಂಪಡ್ಲೆಲೆ ಕುಟ್ಮಾಚೆಂ ಸಾಂದೆ ಮೊಂತಿ ಫೆಸ್ತಾಕ್ ಅಪ್ಲ್ಯಾ ಘರಾಂ ಪಾಟಿ ಯೆತಾನಾ ತಾಂಕಾಂ ಜಾಂವ್ಚೊ ಸಂತೋಸ್ ಅಸೊ-ತಸೊ ನ್ಹಯ್.ಅಪ್ಲ್ಯಾ ಕುಟ್ಮಾಂಕ್ ಸರ್ವ್ ಅಡ್ಕಳೆ ಥಾವ್ನ್ ರಾಕೊನ್ ವ್ಹೆಲ್ಲ್ಯಾ ಸರ್ವೆಸ್ಪರಾಕ್ ಆರ್ಗಾ ಪಾಟೊವ್ನ್ ಕುಟ್ಮಾಂ ಜೆವಾಣ್ ಜೆಂವ್ತಾನಾ ಹ್ಯಾ ಆಮ್ಚ್ಯಾ ಮೊಂತಿ ಫೆಸ್ತಾಕ್ ವಿಶಿಷ್ಟ್ ಅರ್ಥ್ ಯೆತಾ.ಥೊಡ್ಯಾಕ್ ರಜೆಚ್ಯಾ ಅಡ್ಕಳೆ ಥಾವ್ನ್ ಫೆಸ್ತಾಕ್ ಹಾಜರ್ ಜಾಂವ್ಕ್ ಜಾಯ್ನಾತ್ಲ್ಯಾರ್ ತಾಂಕಾಂ ಫಿರ್ಗಜ್ ವಿಗಾರಾನ್ ಆಶಿರ್ವಾದಿತ್ ಕೆಲ್ಲೆ ನವೆಂ ಕನ್ಶ್ಯೊ ತಪ್ಪಾಲಾರ್ ಧಾಡ್ಚೆಯ್ ಆಮ್ಚ್ಯಾ ಗಾಂವಾಂತ್ ಅಜೂನಿಯ್ ದಿಸೊನ್ ಯೆತಾ.
ಆಜ್ ಆಮ್ಚೊ ಗಾಂವ್ ಆಜ್ ಸಭಾರ್ ಸಂಗ್ತಿಂನಿ ಬದಲ್ಲಾ.ಹಾಂಗಾಸರ್ ಮನ್ಶ್ಯಾಚಿಂ ಬದ್ಲಾವಣ್ ಜಾಲಾ.ನವಿಂ ಪಿಳ್ಗಿಂ ಹಾಂಗಾಸರ್ ಆಯ್ಲ್ಯಾ. ಶಿಕ್ಪಾಂತ್ ಬದ್ಲಾವಣ್ ಜಾಲ್ಯಾ. ಅರ್ಥಿಕ್ ಬದ್ಲಾವಣ್ ಘಡ್ಲ್ಯಾ. ಪುಣ್ ಮೊಂತಿ ಫೆಸ್ತ್ ಮಾತ್ರ್ ಬದ್ಲೊಂಕ್ ನಾ.ಆಮ್ಚ್ಯಾ ಸೊಡ್ವಣ್ದಾರ್ ಜೆಜುಕ್ರಿಸ್ತಾಚಿ ಅವಯ್ ಆನಿಂ ಆಮಾ ಸರ್ವಾಂಚಿ ಅವಯ್ ಜಾವ್ನಾಸ್ಚ್ಯಾ 'ಮರಿಯೆಚ್ಯಾ ಜಲ್ಮಾ ದಿಸಾಚಿ' ಪರಬ್ ಜಾವ್ನಾಸ್ಚೆ ಮೊಂತಿ ಫೆಸ್ತ್ ಆನಿಂ ಆಮ್ಚ್ಯಾ ಸಂಸ್ಕೃತೆ ಪರ್ಮಾಣೆ ಆಮಿ 'ನವೆಂ ಜೆಂವ್ಚಿ' ಪರಬ್, 'ಕುಟ್ಮಾಂಚೆ ಫೆಸ್ತ್' ಆನಿಂ 'ನವ್ಯಾ ಫಳಾಂಚಿ ಪರಬ್' ಮ್ಹಣೊನ್ ಅಜೂನಿಯ್ ದಬಾಜಾಯೆನ್ ಆಚರಣ್ ಕರ್ತಾತ್.ಹ್ಯಾ ಫೆಸ್ತಾಂತ್ ಮಾಲ್ಗಡ್ಯಾಂ ಸಂಸ್ಕೃತೆಚೊ ಸುವಾದ್ ಆಸಾ.ಕುಟ್ಮಾ ಸಂತೋಸಾಚೊ ನಾದ್ ಆಸಾ ಆನಿಂ ಸಾಂಗಾತಾ ಜೆಂವ್ಚ್ಯಾ ಜೆವ್ಣಾಚಿ ರೂಚ್ ಅಜೂನಿಯ್ ಆಸಾ.ತ್ಯಾಚ್ಚ್ ದೆಕುನ್ ಆಮ್ಚ್ಯಾ ಗಾವಾಂತ್ ಮೊಂತಿ ಫೆಸ್ತಾಚೊ ದಬಾಜೊ ಆಜೂನ್ ಪರ್ಯಾಂತ್ ಉಣೊ ಜಾಂವ್ಕ್ ನಾ ಜಾಯ್ಜೆಯ್ .

-ಮೆಲ್ವಿನ್ ಕೊಳಲ್‌ಗಿರಿ

('2014 ಆರ್ಸೊ ವಿಶೇಷ್'ಅಂಕ್ಯಾಚೊ ಪ್ರಕಟಿತ್ ಪ್ರಬಂಧ್)

'ಕೊಳಲ್‌ಗಿರಿ'ವಿಶಿಂ ಇಲ್ಲೆಶೆಂ...

ಕೊಂಕ್ಣೆಚ್ಯಾ ಚಡಾವತ್ ಲೇಖಕಾಂ ಪರಿಂ ಹಾಂವ್ ಯಿ ಮ್ಹಜ್ಯಾ ನಾಂವಾ ಪಾಟ್ಲ್ಯಾನ್ ಗಾಂವ್ಚೆ ನಾಂವ್ ಉಲ್ಲೇಕ್ ಕರ್ತಾ ಜಾಲ್ಲ್ಯಾನ್ ಮಂಗ್ಳುರ್ಚ್ಯಾ ಥೊಡ್ಯಾ ಕೊನ್ಶ್ಯಾ ಥಾವ್ನ್ ತಶೆಚ್ ಪರ್ಗಾವಾಂ ಥಾವ್ನ್ ಮ್ಹಜ್ಯಾ ವಾಂಚ್ಪ್ಯಾ ಮಿತ್ರಾನಿಂ ವಿಚಾರ್ಲೆ ಆಸಾ "ಹೊ 'ಕೊಳಲ್‌ಗಿರಿ' ಮ್ಹಳ್ಳೊಂ ಗಾಂವ್ ಖಂಯ್ಸರ್ ಆಸಾ?" ಮ್ಹಣೊನ್. 'ಕೊಳಲ್‌ಗಿರಿ' ಉಡುಪಿ ಜಿಲ್ಲ್ಯಾಂತ್ಲೊ ಏಕ್ ಲ್ಹಾನ್ ಗಾಂವ್,ಕಲ್ಯಾನ್ಪುರ್ ಉತ್ರೊನ್ ಬ್ರಹ್ಮಾವರ್ ಪಾಂವ್ಚ್ಯಾ ಮಾರ್ಗಾರ್ 2 ಕಿ.ಮಿ ಪಯ್ಣ್ ಕರ್ತಾನಾ ಕೆ.ಜಿ ರೋಡ್ ('ಕೊಳಲ್‌ಗಿರಿ' ರೋಡ್) ಮ್ಹಳ್ಳ್ಯಾ ಗುಂವ್ಡೆತ್ ಮುಖಾರ್ ಸರ್ತಾನಾ ಕೊಳಲ್ ಗಿರಿ ಗಾಂವ್ ಮೆಳ್ತಾ. ಆಮ್ಚ್ಯಾ ದಿಯೆಸಿಜೆ ಪರ್ಮಾಣೆ ಸಾಂಗ್ಚೆ ತರ್, ಉಡುಪಿ ದಿಯೆಸಿಜೆಚ್ಯಾ ಕಲ್ಯಾನ್ಪುರ್ ವಾರಾಡ್ಯಾಂತ್ ಆಸ್ಚಿಂ ಏಕ್ ಫಿರ್ಗಜ್ 'ಕೊಳಲ್‌ಗಿರಿ'. ರಾಜಕೀಯ್ ಜಾವ್ನ್ ಸಾಂಗ್ಚೆ ತರ್,ಉಡುಪಿ ವಿಧಾನ್ ಸಭಾ ಕ್ಷೇತ್ರಾಚ್ಯಾ ಉಡುಪಿ ತಾಲೂಕಾಂತ್ ಆಸ್ಚೊ ಗಾಂವ್.

ಹಿಂ ವಯ್ಲಿಂ ಮಾಹೆತ್ ದಿಲ್ಲ್ಯಾ ತಕ್ಷಣ್ ಥೊಡ್ಯಾನಿಂ "'ಕೊಳಲ್‌ಗಿರಿ' ನಾಂವಾಚಿ ಚರಿತ್ರಾ ಮ್ಹಣಿಂ ಆಸಾಗಿ? ''ಕೊಳಲ್‌ಗಿರಿ'' ಕೊಳಲು ಆಸಾಗಿ? ಗುಡೊ ಆಸಾಗಿ? ತೆಂ ನಾಂವ್ ಕಶೆಂ ಆಯ್ಲೆಂ? ತಾಚ್ಯಾ ಪಾಟ್ಲ್ಯಾನ್ ಕಸ್ಲಿಯ್ ಕಾಣಿ ಮ್ಹಣಿ ಆಸಾಗಿ?" ಆಶೆಂ-ತಶೆಂ ಮಾಹೆತ್ ಅಪ್ಣಾವ್ಚ್ಯಾ ದಿಶೆನ್ ವಿಚಾರ್ಲೆ ಆಸಾ.ತಶೆಂ ವಿಚಾರ್ತಾನಾ ಮ್ಹಾಕಾ ತಾಂಕಾಂ ಆಮ್ಚ್ಯಾ ಗಾಂವ್ಚ್ಯಾ ವಿಶಿಂ ಮಾಹೆತ್ ದಿಂವ್ಕ್ ಕಸ್ಲೆಚ್ ದಾಕ್ಲೆಂ ಮ್ಹಜ್ಯಾ ಲಾಗಿಂ ನಾಂತ್ಲೆ.ಜಾಳಿಜಾಗ್ಯಾಚೆರ್ ಆಮ್ಚ್ಯಾ ಗಾಂವಾವಿಶಿಂ ಸೊಧ್ನಾಂ ಕರ್ನ್ ಮಾಹೆತ್ ಜೊಡ್ಯಾ ಮ್ಹಳ್ಳ್ಯಾರ್,ಆಮ್ಚ್ಯಾ ಗಾಂವಾಕ್ ಸಂಬಂಧಿತ್ ಖಬರ್ ಆನಿಂ ತಸ್ವಿರೆಂ ಮಾತ್ರ್ ಮ್ಹಾಕಾ ಲಾಭ್ಲೆ ಶಿವಾಯ್ ಆನಿ ಕಿತೆಚ್ ಲಾಭೊಂಕ್ ನಾ. ತಶೆಂ ಮ್ಹಣೊನ್ ಜಾಳಿಜಾಗ್ಯಾಂತ್ ಆಮ್ಚ್ಯಾ ಗಾಂವ್ಚ್ಯಾ ವಿಶಿಂ ಉಲ್ಲೇಕ್ ಕರುಂಕ್ ಆಮ್ಚೊ ಗಾಂವ್ ಕಾಂಯ್ ಚಾರಿತ್ರಿಕ್ ನ್ಹಯ್.ಶೆಕ್ಡ್ಯಾಚ್ಯಾಂ ಆದಿಂ ಖಂಚಾಯ್ ಏಕ್ ರಾಯಾಚ್ಯಾ ಸಾಮ್ರಾಜ್ಯಾಚಾ ಆಸ್ರ್ಯಾಖಾಲ್ ಆಸೊನ್ ಉಪ್ರಾಂತ್ ಬ್ರಿಟಿಷಾಚ್ಯಾ ಆಡಳಿತಾಖಾಲ್ ಆಸ್ಲೊ ಏಕ್ ಲ್ಹಾನ್ ಗಾಂವ್ ಮ್ಹಳ್ಳೊ ಮ್ಹಜಿ ಆಭಿಪ್ರಾಯ್. ಹಾಚೆ ಶಿವಾಯ್ ಕೆನರಾ ಕರಾವಳಿಂತ್ ಆಡಳಿತ್ ಚಲಯ್ಲಾ ರಾಯಾಚ್ಯಾಂ ಆಸ್ರ್ಯಾಖಾಲ್ ಖಂಡಿತ್ ಜಾವ್ನ್ ಆಮ್ಚೊ ಗಾಂವ್ ಆಸ್ಲೊಚ್ ಮ್ಹಣ್ಚ್ಯಾಕ್ ಮ್ಹಾಕಾ ದುಬಾವ್ ನಾ.ದೆಕುನ್ ಹ್ಯಾ ರಾಯಾಚ್ಯಾ ಚರಿತ್ರೆ ವಿಶ್ಯಾಂತ್ ಸವಿಸ್ತಾರ್ ಆಧ್ಯಯನ್ ಕೆಲ್ಯಾರ್ ಖಂಯ್ ಪಣಿಂ ಆಮ್ಚ್ಯಾ ಗಾಂವಾ ವಿಶ್ಯಾಂತ್ ಥೊಡಿಂ ಮ್ಹಣಿ ಮಾಹೆತ್ ಲಾಭೊಂಕ್ ಪುರೊ.

ಪಾಟ್ಲ್ಯಾ ಥೊಡ್ಯಾಂ ಮಹಿನ್ಯಾ ಪಯ್ಲೆ 'ಕೊಳಲ್‌ಗಿರಿ' ನಾಂವಾಚ್ಯಾ ಪಾಟ್ಲ್ಯಾನ್ ಆಸ್ಚಿಂ ಚರಿತ್ರಾಂ ಸೊಧುನ್ ಕಾಡ್ಚಿಂ ಆಸಕ್ತ್ ಮ್ಹಾಕಾ ಉದೆಲ್ಲಿಂ.ದೆಕುನ್ ಸುರ್ವೆರ್ ಆಮ್ಚ್ಯಾ ಗಾಂವ್ಚ್ಯಾ ಥೊಡ್ಯಾ ಮಾಲ್ಗಡ್ಯಾ ಲಾಗಿಂ ಉಲೊವ್ನ್ ಥೊಡಿಂ ಮಾಹೆತ್ ಅಪ್ಣಾಯ್ಲ್ಯಾ ಉಪ್ರಾಂತ್ ಗಾಂವಾತ್ ಆಸ್ಚ್ಯಾ ಸಿದ್ಧಿವಿನಾಯಕ ದಿವ್ಳಾಕ್ ಸಂಬಂಧಿತ್ ಏಕ್ ಮಾಲ್ಗಡ್ಯಾ ಮಾನೆಸ್ತಾ ಲಾಗಿಂ ಮೆಳ್ತಾನಾ ತಾಣೆಂ ಮ್ಹಾಕಾ ಉಡುಪಿಚ್ಯಾ ಕೃಷ್ಣಾ ಮಠಾಕ್ ಗೆಲ್ಯಾರ್ ಕಾಯ್ ಇಲ್ಲಿಶಿಂ ಮಾಹೆತ್ ಮೆಳಾತ್ ಮ್ಹಣ್ ಸಲಹಾ ದಿಲ್ಲಿಂ. ಆಶೆಂ ತಾಚ್ಯಾ ಸಲಹಾ ಪರ್ಮಾಣೆ ಮಠಾಕ್ ವ್ಹಸೊನ್ ಮಾಹೆತ್ ಅಪ್ಣಾವ್ಕ್ ಪ್ರೇತನ್ ಕರ್ತಾನಾ ಏಕಾ ಮ್ಹನ್ಶ್ಯಾ ಥಾವ್ನ್ ಇಲ್ಲಿಶಿಂ ಮಾಹೆತ್ ಲಾಭ್ಲಿ ತರಿಯ್ ಉಡುಪಿಚ್ಯಾ ಏಕಾ ಆದ್ಲ್ಯಾ ಸ್ವಾಮಿನ್ ಬರಯ್ಲಾ ಪುಸ್ತಕಾಂತ್ ಆನಿ ಥೊಡಿಂ ಮಾಹೆತ್ ಮೆಳೊಂಕ್ ಪುರೊ ಮ್ಹಣ್ ತಾಣೆಂ ಸಾಂಗ್ ಲೆ ಆಸಾ ಅನಿಂ ತಸ್ಲಿಂ ಮಾಹೆತ್ ಆಸ್ಲ್ಯಾರ್ ತಾಚಿ ಜೆರಾಕ್ಸ್ ಪ್ರತಿ ಮ್ಹಾಕಾ ದಿತಾ ಮ್ಹಳ್ಳೆಂ. ಮುಕಾರ್ ಸರೊನ್ ಥೊಡ್ಯಾ ಕಾರಣಾಕ್ ಲಾಗುನ್ ಮ್ಹಜಿ ಆನಿಂ ತಾಚಿ ಭೆಟ್ ಪರತ್ ಜಾಂವ್ಕ್ ನಾ ಜಾಲ್ಯಾರಿಯ್ ಮುಕ್ಲ್ಯಾ ದಿಸಾನಿಂ ತಾಕಾ ಮೆಳೊನ್ ಮಾಹೆತ್ ಜೊಡ್ಚೆಂ ಚಿಂತಪ್ ಖಂಡಿತ್ ಆಸಾ.

ಥಂಯ್ ಹಾಂಗಾ 'ಕೊಳಲ್‌ಗಿರಿ' ಗಾಂವ್ಚ್ಯಾ ನಾಂವಾ ವಿಶ್ಯಾಂತ್ ಆಯ್ಕಾಲ್ಲಿ ಮಾಹೆತ್...

ಗಿರಿ ನಾಂವಾಚ್ಯಾ ಗುಡ್ಯಾಕ್ 'ಕೊಳಲ್‌ಗಿರಿ' ಮ್ಹಳ್ಳೆಂ ನಾಂವ್ ಕಶೆಂ ಆಯ್ಲೆಂ? ಕೊಣೆಂ ದಿಲ್ಲೆಂ? ಮ್ಹಳ್ಳೊಂ ಚಾರಿತ್ರಿಕ್ ದಾಕ್ಲೊ ಲಾಭೊಂಕ್ ನಾ ತರಿಯ್ ಏಕಾ ತೊಡ್ಪಾಶಿ ಕಾಣಿಯೆ ಪ್ರಕಾರ್ ಆತಾಂ ಆಸ್ಚೆಂ ಸಾಂ. ಫ್ರಾನ್ಸಿಸ್ ಸಾವೆರಾಚೆ ಇಸ್ಕೊಲ್,ಕೊಳಲ್‌ಗಿರಿ ಹಾಚೆ ಪರ್ನೆ ಬಾಂದಾಪ್(ಆತಾಚೆ ನ್ಹಯ್) ಆಸ್ಲ್ಯಾ ಕಡೆಂ ಉಡುಪಿಚ್ಯಾ ಶಿರೂರು ಮಠಾಕ್ ಸಂಬಂಧಿತ್ ಕೊಳಲು ಕೃಷ್ಣಾಚೆ ದೀವ್ಳ್ ಆಸ್ಲ್ಯಾನ್ 'ಕೊಳಲ್‌ಗಿರಿ' ಮ್ಹಳ್ಳೆಂ ನಾಂವ್ ಆಯ್ಲೆಂ ಮ್ಹಣ್ತಾತ್.ಹೆಂ ದೀವ್ಳ್ ಖಂಚಾಯ್ ಎಕಾ ಪರಿಸ್ಥಿತೆಕ್(ಪ್ರಮುಖ್ ಜಾವ್ನ್ ಝುಜ್)ಬಲಿ ಜಾವ್ನ್ ದೆಸ್ವಾಟ್ ಜಾಲಾ ಆಸ್ತೆಲೆ ಮ್ಹಳ್ಳಿಂ ಪಾತ್ಯೆಣಿ ಥೊಡ್ಯಾಚಾ ಚಿಂತ್ಪಾತ್ ಆಸಾ. ಹಾಚೆ ಶಿವಾಯ್ ಆಮ್ಚೆಂ ಮಾಲ್ಗಡೆ ತವಳ್ ಇಸ್ಕೊಲಾಕ್ ವೆತಾನಾ ಹ್ಯಾ ದಿವ್ಳಾಕ್ ರುಜ್ವಾತ್ ದಿಂವ್ಕ್ ಕೊಳಲು ಕೃಷ್ಣಾಚಿ ಎಕ್ ಇಮಾಜ್ ಥಂಯ್ಸರ್ ಆಸ್ಲಿಂ ಪಳೆಯ್ಲಾ ಮ್ಹಳ್ಳೆಯ್ ಆಸಾ.ಹಾಚೆ ಶಿವಾಯ್ ಕೊಳಲ್‌ಗಿರಿಚೊ ಚಡಾವತ್ ಜಾಗೊ ಪುರಾತನ್ ಕಾಳಾರ್ ಥಾವ್ನ್ (ಆತಾಯ್ ಥೊಡೊ)ಉಡುಪಿಚ್ಯಾ ಕೃಷ್ಣ ಮಠಾಚ್ಯಾ ಶಿರೂರ್ ಮಠಾಕ್ ಸಂಬಂಧಿತ್ ಜಾವ್ನಾಸ್ಲೊ ಆನಿಂ ಕೃಷ್ಣಾಚೆ ದಿವ್ಳ್ ಆಸ್ಲ್ಯಾನ್ ಹ್ಯಾ ಗುಡ್ಯಾಕ್(ಗಿರಿ) ಕೊಳಲ್‌ಗಿರಿ ಮ್ಹಳ್ಳೆಂ ನಾಂವ್ ಆಯ್ಲಾ ಮ್ಹಣ್ತೆಲೆಯ್ ಸಭಾರ್ ಆಸಾತ್.

ಹಿಂ ವಯ್ಲಿ ಮಾಹೆತ್ ಜೊಡ್ಲ್ಯಾ ಉಪ್ರಾಂತ್ ಚಡಿತ್ ಮಾಹೆತ್ ಜೊಡುಂಕ್ ಮ್ಹಾಕಾ ಜಾಂವ್ಕ್ ನಾ ತರಿಯ್ ’ಕೊಳಲ್ ಗಿರಿ’ ಗಾಂವ್ಚ್ಯಾ ನಾಂವಾ ವಿಶಿಂ ಸೊಧ್ನಾಂ ಚಾಲು ಆಸಾ....

('ಕೊಳಲ್‌ಗಿರಿ' ಚ್ಯಾ ಯಾ ಚರಿತ್ರಾ ಕಳಿತ್ ಆಸ್ಲಿಂ ಕೊಣಿಯ್ ಹ್ಯಾ ವಿಶಿಂ ಪೂರಕ್ ಮಾಹೆತ್ ದಿಂವ್ಕ್ ಅಪೇಕ್ಷಿತಾತ್ ತರ್  melwinkolalgiri.com ಕ್  ಮೇಲ್ ಕರ್ಚೆ)

-ಮೆಲ್ವಿನ್ ಕೊಳಲ್‌ಗಿರಿ