ಸದಾಶಿವ'ಚೊ ಧನಿ ಆನಿ ವಿಜಯ ಮಲ್ಯ

ಸದಾಶಿವ ಹ್ಯಾ ದಿಸಾನಿಂ ಆಮ್ಗೆರ್ ಸಾಗೊಳೆಚ್ಯಾ ಕಾಮಾಕ್ ಯೆಂವ್ಚೊ ಕಾಮಾಗಾರ್.ವಾಂವ್ಟಿ ಮ್ಹನಿಸ್.ದೋನ್-ತೀನ್ ವರ್ಸಾಂ ಪುಡೆಂ ತೊ ಕಲ್ಯಾನ್ಪುರ್'ಚ್ಯಾ ಎಕಾ ಟೈಲ್ಸ್ ಕಂಪೆನಿಂತ್ ಮ್ಹಣ್ಜೆಂ ನಳ್ಯಾಂಚಾ ಪ್ಯಾಕ್ಟ್ರೆಕ್ ಕಾಮಾಕ್ ವೆತಾಲೊ.ಉಪ್ರಾಂತ್ ತಿಂ ಪ್ಯಾಕ್ಟರಿ ಬಂಧ್ ಜಾವ್ನ್ ಆತಾಂ ತೊ ಗಿಮ್ಶಿಲ್ಯಾ ದಿಸಾನಿಂ ಆಮ್ಚ್ಯಾಚ್ ಗಾಂವ್ಚ್ಯಾ ಕಾಜುಬಿಯಾಂಚ್ಯಾ ಪ್ಯಾಕ್ಟ್ರೆಕ್ ಕಾಮಾಕ್ ವೆತಾ.ಹ್ಯಾ ಪಾವ್ಶಿಲ್ಯಾ ದಿಸಾನಿಂ ಪ್ಯಾಕ್ಟ್ರೆಂತ್ ಕಾಜುಬಿಯೊ ನಾಂತ್ ಆನಿಂ ಇತರ್ ಕಾಮ್'ಯ್ ನಾ ಮ್ಹಣುನ್ ತ್ಯಾ ಪ್ಯಾಕ್ಟ್ರೆಚ್ಯಾ ಸರ್ವ್ ಕಾಮಾಗಾರಾಂಕ್ ಧನಿಯಾನ್ ರಜಾ ದಿಲಾ.ದೆಕುನ್ ಹ್ಯಾ ದಿಸಾನಿಂ ಥಂಯ್ಸರ್'ಚಿ ಕಾಮಾಗಾರಾಂ ಹೆರ್ ಸುವಾತೆನಿಂ ಕಾಮಾಕ್ ವೆತಾತ್.ತಶೆಂ ಸದಾಶಿವ ಆಮ್ಚ್ಯಾ ಗಾಂವಾಂತ್ ಕೊಣೆಯ್ ಅಪಯ್ಲ್ಯಾರಿಯ್ ಸಾಗೊಳೆಚ್ಯಾ ಕಾಮಾಕ್ ಯೇವ್ನ್ ಪಾವ್ತಾ.

ಕಾಲ್ ಆಮ್ಚೆಂ ಗಾದೆಂ ಕೊಸುಂಕ್ ಆಸ್ಲೆಂ.ಗಾದೆ ಕೊಸ್ಚೆಂ ಆಮ್ಚ್ಯಾ ಸೆಜಾರ್ಚ್ಯಾ ನವೀನಾನ್.ಪುಣ್ ಕೊಸ್ತಾನಾ ದೇಗ್'ಯ್ ಕಾಡಿಜೆ ನೆ.ದೆಕುನ್ ದೇಗ್ ಕಾಡುಂಕ್ ಆನಿಂ ಇಲ್ಲೇಶೆ ಗಾದ್ಯಾಂಕ್ ಸಾರೆಂ ವ್ಹಾವಂವ್ಕ್ ತೊ ಕಾಲ್ ಆಮ್ಗೆರ್ ಎಕಾ ದಿಸಾಚ್ಯಾ ಕಾಮಾಕ್ ಆಯಿಲ್ಲೊ.ಸಕಾಳಿಂಚೊ ನಾಸ್ಟೊ,ದನ್ಪರಾಚೆ ಜೆವಾಣ್ ಆನಿಂ ಸಾಂಜೆಚಿ ಚಾ ಆಮ್ಗೆರ್‌ಚ್.ತಶೆಂ ಕಾಲ್ ದನ್ಪರಾಚೆ ಜೇವ್ನ್,ಇಲ್ಲೆಶೆ ಸುಧಾರ್ಸಿತಾನಾ ಮ್ಹಜೊ ಆನಿಯೆಕ್ ಮಿತ್ರ್ ಪೊಸ್ಟ್‌ಮೆನ್ 'ಆರ್ಸೊ' ಪತ್ರ್ ಘೇವ್ನ್ ಆಮ್ಗೆರ್ ಪಾವ್ಲೊ.ಹ್ಯಾ ಆಂಕ್ಯಾಚಾ ಆರ್ಸೊ ಪತ್ರಾರ್ ಫ್ರಾನಿಸ್ ಕಾಸ್ಸಿಯಾಚೆ 'ಮಂಗ್ಳುರ್ಚೆ ನಳೆಂ' ವಿಶ್ಯಾಂತ್ಲೆ ಲೇಖನ್ ವಯ್ಲ್ಯಾ ವಯ್ರ್‌ಚ್ ಪಳೆವ್ನ್  " ಸದಾಶಿವೆ'ರ್ ಇಂದೆ ಎಕಲ್ನ ಕೊಂಕಣಿ ಪೇಪರ್ಡ್ ವಡಿಲ್ದಾ ವಿಶಯೊಡ್ ಲೇಖನಾ ಬಯ್ದ್‌ಡ್" ಮ್ಹಣುನ್ ತಾಕಾ ಸಾಂಗ್ಲೆಂ.

ತಾಕಾ ಜಾಪ್ ದೀವ್ನ್  "ಎಕಲ್ನಾ ಪ್ಯಾಕ್ಟ್ರಿದ ಬಗ್ಗೆ ಬಯ್ದ್‌ಡಾ?" ಮ್ಹಣುನ್ ತೊ ವಿಚಾರಿ.

"ನೀಗಲ್ನಾ ಆತ್ತ್.ಇಂಚೆನೆ ಚೂರ್ ಮಾಹಿತಿ ಕೊರ್ದ್ ಬರೆತೆರ್" ಮ್ಹಣ್ ಹಾಂವೆ ಮ್ಹಳ್ಳೆಂ.

"ಎಕಲ್ನಾ ಪ್ಯಾಕ್ಟ್ರಿದ ಬರೆವೊಡ್ ಆಂಡಾ ಎಡ್ಡೆನೆ ಬರೆವೊಡ್" ತೊ ಮ್ಹಣಾಲೊ.

"ದಾಯೆಗ್ ಪನ್ಪಾರ್?" ಹಾಂವೆ ವಿಚಾರ್ಲೆ

"ಎಕಲ್ನಾ ಎಂಚಿನ ಎಡ್ಡೆ ದಾನಿಯೆ? ಎರೆಗ್ಲಾ ತಿಕ್ಕಯೇರ್.ನಮ ಬೆಲೆದಗಲೇಗ್ ಲಾಸ್ಟ್ ಮುಟ್ಟಾಲಾ ಬುಡ್ದ್ ಪಾಡ್ದಿಜೆರ್... "ಮ್ಹಣುನ್ ತ್ಯಾ ಪ್ಯಾಕ್ಟ್ರಿಚ್ಯಾ ಧನಿಯಾ ವಿಶ್ಯಾಂತ್ ತಾಣೆಂ ಸಾಗೊಂಕ್ ಸುರು ಕೆಲೆಂ.

****

ಕಲ್ಯಾನ್ಪುರ್'ಚಿ ನಳ್ಯಾಂಚಿ ಪ್ಯಾಕ್ಟರಿ ಸಭಾರ್ ವರ್ಸಾಂಚಿ ಚರಿತ್ರಾ ಆಸ್ಚಿಂ.ಲಾಗಿಂ-ಲಾಗಿಂ ದೆಡ್ಶ್ಯಾಂ ವಯ್ರ್ ಕಾಮಾಗಾರ್ ಪ್ಯಾಕ್ಟ್ರಿ ಬಂಧ್ ಜಾಂವ್ಚ್ಯಾ ಪರ್ಯಾಂತ್ ಘೊಳುನ್ ಆಸ್ಲೆಂ ಖಂಯ್.ಸದಾಶಿವ'ಯ್ ಧಾ-ಭಾರಾ ವರ್ಸಾಂ ಥಾವ್ನ್ ಥಂಯ್ ಕಾಮಾಕ್ ಆಸ್ಲೊ ಮ್ಹಣುನ್ ತೊಚ್ ಮ್ಹಣ್ತಾ.ಆತಾಂ ವಾಡೊನ್ ಯೆಂವ್ಚ್ಯಾ ಪರಿಗತೆಂತ್ ಟೆರೆಸ್ ಘರಾಂ,ಫ್ಲೆಟಾಂ ಮ್ಹಣುನ್ ನಳ್ಯಾಂಚಿ ಗರ್ಜ್ ಉಣಿಂ ಜಾಲಾ.ಆನಿಂ ಹೊ ವಿಷಯ್ ಆಮ್ಕಾಯ್ ಖಳಿತ್ ಅಸ್ಚೊಚ್ ಮ್ಹಣ್ಯಾಂ.ಹ್ಯಾ ಪಾಸುನ್ ಥೊಡೆಂ ಉತ್ಪನ್ನ್ ಜಾಲ್ಲೆಂ ನಳೆಚ್ ವಿಕುನ್ ವಸಾನಾತ್ಲೆಂ,ಪ್ಯಾಕ್ಟ್ರೆಂತ್‌ಚ್ ದಾಸ್ತಾನ್ ಜಾತೆಲೆಂ ಖಂಯ್.ಆಶೆಂ ಪ್ಯಾಕ್ಟ್ರಿ ನಷ್ಟಾನ್ ಚಲ್ತೆಲಿಂ.ತರಿಯ್ ಥಂಯ್ ಘೊಳ್ಚ್ಯಾ ಕಾಮಾಗಾರಾಕ್ ಮಹಿನ್ಯಾಚೊ ಸಾಂಬಾಳ್ ವೇಳಾರ್ ಕಾಮಾಗಾರಾಂಕ್ ಕಿತೆಚ್ ತಕ್ರಾರ್ ನಾಸ್ತಾನಾ ಪಾವೊ ಜಾತಾಲೊ ಖಂಯ್.ತ್ಯಾ ಪಾಕ್ಟ್ರಿಚ್ಯಾ ಧನಿಯಾಚೆ ಪೂತ್ ಆಸ್ಟ್ರೆಲೀಯಾ,ಆಮೇರಿಕ್'ಂತ್ ಕಾಮಾಕ್ ಆಸ್ಲೆಂ ಮ್ಹಣ್ತಾ ಸದಾಶಿವ.ತ್ಯಾ ದೆಕುನ್'ಚ್ ಧನಿಯಾಕ್ ಸಾಂಬಾಳ್ ದೀಂವ್ಕ್ ಸಲೀಸ್ ಜಾತೆಲೆಂ.ಪ್ಯಾಕ್ಟರಿಚ್ಯಾ ಆಕ್ರೇಚಾ ದಿಸಾನಿಂ ಕಿತೆಂ ತೆಂ ಪ್ಯಾಕ್ಟರಿ ಥಾವ್ನ್ ಇನ್‌ಕಾಮ್ ಯೆತಾಲೆಂ ತೆಂ ಕಾಮಾಗಾರಾಕ್‌ಚ್ ತೊ ಧನಿ ದಿತಾಲೊ ಖಂಯ್.ಆಶೆಂ ಕ್ರಮೇಣ್ ಪ್ಯಾಕ್ಟರಿಚೊ ಧನಿ ಪ್ರಾಯೆಸ್ತ್ ಜಾವ್ನ್ ಯೆತಾನಾ,ತಾಚ್ಯಾ ಭುರ್ಗ್ಯಾನಿಂ ತಿಂ ಪ್ಯಾಕ್ಟರಿ ಬಂಧ್ ಕರುಂಕ್ ಉಲೊ ದಿಲೊ ಖಂಯ್.ಪುಣ್ ಧನಿಯಾನ್ ಸುರ್ವೆರ್ ನಾಖುಶೆನ್ ಉಪ್ರಾಂತ್ ಪ್ರಾಯ್ ಆನಿಂ ಭಲಾಯ್ಕೆಚ್ಯಾ ಕಾರಣಾ ನಿಮ್ತಿ ಪ್ಯಾಕ್ಟರಿ ಬಂಧ್ ಕರ್ಚೊ ನಿರ್ಧಾರ್ ಘೆತ್ಲೊ ಮ್ಹಣ್ತಾ.ಪುಣ್ ಪ್ಯಾಕ್ಟರಿ ಬಂಧ್ ಕರ್ತಾ ಮ್ಹಣುನ್ ಕಾಮೆಲ್ಯಾಂಕ್ ಸಭಾರ್ ಮಹಿನ್ಯಾ ಆದಿಚ್ ಸೂಚನ್ ದೀವ್ನ್,ಉಪ್ರಾಂತ್ ಕಾಮೆಲ್ಯಾಂಚೊ ಸರ್ವ್ ಸಾಂಬಾಳ್,ಭವಿಷ್ಯ್ ನಿಧಿ ಆನಿಂ ಇತರ್ ಕಿತೆಯ್ ಆಸ್ಲೆಂ ತೆಂ ಕಾಮೆಲ್ಯಾಂಕ್ ಪಾವೊ ತ್ಯಾ ವೇಳಾರ್ ಧನಿಯಾನ್ ಪಾವಿತ್ ಕೆಲ್ಲೆಂ ಖಂಯ್.ಇತ್ಲೆಚ್ ನ್ಹಯ್ ಸದಾಶಿವ'ನ್ ಸಾಂಗ್ಚೆ ಪ್ರಕಾರ್ ತಿ ಪ್ಯಾಕ್ಟರಿ ಆಸ್ಚೊ ಜಾಗೊ ವಿಕುನ್ ತಾಚೊ ಐವಜ್ ಥಂಯ್ ಚಡಾವತ್ ವರ್ಸಾ ಥಾವ್ನ್ ಕಾಮ್ ಕರುನ್ ಆಸ್ಚ್ಯಾ ಥಾವ್ನ್ ನಿಮಾಣ್ಯಾ ಪರ್ಯಾಂತ್ ವಾಂಟುನ್ ದಿಲಾ ಖಂಯ್.ಆಮ್ಚ್ಯಾಚ್ ಗಾಂವಾಂತ್ ಭಾಡ್ಯಾಚಾ ಘರಾ ಆಸ್ಚೊ ಎಕ್ಲೊ ಗೌಡ ತೊ ತೀನ್ ವರ್ಸಾ ಥಾವ್ನ್ ಥಂಯ್ ಕಾಮಾಕ್ ಆಸ್ಲೊ ತಾಕಾ ಸಾಟ್ ಹಜಾರ್ ರುಪಾಯ್ ಮ್ಹಣಾಸರ್ ಪ್ಯಾಕ್ಟ್ರಿ ಬಂಧ್ ಜಾತೆತ್‌ ಪ್ರಾಪ್ತ್ ಜಾಲ್ಯಾತ್ ಖಂಯ್.

ಮುಕಾರುನ್ "ಎನಾನ್ ಬೊಕ್ಕ್ ಎನ್ನಾ ಪ್ಯಾಕ್ಟ್ರಿನ್ ನಂಬ್‌ದ್ ನಿಗುಲ್ ಮೂಲ್ ಬ್ಯಾಲೆ ಮಲ್ತೊಂದ್ ಇತ್ತರ್, ಉಂದು ಬ್ಯಾಲೆ ನಂಬುದು ಕೆಲವೆರ್ ಬ್ಯಾಂಕ್‌ಡ್ ಸಾಲ ಗೆಯ್ದಾರ್,ಕೆಲವೆರ್ ಜೊಕುಲೆನ್ ಇಂಗ್ಲೀಷ್ ಮಿಡಿಯಮ್ ಶಾಲೆಗ್ ಪಡ್ದಾರ್ ನಿಗಲೆಗ್ ಬೊಂಗಾಂ ಆವೆರೆಗ್ ಬಲ್ಲಿ,ಎನಾನ್ ಎನ್ನ ಜೊಕುಲ್ ತಾಂಕುವೆರ್,ಆಯಿಕೆ ಮೂಲ್ತ ಪುರಾ ನಿಗಲೆಗ್ ಬಟ್‌ದ್ ಕೊರ್ಪಿನಿ" ಮ್ಹಣುನ್ ಸದಾಶಿವ ತಾಚ್ಯಾ ಧನಿಯಾನ್ ಸಾಂಗ್ಲೆಲಿ ಉತ್ರಾಂ ಪರತ್ ಮ್ಹಜೆಶಿ ಸಾಂಗ್ತಾನಾ ತಾಚ್ಯಾ ದೊಳ್ಯಾಂತ್ ಮಂದ್ ಉದಾಕ್ ದೆಂವ್ಲೆ.

ಆನಿ ಮ್ಹಾಕಾ ಕಿಂಗ್ ಫಿಶರ್ ಎರ್‌ಲೈನ್ಸ್'ಚೊ ಧನಿ ವಿಜಯ ಮಲ್ಯ ಆನಿಂ ತಾಚ್ಯಾ ಕಾಮೆಲ್ಯಾಂಚೊ ಉಡಾಸ್ ಆಯ್ಲೊ.

-ಮೆಲ್ವಿನ್ ಕೊಳಲ್‌ಗಿರಿ