ಪಪ್ಪನ್ ಲಿಕ್ಲೆಲಿ ಏಕ್ ಪರ್ನಿ ಕಾಣಿ

ಹಾಂವ್ ಆನಿ ತೆಂ

                                                  

                                                                    -ಮಾವ್ರಿಸ್ ಮಸ್ಕರೇನ್ಹಸ್,ಕೊಳಲ್‌ಗಿರಿ 
                                                                                  (ಮಾಮಾ ಕೊಳಲ್‌ಗಿರಿ )

ಹಾಂವ್! ವ್ಹಯ್,ಹಾಂವ್ ಮ್ಹಳ್ಯಾರ್ ಹಿ ಕಥಾ ಸಾಂಗ್ತಾಲೊ ಕಾಣಿಯೆಚೊ ನಾಯಕ್.ಎಕಾ ಖಾಸ್ಗಿ ಬೆಂಕಾಂತ್ ಹಾಂವ್ ಕಾಮ್ ಕರ್ತಾಂ.ಆನಿ ತೆಂ!ಮ್ಹಳ್ಯಾರ್ ಹಾಂವೆಂ ಮೋಗ್ ಕೆಲ್ಲಿ ಚಲಿ ಲೀನಾ.’ತೆಂ’ಮ್ಹಣ್ಚ್ಯಾಕಿಯ್ ’ತಿ’ ಮ್ಹಣ್ಚೆಂಚ್ ಮ್ಹಾಕಾ ಪಸಂಧ್ ಜಾತಾ ಆನಿಂ ತೃಪ್ತಿ ದಿತಾ.ಕಿತ್ಯಾಕ್,ತಿ ಏಕ್ ಶಿಕ್ಷಕಿ ವ ಟೀಚರ್ ಜಾಲ್ಯಾ ಆತಾಂ.ಫಿರ್ಗಜೆಚ್ಯಾ ಇಸ್ಕೊಲಾಂತ್ ಕಾಮ್ ಕರ್ತಾ.ಹಾಂವ್ ಏಕ್ ಸಾದೊ ಕ್ಲಾರ್ಕ್ ಗುಮಾಸ್ತ್ ಆನಿಂ ತೆಂ ಟೀಚರ್.

*****

ಹಾಂವ್ ಉಡ್ಪಿಂತ್ ಕೊಲೆಜ್ ಶಿಕ್ಚೊ ತೊ ವೇಳ್ ಆನಿ ತೆಂ ಉಡ್ಪಿಂತ್ ಆಸ್ಚ್ಯಾ ಮಾದ್ರಿಚ್ಯಾ ಟೀಚರ್ಸ್ ಟ್ರೈನಿಂಗ್ ಸ್ಕೂಲಾಂತ್ ತರ್ಭೆತಿ ಜೊಡ್ತಾಲೆಂ.ಹಾಂವ್ ಸದಾಂಯ್ ಘರಾ ವೆತಾಲೊ.ತೆಂ ಥಂಯ್ಚ್ ರಾವ್ತಾಲೆಂ.ಹಪ್ತ್ಯಾಕ್ ಏಕ್’ಗಿ ದೋನ್ ಪಾವ್ಟಿ ಹಾಂವ್ ತಾಕಾ ಮೆಳುಂಕ್ ವೆತಾಲೊಂ.ಆಮಿ ಎಕಾಚ್ ಫಿರ್ಗಜೆಚಿ ಜಾಲ್ಲ್ಯಾ ವರ್ವಿ ಉಲಂವ್ಕ್ ಸಂದ್ರಾಪ್ ಆಮ್ಕಾಂ ಮೆಳ್ತಾಲೊ.ನಾ ಜಾಲ್ಯಾರ್ ಹ್ಯೊ ಮಾದ್ರಿ ಖಂಯ್ ಉಲಂವ್ಕ್ ಸೊಡ್ತಿತ್? ಆಮ್ಚಿ ಹಿಂ ಮಿಲಾಕತ್ ಮೊಗಾಂತ್ ಪರಿವರ್ತನ್ ಜಾಲ್ಲಿ ಹಾಂವ್ ನೆಣಾಂಚ್ ಜಾಲ್ಲೊಂ.ಖಂಚಾಯ್ ಚಲಿಯಾಂಚ್ಯಾ ಆಕರ್ಷಣೆಕ್ ಬಲಿ ಜಾಯ್ನಾ’ಸ್ಲೊ ಹಾಂವ್ ಲೀನಾಚ್ಯಾ ಮೋಗಾರ್ ಪಡ್ಲೊ.

ಲೀನಾ ಥಂಯ್ ಚಡಾವತ್ ಚಲಿಯಾಂ ಥಂಯ್ ಅಸ್ಚೆಂ ಆವ್ಗುಣ್ ನಾತ್ಲೆಂ.ಫೇಶನಾಂ,ಆಟ್ ನೇಟ್ ತೆಂ ಕರಿನಾತ್ಲೆಂ.ಅಪುಣ್ ಸೊಭಿತ್ ಮ್ಹಣ್ಚೊ ರುಭಾವ್ ತಾಕಾ ನಾಸ್’ಲ್ಲೊ.ನಾಜೂಕ್ ಗೊರ್ಶಿ ಕೂಡ್ ತಾಚಿ,ಲಾಂಭಾಯೆ ತೆಕಿದ್ ಮೊಟಾಯ್,ಪೆಂಕಾಟ್ ಮ್ಹಣಾಸರ್ ದೆಂವೊನ್ ಆಯಿಲ್ಲ್ಯಾ ಕಾಳ್ಶ್ಯಾ ಕೆಸಾಂಚಿ ಪಾಂತಿ,ಪುಸುನ್ ದವರ್ಲ್ಯಾಬರಿ ಆಸ್ಲೊ ತೊ ನಾಕ್,ಕಾಳ್ಶೆಚ್ ದೊಳೆಂ,ಗುಲೊಬಿ ರಂಗಾಚೆ ಪುಡ್ಪುಡಿತ್ ಗಾಲ್ ಆನಿ ತಾಂಬ್ಶೆ ವೊಂಟ್ ಮ್ಹಾಕಾ ಪಿಶ್ಯಾರ್ ಗಾಲುಂಕ್ ಪಾವುಲ್ಲೆಂ.ಹಾಂವ್ ತಾಕಾ ಸಗ್ಳೊಚ್ ಭುಲ್’ಲ್ಲೊಂ.

ಮ್ಹಜೆ ಫೈನಲ್ ಬಿ.ಕೊಮ್ ಜಾತಚ್ ಹಾಂವ್ ಕೊಲೆಜಿ ಥಾವ್ನ್ ಭಾಯ್ರ್ ಆಯಿಲ್ಲೊ.ಆನಿ ತಾಣೆ ತಾಚೆ ಟ್ರೈನಿಂಗ್ ಸಂಪಯ್ಲೆ.ತೆದಳಾ ಮ್ಹಾಕಾ 22 ವರ್ಸಾಚಿ ಪ್ರಾಯ್.ತಾಕಾ 18 ವರ್ಸಾಂ.ತಾಚೊ ಬಾಪುಯ್ ಬೊಂಬಯ್’ತ್ ಲ್ಹಾನ್ ಕಾಮಾರ್ ಆಸ್ಲೊ.ಸಾಧರಣ್ ಜೊಡ್ತಾಲೊ.

ಆಮ್ಚ್ಯಾ ಶಿಕ್ಪಾಚ್ಯಾ ವೇಳಾರ್ ಆಮ್ಕಾಂ ವೇಳ್ ಎಕೊಡ್ಯಾನ್ ಖರ್ಚುಂಕ್ ಸಂದ್ರಾಪ್ ಮೆಳೊಂಕ್ ನಾ.ತರಿಯ್ ಆಮಿ ಎಕಾಮೆಕಾ ಏಕ್ ಘಡಿ ತರಿಯ್ ಭೆಟ್ತಾಲ್ಯಾಂವ್.ಮತಿಂತ್ಲಿ ಭೊಗ್ಣಾಂ ದೊಳ್ಯಾಂ ಮಾರಿಫಾತ್ ಆಮಿ ಉಲಯ್ತೆಲ್ಯಾಂವ್.ಆಮ್ಚ್ಯಾ ವೊಂಟಾಂನಿ ಹಳ್ತಾಚೊ ಹಾಸೊ ಉದೆವ್ನ್ ಮಾಯಾಗ್ ಜಾತೆಲ್ಯೊ.

ಟ್ರೈನಿಂಗ್ ಸ್ಕೂಲಾ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ತಾಕಾ ಕುಟ್ಮಾಚ್ಯಾ ವೊಜ್ಯಾಕ್ ಖಾಂದ್ ದಿಂವ್ಕ್ ಆಸ್ಲೊ.ತ್ಯಾ ದೆಕುನ್ ಕಾಮಾಚ್ಯಾ ಬೊಂಟೆಕ್ ಲಾಗ್ಲೆಂ.ತವಳ್ ಚ್ ಆಮ್ಚ್ಯಾಚ್ ಫಿರ್ಗಜೆಚ್ಯಾ ಇಸ್ಕೊಲಾಂತ್ ಏಕ್ ವೆಕೆನ್ಸಿ ಉದೆಲಿ.ತೆಂ ಕಾಮ್ ತಾಕಾಚ್ ಜಾಲೆಂ.

ಪುಣ್ ಹಾಂವ್ ಶಿಕಪ್ ಸೊಂಪವ್ನ್ ಭಾಯ್ರ್ ಯೆತಾನಾ ಬೆಕಾರ್’ಪಣಾಚೊ ಸಮಸ್ಸೊ ರಾಕೊನ್ ಆಸ್ಲೊ.ತಾಚ್ಯಾ ದವ್ಲತ್ಯಾನ್ ಹಾಂವ್ ಸಗ್ಳೊಚ್ ಚಿರ್ಡಾಲೊ ಆನಿಂ ವ್ಹಳ್ವಳ್ಳೊಂ.ಮ್ಹಜ್ಯಾ ಮಾಂಯ್-ಪಾಯ್’ಕ್ ಹಾಂವ್ ಮಾಲ್ಗಡೊ ಜಾಲ್ಲ್ಯಾ ವರ್ವಿ ಕುಟಾಮ್ ಮ್ಹಳ್ಯಾ ಜೊತಾಚೆ ಜೂಂ’ವ್ ಹಾಂವೆ ಖಾಂದಾರ್ ಘೆಂವ್ಕ್ ಆಸ್ಲೆಂ.ಕೊಲೇಜಿ ಥಾವ್ನ್ ಭಾಯ್ರ್ ಯೆತಾನಾ ಹಾಂವ್ ನೆಣಾಂ’ಸ್ಲೊ ಪರಿಸ್ಥಿತಿ ಇತ್ಲಿ ಭೀಕರ್ ರಾವ್ಲ್ಯಾ ಮ್ಹಣುನ್.ವಶಾಲಿ ಆಸ್ಲ್ಯಾಂಕ್,ದುಡು ಆಸ್ಲ್ಯಾಂಕ್ ಕಾಮಾಂ ಲಾಭ್ತಾಲಿಂ.ದುರ್ಬಳೊ ಮ್ಹಳ್ಯಾಂಚೆರ್ ದೊಳೆಂ ಉಗ್ಡುನ್ ಕೊಣ್’ಚ್ ಪಳೆನಾತ್ಲೆಂ.ನಿರುದ್ಯೋಗ್ ಸಮಸ್ಯಾಂತ್ ಹಾಂವ್ ಏಕ್ ವರ್ಸ್ ಭರ್ ವ್ಹಳ್ವಳ್ಳೊಂ ಆನಿಂ ಕಳ್ವಳ್ಳೊಂ.

ಮುಕ್ಲಿ ವಾಟ್ ಮ್ಹಾಕಾ ದಿಸುಂಕ್ ನಾ.ಎಕಾ ವಾಟೆನ್ ಕುಟ್ಮಾಚೆ ವೊಜೆಂ ಮ್ಹಾಕಾ ದೊಸ್ತಾಲೆಂ.ದುಸ್ರ್ಯಾ ವಾಟೆನ್ ಹಾಂವೆಂ ಮೋಗ್ ಕೆಲ್ಲೆಂ ಲೀನಾ ಕಾಮಾರ್ ಆನಿಂ ಹಾಂವ್ ಬೇಕಾರ್ ಮ್ಹಣ್ಚೆಂ ಉಣೆಂಪಣ್.ಲೀನಾಕ್ ಆತಾಂ 19 ವರ್ಸಾಂ ಭರುಲ್ಲಿ ಆನಿ ಮ್ಹಾಕಾ 23.ಏಕ್ ದೋನ್ ವರ್ಸಾನಿಂ ತಾಚೆಂ ಕಾಜಾರ್ ಆಸ್ತೆಲೆಂ.ತೆದಾಳಾ ತಾಚಿ ಮಾಂಯ್-ಪಾಯ್ ಮ್ಹಜ್ಯಾ ತಸ್ಲ್ಯಾ ಬೇಕಾರಿ ತರ್ನ್ಯಾಟ್ಯಾಕ್ ತಾಕಾ ದಿತಿತ್’ಗಿ? ಮ್ಹಳ್ಳೆಂ ಸವಾಲ್ ಮ್ಹಜಿ ತಕ್ಲಿ ತವಳ್-ತವಳ್ ಕಾಂತಾಯ್ತಾಲೆಂ.ನಾ ಕೊಣ್’ಚ್ ವ್ಹಡಿಲಾಂ ಎಕಾ ಬೇಕಾರಿ ತರ್ನ್ಯಾಟ್ಯಾಕ್ ಆಪ್ಲ್ಯಾ ಧುವೆಕ್ ಲಗೀನ್ ಕರ್ನ್ ದಿಂವ್ಚಿ ನಾಂತ್ ಆನಿಂ ಲೀನಾ ಜಾಲ್ಯಾರಿಯ್ ಖಂಚಾ ಭದ್ರತೆಚೆರ್ ಮ್ಹಜೆಲಾಗಿಂ ಕಾಜಾರ್ ಜಾಯ್ತ್? ಆನಿಂ ಹಾಂವ್ ಏಕ್ಲೊ ಬೇಕಾರಿ,ಕಾಜಾರಿ ಜಿವಿತ್ ಸಾರುಂಕ್ ಫಾವೊ ಗಿ? ತರಿಯ್ ಲೀನಾಚೆರ್ ಮ್ಹಾಕಾ ಖೂಬ್ ಭರ್ವಸೊ ತೆಂ ಮ್ಹಾಕಾ ರಾಕ್ತಾಲೆಂ ಮ್ಹಣುನ್.

ಬೊಂಬಯ್ ವೆತಾ,ಥಂಯ್ ಕಾಮ್ ಸೊಧ್ತಾ ಮ್ಹಳ್ಯಾರ್ ಥಂಯ್ ವೊಳ್ಕೆಚೆ ವ್ಹಡ್ಲೆಂ ಮಾಂಡೆ ಝಳ್ಕಲೆಂ ನಾಂತ್.ಲ್ಹಾನ್-ಲ್ಹಾನ್ ಕಾಮಾರ್ ಆಸ್ಲೆಂ ಮ್ಹಜೆ ಸಯ್ರೆಂ ಮ್ಹಾಕಾ ಫಾವೊ ಜಾಲ್ಲೆಂ ಕಾಮ್ ಸೊಧುನ್ ದಿತಿತ್’ಗಿ? ತೆಂ ತಾಂಕಾಂ ಸಾಧ್ಯ್ ನಾತ್ಲೆಂ.ಬೆಂಗ್ಳುರ್ ತೆವ್ಶಿನ್ ಯಾ ಮ್ಹಳ್ಯಾರ್ ಥಂಯ್ಸರ್ ಆಮ್ಚೆಂ ಕ್ರಿಸ್ತಾಂವ್ ಮ್ಹನ್ಶ್ಯಾಂ ಆಸಾತ್’ಗಿ ಮ್ಹಳ್ಳೊ ದುಬಾವ್ ಉದೆಲೊ.ಕ್ರಿಸ್ತಾನ್ ಸಾಂಗ್ಲ್ಯಾ "ಬಡಯ್,ಉಗ್ತೆಂ ಜಾತೆಲೆಂ ಆನಿಂ ಸೊಧ್ ತುಕಾ ಮೆಳ್ತೆಲೆಂ"ಉತ್ರಾಂಚೊ ಉಡಾಸ್ ಆಯಿಲೊ ತರಿಯ್ ಮ್ಹಾಕಾ ಮಾತ್ರ್ ಕಿತೆಚ್ ಉಗ್ತೆಂ ಜಾಲೆಂ ನಾ ಆನಿಂ ಮೆಳ್ಳೆಂ’ಯ್ ನಾ.ಬೆಕಾರ್ಪಣಾಚೊ ಸಮಸ್ಸೊ ಉಬ್ಜೊನ್ ಲಾಗಿಂ-ಲಾಗಿಂ ದೇಡ್ ವರಸ್ ಜಾವ್ನ್ ಗೆಲೆಂ.

ಮ್ಹಾಕಾ ಲೀನಾಚೆರ್ ಆಸ್ಲೊ ಮೋಗ್’ಚ್ ಕಾಮಾಚ್ಯಾ ಸೊದ್ನೆಕ್ ಪ್ರೋತ್ಸಾಹ್ ದಿಂವ್ಕ್ ಲಾಗ್ಲೊ.ಎಕಾದಾವೆಳಾರ್ ಲೀನಾ ಮ್ಹಜ್ಯಾ ಜಿಣಿಯೆಂತ್ ನಾತ್’ಲೆಂ ತರ್ ಹ್ಯಾ ಪಾಂಯ್ ಧರ್ಚ್ಯಾ ವ್ಯಾಪ್ತೆಕ್ ಹಾಂವ್ ಕೆದಿಂಚ್ ಬಾಗ್ವಾತೊ ನಾ.ಹ್ಯಾ ಖೊಟ್ಯಾ ಸಮಾಜೆಕ್ ಖೊಟ್ ಮಾರುನ್ ಖಂಯ್ ಪುಣಿ ದೇಶಾಂತರ್ ವ್ಹೆತೊ ವ ಮ್ಹಜ್ಯಾ ವ್ಹಡಿಲಾನಿಂ ಕರ್ನ್ ಗಾಲ್ಲ್ಯಾ ಗಾದ್ಯಾನಿಂ ಮ್ಹಜ್ಯಾ ಬಳ್ವಂತ್ ಭುಜಾಜೆರ್ ತ್ರಾಣ್ ಆಸ್ತಾ ಪರ್ಯಾಂತ್ ಘೊಳ್ತೊಂ ಆಸ್ಲೊ.ಪುಣ್ ಹಾಂವ್ ಏಕ್ ಸ್ವತಂತ್ರ್ ಜಿಣಿ ಜಿಯೆಂವ್ಕ್ ಆಶೆತಾಲೊ.ಲೀನಾ ಮ್ಹಾಕಾ ಕಾಮಾಚ್ಯಾ ಸೊಧ್ನೆಕ್ ವ್ಹಸುಂಕ್ ಉತ್ತೇಜನ್ ದಿತಾಲೆಂ.ಉತ್ರಾನಿಂ ಮಾತ್ರ್ ನ್ಹಯ್ ಪಯ್ಶ್ಯಾನಿಂ ಸಮೇತ್ ಉಪ್ಕಾರ್ ಕರ್ತಾಲೆಂ.ಕೊಣ್ ತರಿಯ್ ಚಲಿ ತಶೆಂ ಅಪ್ಲ್ಯಾ ಪ್ರೇಮಿಕ್ ಪಯ್ಶ್ಯಾನಿಂ ಕುಮೊಕ್ ಕರಿತ್? ಆತಾಂಚ್ಯೊ ಚಡ್ತಾವ್ ಚಲಿಯಾಂ ಪ್ರೇಮಿಚ್ಯಾ ಬೊಲ್ಸಾಂತ್ ಕಿತೆಂ ಭರುನ್ ಆಸಾ? ಮ್ಹಣ್ ಪಳೆವ್ಚ್ಯೊಂ.ಹ್ಯಾ ವರ್ವಿ ಲೀನಾಚೆರ್ ಆಸ್ಲೊ ಆಭಿಮಾನ್ ಮ್ಹಾಕಾ ದೊಡ್ತೊ ಜಾಲ್ಲೊ.

ಹ್ಯಾ ಮಧೆಂ ಮ್ಹಜ್ಯಾ ಘರ್ಚ್ಯಾಂಕಿಯ್ ಹಾಂವ್ ಏಕ್ ವೊಜೆಂ ಜಾಲ್ಲೊ.ಮ್ಹಜಿ ಮತ್ ಥಿರಾಸಾಣೆನ್ ಉರಾನಾತ್ಲಿಂ.ಸಾಂತಾ ಭಕ್ತಾಂಕ್ ಹಾಂವೆಂ ಅಂಗಯಿಲ್ಲೆಂ.ಜೆಜುಚ್ಯಾ ಪವಿತ್ರ್ ಕಾಳ್ಜಾಲಾಗಿಂ ಆನಿಂ ತಾಚ್ಯಾ ಮಾಯೆಲಾಗಿಯ್  ಹಾಂವೆಂ ಮಾಗ್ಲೆಂ.ಪುಣ್ ವ್ಯರ್ಥ್.ಎಕ್’ಯಿ ಸಾಂತ್ ಮ್ಹಜ್ಯಾ ಮಜಾತೆಕ್ ಯೆಂವ್ಕ್ ನಾತ್ಲೊ.ಕೊಂಕ್ಣಿ ಪತ್ರಾನಿಂ ಛಾಪ್ಲಿಂ ಆರ್ಗಾ ಪಳೆತಾನಾ ಸಕ್ಕಡ್ ನಕ್ಲಿಂ ಮ್ಹಣುನ್ ಚಿಂತ್ತಾಲೊ.ಸಾಂತಾ ಭಕ್ತಾಂಕ್ ಆಂಗವ್ಣ್ಯೊ ಘಾಲ್ಚೆಂ ಪಿಶೆಪಣ್ ಮ್ಹಣ್ ಭೊಗ್ಲೆಂ.ಅಂತಸ್ಕರ್ನ್ ಮಾತ್ರ್ ರಚ್ಲಲೊ ದೇವ್ ಸಾಂಡಿಸೊನಾ ಮ್ಹಣ್ ಜಾಗಯ್ತಾಲೆಂ.

ಮ್ಹಜ್ಯಾ ಸ್ವಾಭಿಮಾನಾಕ್ ಕುರಾಡ್ ಪಡ್’ಲಿ. ’ಜೀವನ್ ಇತ್ಲ್ಯಾರ್ ಆಕೇರ್’ಗಿ?’ ಮ್ಹಣ್ ಚಿಂತ್ತಾಲೊ.ಪುಣ್ ಏಕ್ ದೀಸ್ ಏಕಾ ದೈನಿಕ್ ಪತ್ರಾರ್ ಏಕ್ ಇಸ್ತಿಹಾರ್ ಹಾಂವೆಂ ವಾಂಚ್ಲೆಂ.ಎಕಾ ಬೆಂಕಾಕ್ ಆರ್ಜಿ ಪಾಟಯ್ಲಿ.ದೇವಾನ್ ತಾಚೆ ದೊಳೆಂ ಉಗಡ್’ಲೆಂ ಆನಿಂ ಮ್ಹಜ್ಯಾ ನಶಿಬಾಚೆ ದಾರ್ ಉಗ್ತೆಂ ಜಾಲ್ಲೆಂ.ರಿಟನ್ ಟೆಸ್ಟ್ ಆನಿಂ ಇಂಟರ್-ವ್ಯೂ ಸಂಪ್ತಚ್ ಮ್ಹಾಕಾ ಬ್ಯಾಂಕಾಂತ್ ಕಾಮ್’ಯಿ ಜಾಲೆಂ.

ಕಾಮ್ ಮೆಳ್ತಚ್ ಮ್ಹಾಕಾ ಜಾಲ್ಲೊ ಸಂತೊಸ್ ಇತ್ಲೊ ತಿತ್ಲೊ ನ್ಹಯ್.ಮ್ಹಜೆ ಕಾಳಿಚ್ ಸ್ಥಬ್ದ್ ಜಾಯ್ನಾತ್ಲೆಚ್ ದೇವಾಚೊ ಭೋಬ್ ಉಪ್ಕಾರ್ ಮ್ಹಣ್ಯೆತ್ ತಿತ್ಲೊ ಸಂತೋಸ್ ಮ್ಹಾಕಾ ಜಾಲ್ಲೊ.ದೋನ್ ವರ್ಸಾ ಬೇಕಾರ್ಪಣಾಚ್ಯಾ ಸಾಗೊರಾಂತ್ ಹಾಂವ್ ಉಪ್ಯೆವ್ನ್ ಥಕ್’ಲ್ಲೊ.

ಕಾಮ್ ಮೆಳ್ಳಿಂ ಗಜಾಲ್ ಹಾಂವೆ ಘರ್ಚ್ಯಾಂಕ್ ಆನಿಂ ಲೀನಾಕ್ ಕಳಿತ್ ಕೆಲೆಂ.ತಶೆ ಗಾಂವಾತ್’ಯಿ ಪ್ರಚಾರ್ ಜಾಲಿಂ.ಗಾಂವಾಂತ್ ವ್ಹಳಕ್ ನಾತ್ಲೆಲೆಂ ಸಮೇತ್ ಅಪವ್ನ್ ಉಲಂವ್ಕ್ ಲಾಗ್ಲೆಂ.ಥೊಡ್ಯಾನಿಂ ಕಾಫಿಯೆಚ್ಯಾ ಹೊಟೇಲಾಕಿಯ್ ಅಪವ್ನ್ ವ್ಹೆಲೆಂ.ಆಂಕ್ವಾರ್ ಚಲಿಯೊ ಆಸ್ಲ್ಯಾ ವ್ಹಡಿಲಾಂಚಿ ದೀಷ್ಟ್ ಮ್ಹಜೆರ್ ಪಡ್ಲಿಂ.ಎದೊಳ್ ಮ್ಹಾಕಾ ಪಳೆವ್ನ್ ಲೆಪಿಚಿ ಸೊಂಡಿ ಕರ್ಚ್ಯೊ ಬಾಯೊ ಆಮ್ರುಕೊ ಹಾಸೊಂಕ್ ಲಾಗ್ಲ್ಯೊ.ಹಾಂವೆ ಕೊಣಾಕಿಯ್ ಗಣ್ಣೆ ಕರುಂಕ್’ಚ್ ನಾ.

ಕಾಮ್ ಲಾಬ್ತೆಚ್ ಮ್ಹಜ್ಯಾ ಆನಿಂ ಲೀನಾಚ್ಯಾ ಮೋಗಾಕ್ ತಡ್ ನಾ ಜಾಲಿಂ.ಎಕಾಮೆಕಾ ಆಮಿ ಭೆಟುಂಕ್ ಲಾಗ್ಲ್ಯಾಂವ್.ತ್ಯಾ ವೆಳಾ ತಾಚೆ ನಾಜೂಕ್ ಬಾವ್ಳೆಂ ಮ್ಹಜ್ಯಾ ಗಳ್ಯಾ ಭಂವ್ತಣಿ ರೆವಾಡ್ತಾಲೆಂ.ಕುಡಿಕ್ ಕೂಡ್ ಲಾಗ್ತಾಲಿಂ.ಮ್ಹಜೆ ಭಳ್ವಂತ್ ರಟ್ಟೆಂ ತಾಚ್ಯಾ ಭಂವ್ತಿ ಆರ್ನಾತಾಲೆ ಆನಿ ಪಾಟಿಕ್ ಸಾಸ್ಪಾತಾಲೆಂ.

ವರ್ಸ್ ಏಕ್ ಪಾಶಾರ್ ಜಾವ್ನ್ ಗೆಲೆಂ.ಮೋಗಾಂತ್ ಹಾಂವ್ ಧಾದೊಶಿ ಜಾಲ್ಲೊ.ತರೀಯ್ ಕಾಮಾಂತ್ ಧಾದೊಸ್ಕಾಯ್ ನಾತ್ಲಿಂ.ಗ್ರೇಸ್ ಪಯ್ಶ್ಯಾಂಚೆ ಕಟ್ ಘವ್ನ್ ಡೆಫಾಸಿಟ್ಟ್ ದವರುಂಕ್ ಯೆತಾನಾ ಮ್ಹಜ್ಯಾಲಾಗಿಯ್ ತಸ್ಲೆಂ ಕಟ್ ಕೆದಳಾ ಜಾಂವ್ಚೆ ಮ್ಹಣುನ್ ಭೊಗ್ತಾಲೆಂ.ದುಬ್ಳೆಂ ಥೊಡೆಂ ಅಪ್ಲ್ಯಾ ಸ್ತ್ರಿಯೆಚಿ ಕರಿಮಣಿ ಸಮೇತ್ ಆಡವ ದವರುಂಕ್ ಯೆತಾನಾ ಕರಿಯಮಣಿ’ಕ್ ಪಯ್ಶ್ಯಾಂಚೆ ಮೋಲ್ ಗಿ? ಮ್ಹಳ್ಳೆಂ ಸವಾಲ್ ದೊಸ್ತಾಲೆಂ.

ಕಾಮಾಕ್ ಲಾಗುನ್ ಏಕ್ ವರ್ಸ್ ಸಂಪ್ತಚ್ ಹಾಂವೆ ಘರಾಂತ್ ಕಾಜಾರಾಚೊ ಪ್ರಸ್ತಾಪ್ ದವರ್ಲೊ.ಘರ‍್ಚಿಯ್ ಖುಷ್ ಜಾಲಿಂ.ಪುಣ್ ಚಲಿ ಲೀನಾ ಮ್ಹಣ್ತೆಚ್ ತಿಂ ಭಿಗಡ್ಲಿಂ."ತೆಂ ಟೀಚರ್,ಮಿರಿಯೊ ಸೊಡವ್ನ್ ಆಟ್-ನೆಟ್ ಕರ್ಚೆ ಚೆಡುಂ,ಮಾಸ್ಟರಾಂ ಲಾಗಿಂ ಮಿರಂವ್ಚೆ,ಆಮ್ಚ್ಯಾ ಘರಾ ಸೊಬ್ಚೆಂ ನಾ,ಆಮ್ಕಾಂ ಜಾಯ್ ಆಶಿಕ್ಪಿ,ಪುಣ್ ಬರ್ಯಾ ಗುಣಾಂಚೆಂ,ಬರ್ಯಾ ಘರಾಣ್ಯಾಂತ್ಲೆಂ,ಘರ್ಚೆ ಕಾಮ್ ಜಾಣಾ ಆಸ್ಲೆಂ ಚೆಡುಂ" ಮ್ಹಣ್ ಆಡ್ಕಳ್ ಉಲಯ್ಲಿಂ.ಘರ್ಚ್ಯಾಂಚಾ ಹ್ಯಾ ಉಲೊವ್ಣ್ಯಾ ವರ್ವಿ ಲೀನಾಕ್ ಆಕ್ಮಾನ್ ಜಾಲೊ ಮ್ಹಣುನ್ ಹಾಂವ್ ಖೂಬ್ ದುಕ್ ಪಾವ್ಲೊಂ ಆನಿಂ ತಾಂಕಾಂ ಸಮ್ಜಯ್ಲೆಂ,ಬಳಾಯ್ಲೆಂ.ಉಪ್ರಾಂತ್ ಕಶೆಯ್ ತಾಂಕಾಂ ಪುಸ್ಲಯ್ತೆಚ್ ಉದೆಲೆಂ ಏಕ್ ಮಾರೆಕಾರ್ ಸವಾಲ್!! ದೋತ್ ಉಣಿ ಮ್ಹಳ್ಯಾರ್ ತೀನ್ ಹಜಾರ್ ರುಪಯ್ ಮ್ಹಣಿ ದಿಜೆಯ್’ಚ್!!.

ದೋತ್? ತೆಯ್ ತೀನ್ ಹಜಾರ್? ಮ್ಹಜೊ ಮೆಂದು ಗಿರ್ಗಿರ್ಲೊ.ವ್ಹಯ್,ಮ್ಹಜಿ ವ್ಹಡಿಲಾಂ ಆಶಿಕ್ಪಿ.ತಿಂ ಕಾಂಯ್ ನೆಣಾಂತ್.ತೀನ್ ಹಜಾರ್ ದೋತ್ ಘೆಂವ್ಚೆ ಅಪ್ಲ್ಯಾ ಬೆಂಕಾಂತ್ ಆಸ್ಲ್ಯಾ ಪುತಾಕ್ ಕಾಂಯ್’ಚ್ ಚಡ್ ನ್ಹಯ್ ಮ್ಹಣ್ ತಾಂಚೊ ಆಂದಾಜ್.ಪುಣ್ ೩,೦೦೦ ದಿಂವ್ಚೆಂ ಎಕಾ ಎಲಿಮೆಂಟರಿ ಇಸ್ಕೊಲಾಂತ್ ಶಿಕ್ಷಕಿ ಜಾವ್ನ್,ಶೆಂಬೊರ್-ದೆಡ್ಶೆಂ ರುಪಯ್ ಜೊಡ್ಚ್ಯಾ ಎಕಾ ಚಲಿಯೆನ್ ಮ್ಹಣ್ ತಿಂ ನೆಣಾಂ ಜಾಲಿಂ.ಅವಯ್ ಮ್ಹಜಿ ಕಾಜಾರ್ ಜಾವ್ನ್ ಯೆತಾನಾ ಶೆಂಬೊರ್ ರುಪಾಯ್ ದೋತ್ ಘೇವ್ನ್ ಆಯಿಲ್ಲಿ ಖಂಯ್ ಆನಿ ಹೆಚ್ ಶೆಂಭೊರ್ ರುಪಾಯ್  ದಿಂವ್ಕ್ ತಿಚ್ಯಾ ವ್ಹಡಿಲಾಂನಿಂ ಕಿತ್ಲೆಂ ಕಷ್ಟ್ ಕಾಡ್ಲ್ಯಾತ್ ಮ್ಹಣುನ್ ತಿಯ್ ಜಾಣಾಂ.ತಶೆಂ ಜಾಲ್ಯಾರಿಯ್ ಏಕ್ ಸ್ತ್ರಿ ಆನ್ಯೇಕಾ ಸ್ತ್ರಿಯೆ ಥಾವ್ನ್ ದೋತ್ ಅಪೇಕ್ಷಿತಾ ಸ್ತ್ರೀಯಾಂಚೊ ಸಮಸ್ಯೊ ಸ್ತ್ರಿಯೊಚ್ ನೆಣಾಂತ್!ಜಾಣಾ  ಹ್ಯಾ ಸಮಾಜೆಂತ್ ಹ್ಯಾ ದೊತಿ ಲಾಗುನ್ ಕಿತ್ಲೆಶ್ಯೊ ಚಲಿಯೊ ಆಂಕ್ವಾರ್ ಉರ್ಲ್ಯಾಂತ್.ಮ್ಹಾಂಯ್ನ್ ಆಪ್ಲ್ಯಾ ಜಾಳಾಂತ್ ಪಾಯ್’ಕಿಯ್ ಸಾಂಪ್ಡಾಯ್ಲೊ.ಪಾಯ್ ಮ್ಹಜೊ ದೊತಿ ವಿಶಿ ಆಯ್ಕೊನ್ ಮಾಂಯ್ಚ್ಯಾ ಜಾಳಾಂತ್ ಶಿರ್ಕಾಲೊ.ವ್ಹಯ್ ಸಹಜ್’ಚ್!ಅಪ್ಣೆಂಯ್ ಆಡ್ವಾರ್ಲೆಲೆಂ ಫಳ್ ಖಾವ್ನ್ ಆನಿಂ ಅಪ್ಲ್ಯಾ ದಾದ್ಲ್ಯಾಕಿಯ್ ಖಾವಯಿಲ್ಲೆಂ ಸ್ತ್ರಿಯೆನ್’ಚ್ ನ್ಹಯ್ಗಿ? ಹ್ಯಾ ಗೊಂದೊಳಾಂತ್ ಮ್ಹಾಕಾ ಏಕ್ ಉಪಾಯ್ ಸುಸ್ತಾಲೊ.ತ್ಯಾ ಪರಿಂ ಬೆಂಕಾಕ್ ವ್ಹಚುನ್ ಮ್ಹಜ್ಯಾ ಕಾಮಾಚ್ಯಾ ಭದ್ರತೆಚೆರ್ ತೀನ್ ಹಜಾರ್ ರುಪಾಯ್ ರೀಣ್ ಘೆತ್ಲೆಂ ಆನಿಂ ಗೂಟಾನ್ ಲೀನಾಕ್ ದಿಲೆಂ."ಲೀನಾ,ಧರ್ ಘೆ ಹೆಂ ಪಯ್ಶೆಂ ಆನಿ ಮ್ಹಜ್ಯಾ ವ್ಹಡಿಲಾಂಕ್ ದೊತಿ ರುಪಾರ್ ದಿ"ಮ್ಹಳ್ಳೆಂ ಹಾಂವೆಂ.

"ಹೆಂ ಕಿತೆಂ?" ಮ್ಹಣ್ ವಿಚಾರಿ ತೆಂ.

"ನ್ಹೆಣಾಯ್’ಗಿ ಲೀನಾ ತುಂ ಕಿತೆಂ ಚಲ್ತಾಂ ಹ್ಯಾ ಸಮಾಜೆಂತ್ ಮ್ಹಣುನ್.ಮಾದ್ರಿ ಲೆಗುನ್ ಧಾರ್ಮಿಕ್ ಮೆಳಾಂತ್ ರಿಗ್ಚ್ಯಾ ಚಲಿಯಾಂ ಥಾವ್ನ್ ದೋತ್ ವಿಚಾರ್ಚ್ಯಾ ಹ್ಯಾ ಕಾಳಾರ್ ಮ್ಹಜ್ಯಾ ಆಶಿಕ್ಪಿ,ಮ್ಹಾಕಾ ಲ್ಹಾನ್ ವ್ಹಡ್ ಕೆಲ್ಲ್ಯಾ ಮಾಂಯ್-ಪಾಯ್’ನ್ ದೋತ್ ವಿಚಾರ್ಚ್ಯಾಂತ್ ಕಿತೆಚ್ ಚೂಕ್ ನಾ.ಆಮ್ಚ್ಯಾ ಸಮಾಜೆಂತ್ ಹಿಚ್ ಭೋವ್ ವ್ಹಡ್ ಆಯ್ಚಿ ಸಮಸ್ಸ್ಯಾ"

ಗಾಂವಾ ಥಾವ್ನ್ ಆಯ್ಲಿ ಅಪ್ಲ್ಯಾ ಧುವೆಚಿ ಚೀಟ್ ಪಳೆವ್ನ್ ಲೀನಾಚೊ ಬಾಪುಯ್ ಗಾಂವಾಕ್ ಆಯಿಲ್ಲೊ.ನಮಿಯಾರ್ಲ್ಯಾ ದಿಸಾ ಖರಾರ್ ಜಾಲೆಂ.ದೋತ್’ಯಿ ಮೆಜುನ್ ದಿಲಿಂ.ತೀನ್ ಚಿಟಿಯೊಯ್ ವಾಂಚ್ಲ್ಯೊ.ಗಾಂವ್ಚ್ಯಾ ರಿತಿ ರಿವಾಜೆ ಪ್ರಕಾರ್ ಆಮ್ಚೆಂ ಕಾಜಾರಿಯ್ ಜಾಲೆಂ.

(ಸಾಹಿತ್ ಕೇವಲ್ ಏಕ್ ಬರಪ್ ನ್ಹಯ್.ಬರಪ್ ಬರಯಿಲ್ಲ್ಯಾ ಕಾಳಾಚೆ ಪರಿಗತ್’ಗಿ ಏಕ್ ಸಾಹಿತ್ ಸಾಂಗ್ತಾ. 1975 ಜೂನಾಚ್ಯಾ 29 ತಾರೀಕೆರ್ ’ಪಯ್ಣಾರಿ’ ಪತ್ರಾರ್ ಪ್ರಕಟಿತ್ ಜಾಲ್ಲಿ ಪಪ್ಪನ್ ಲಿಕ್ಲೆಲಿಂ ಸಾಧಿ ಕಾಣಿ ಹಿಂ.ತ್ಯಾ ವೇಳಾರ್ ತೀನ್ ಹಜಾರ್ ರುಪಾಯ್ಚೆ ಮೂಲ್ಯ್,ಬೆಕಾರ್ಪಣ್ ಆನಿಂ ದೋತಿಚಿ ಸಮಸ್ಯಾ ಹ್ಯಾ  ಕಾಣಿಯೆಂತ್ ಪಳುವ್ಯೆತಾ)