ಸೆವೆಚಿ ಏಕ್ ವಾಟ್

ದೊನಿಯ್ ದಿಯೆಸಿಜೆನಿಂ ಗೊವ್ಳಿಕ್ ಮಂಡಳೆಚ್ಯಾ ಸಾಂದೆಪಣಾಕ್ ವಿಂಚೊವ್ಣ್ ಚಲವ್ನ್ ಆಸಾ.ಗೊವ್ಳಿಕ್ ಮಂಡಳಿಚೆ ಪ್ರಾಥಮಿಕ್ ಮಿಸಾಂವ್’ಚ್ ಸೆವಾ.ಪುಣ್ ಥೊಡೆಂ ಪಾವ್ಟಿ ಸೆವೆಚೆ ಮಿಸಾಂವಾಂಕ್ ಆಮ್ಕಾಂ ಹುದ್ದ್ಯಾಚಿ ಆಭಿಲಾಷಾ."ಗೊವ್ಳಿಕ್ ಮಂಡಳಿಚೊ ಸಾಂದೊ ಜಾಲ್ಯಾರ್ ವಾ ಫಿರ್ಗಜೆಂತ್ ಖಂಚೊಯ್ ಹುದ್ದೊ ಮೆಳಾತ್ ತರ್ ಮಾತ್ರ್ ಅಪ್ಣಾಚಿ ಸೆವಾ" ಮ್ಹಳ್ಳೆಂ ಸ್ವಾರ್ಥಿ ರಾಜಕೀಯ್ ಚಿಂತಪ್ ಥೊಡ್ಯಾಂಚೆ.ಆನಿಂ ತ್ಯಾ ಪಾಸತ್’ಚ್ ಫಿರ್ಗಜೆಂತ್ ಒದ್ದಾಟ್ ಆನಿಂ ಜಂಜಾಟ್.ಹ್ಯಾ ಮಧೆಂ ಜಾಯ್ತ್ಯಾಂಕ್ ಸೆವೆಚೆ ವಾಟ್ ಚುಕೊನ್ ವಚೊನ್ ಸೆವೆಚೆ ವಾಕ್ಯಾನ್’ಚ್ ವಿಸ್ರೊನ್ ಗೆಲ್ಲೆಂ ಆಸಾ.ಪುಣ್ ಸ್ವಷ್ಟ್ ಉದ್ದೇಶ್ ಆಸ್ಲ್ಯಾರ್ ಆಪ್ಣಾಚ್ಯಾ ಸ್ವ-ಚಿಂತ್ಪಾನ್, ಹುದ್ದೊ,ಆಧಿಕಾರ್ ನಾಸ್ತಾನಾ ಸೆವೆಚೆ ಮಿಸಾಂವ್ ಕರುಂಕ್ ವಾಟ್ ಜಾಯ್ತೆಂ ಆಸಾತ್ ಮ್ಹಳ್ಳೆಂ ಮಾತ್ರ್ ಸತ್.

ಅಸುಂ.ಪಾಟ್ಲ್ಯಾ ದಿಸಾನಿಂ ಹ್ಯಾ ವಯ್ಲ್ಯಾ ಚಿಂತ್ಪಾಕ್ ಪೂರಕ್ ಜಾಂವ್ಚೊ ವಿಡಿಯೊ ಯೂ-ಟ್ಯೂಬಾರ್ ಪಳೆಯ್ಲೊ.ಸಂಗೀತ್’ಕಾರ್ ರ‍ೋಶನ್ ಬೆಳ್ಮಣಾನ್ ತಯಾರ್ ಕರ್ನ್ ಪೊಸ್ಟ್ ಕೆಲ್ಲೊ.ಕಿಸ್ತಿ ಧರ್ಮಾಚ್ಯಾ ವಿವಿಧ್ ಸಮುದಾಯಾಂಚ್ಯಾ ಧಾರ್ಮಿಕಾಂಕ್(ಕಥೊಲಿಕ್,ಆರ್ಥೊಡೊಕ್ಸ್ ಸಿರಿಯನ್,ಪ್ರೊಟೆಸ್ಟೆಂಟ್,ನ್ಯೂ-ಲೈಫ್) ಎಕಾ ವೆದಿರ್ ಹಾಡ್ನ್ ಪವಿತ್ರ್ ಪುಸ್ತಕಾಚ್ಯಾ ವೆವೆಗ್ಳ್ಯಾ ಸಂಗ್ತೆಚೆರ್ ಧಾರ್ಮಿಕ್ ಉಜ್ವಾಡ್ ಫಾಕೊಂವ್ಚೆ ಚಿಂತನ್ನ್ ಕಾರ್ಯಾಚೊ ವಿಡಿಯೊ ತೊ.ಕ್ರಿಸ್ಮಸ್ ಸುವಾಳ್ಯಾಚ್ಯಾ ಹ್ಯಾ ವೆಳಾಂ ಥಂಯ್-ಥಂಯ್ ಮಾಂಡುನ್ ಹಾಡ್ಚ್ಯಾ ವಿವಿಧ್ ಧಾರ್ಮಿಕ್ ಮುಕೆಲ್ಯಾಂಚ್ಯಾ ಸಹಮಿಲನಾಚ್ಯಾ ಸೌಹಾರ್ಧ ಕಾರ್ಯಕ್ರಮಾಚೆ ಆನಿಯೆಕ್ ಮೆಟ್ ತಶೆಂ ಸಕಾಳಿಕ್ ಕಾರ್ಯಕ್ರಮಾಚೊ ವಿಡಿಯೊ.ಪುಣ್ ಹಾಂಗಾಸರ್ ಸೌಹಾರ್ಧತೆಚೊ ಉದ್ದೇಶ್ ಏಕ್’ಚ್ ಧರ್ಮಾ ಮಧೆಂ.ಕ್ರಿಸ್ತಾಂವ್ ಧರ್ಮ್.ಪಯ್ಲೆ ಸಾಮರಸ್ಯ್ ಆಮ್ಚ್ಯಾಚ್ ಸಮುದಾಯಾಂ ಮಧೆಂ ವಾಡೊವ್ಯಾಂ ಮ್ಹಳ್ಳೊ ಸಂದೇಶಿಯ್ ಹ್ಯಾ ವಿಡಿಯೊಚೊ ಜಾವ್ನ್ ಆಸಾ ಮ್ಹಣ್ಯೆತಾ.

ವಿಡಿಯೊ ಖಾತಿರ್ ಲಿಂಕ್ ಚಿಚಾಯಾ: Christ & Christmas Unique Talk Show

ಮ್ಹಜೆ ವಿಶ್ಲೇಶಣ್ ಆತಾಂ ಹ್ಯಾ ವಿಡಿಯೊಂತ್ ಕಿತೆಂ ಸಾಂಗ್ಲಾ ತ್ಯಾ ವಿಶ್ಯಾಂತ್ ನ್ಹಯ್.ತಿಶಿಲ್ಯಾನ್ ಧಾರ್ಮಿಕ್ ನ್ಹಯ್ ಅಸ್ತಾ,ಇಶಿಲ್ಯಾನ್ ಗೊವ್ಳಿಕ್ ಮಂಡಳಿಚೊ ಜಾಂವ್ದಿ ವಾ ಖಂಚಾಯ್ ಆಪೊಸ್ತಲಿಕ್ ಸಂಘಟನಾಚೊ ಸಾಂದೊ ನ್ಹಯ್ ಆಸ್ತಾನಾ ರೋಶನ್,ಬೆಳ್ಮಣಾನ್ ಎಕಾ ಪರಿಧೆ ಭಿತರ್ ದಾಕಯ್ಲ್ಯಾ ಆಸಕ್ತೆಕ್ ಏಕ್ ಜೈ ಮ್ಹಣಾಜೆಯ್.ಪಯ್ಲ್ಯಾನ್ ಹಾಂಗಾಸರ್ ಕ್ರಿಸ್ತಿ ಸಮುದಾಯಾಂಚ್ಯಾ ಧಾರ್ಮಿಕಾಂಕ್ ಎಕಾ ವೆದಿರ್ ಹಾಡ್ಚೆಂ ಪ್ರೇತನ್’ಚ್ ಏಕ್ ಸಾಹಸ್.ದುಸ್ರ್ಯಾನ್ ಆದಾಯ್ ನಾತ್ಲ್ಯಾ ಹ್ಯಾ ವಿಡಿಯೊಚೊ(ವಾಂವ್ಟ್.ರೆಕಾರ‍್ಡಿಂಗ್,ಎಡಿಟಿಂಗ್ ಇತ್ಯಾದಿ)ಖರ್ಚ್.ವಯ್ಲ್ಯಾನ್ ಠೀಕಾ ಮೆಳ್ಳ್ಯಾರಿಯ್ ಮೆಳ್ಳಿಂ.ಪುಣ್ ಅಪ್ಲೊ ಸ್ವಷ್ಟ್ ಉದ್ದೇಶಾ ತೆವ್ಶಿಂ ಮೆಟಾ ಕಾಡ್ತಾನಾ ಆಡ್ಕಳ್ ಮ್ಹಣ್ ದಿಸ್ಚ್ಯೊ ಹ್ಯೊ ಸರ್ವ್ ಸಂಗ್ತಿಂ ಸಿಲ್ಲಿ ಜಾತಾತ್ ಮ್ಹಣ್ ರೋಶನಾನ್ ದಾಕಯ್ಲ್ಯಾ.ಸೊ...ಹಾಂಗಾಸರ್ ಏಕ್  ಸ್ವಷ್ಟ್ ಜಾತಾ ಕಿತೆಂ ಮ್ಹಳ್ಯಾರ್ ಧಾರ್ಮಿಕ್ ಮಿಸಾಂವ್ ಕರುಂಕ್ ಸಂಘಟನ್,ಗೊವ್ಳಿಕ್ ಮಂಡಳಿಚೊ ಸಾಂದೊ ಜಾಂವ್ಚೊ ಗರ್ಜ್ ನಾ.ಇಗರ್ಜ್ ಮಾತೆಕ್ ವಾ ಪವಿತ್ರ್ ಸಭೆಕ್ ವಿರೋಧ್ ವೆಚಿಯ್ ಗರ್ಜ್ ನಾ.ಫಕತ್ ಮನ್ ಆನಿಂ ಆಸಕ್ತ್ ಆಸ್ಲ್ಯಾರ್ ಪಾಂವ್ತಾಂ ಮ್ಹಣುನ್.

ದುಸ್ರ್ಯಾನ್,ಸೆವೆಚ್ಯಾ ಮಿಸಾಂವಾಂಕ್ ಪೂರಕ್ ಜಾಂವ್ಚಿ ಆನಿಯೇಕ್ ಸಂಗತ್ ಮ್ಹಳ್ಯಾರ್ ಹ್ಯಾ ಕ್ರಿಸ್ಮಸ್ ಸುವಾಳ್ಯಾರ್ ರೋಶನ್,ಬೆಳ್ಮಣಾನ್ ಆನಿಂ ತಾಚ್ಯಾ ಸಾಂಗಾತ್ಯಾನಿಂ ಕಾಡ್’ಲೆಂ ಮೆಟ್ ’ಕ್ರಿಸ್ಮಸ್ ಗೋದಲಿ’.ದುಬ್ಳ್ಯಾ-ದಾಕ್ಟ್ಯಾಂಕ್  ಧಾರ್ಮಿಕ್ ಭೇದ್-ಭಾವ್ ನಾಸ್ತಾನಾ ದೋನ್ ಹಜಾರ್ ರುಪಾಯ್ ಮೋಲಾಚೆ ಶೊಪಿಂಗ್ ಕರುಂಕ್ ಆವ್ಕಾಸ್.ಹ್ಯಾ ಮಿಸಾಂವಾಂತ್ ಜಾಯ್ತ್ಯಾನಿಂ ಹಾತ್ ಮೆಳೆಯ್ಲ್ಯಾ.ನಿಜಾಕಿಯ್ ಭೋವ್ ಅಪುರ್ಬಾಯ್.ಅದ್ಲ್ಯಾ ವರ್ಸಾ ಉದ್ಯಾವರ್’ಚ್ಯಾ ಸ್ಟೀವನ್ ಕುಲಾಸೊ ಆನಿ ತಾಚ್ಯಾ ಸಾಂಗಾತ್ಯಾನಿಂ ಜಾಯ್ತ್ಯಾ ದುಬ್ಳ್ಯಾಂ ಕುಟ್ಮಾಂಕ್ ಕುಸ್ವಾರ್ ವಾಂಟ್ಚೆಂ ಮೇಟ್ ಕಾಡ್ಲೆಂ ತೆಂ ಹಾಂಗಾಸರ್ ಉಡಾಸಾಕ್ ಯೆತಾ.

ದೋನ್ ಹಜಾರ್ ರುಪಾಯ್ ಸಲೀಸಾಯೆನ್ ಖರ್ಚುನ್ ವೆಚೊ ಕಾಳ್ ಹೊ.ಖಂಚಿಯ್ ವಸ್ತ್ ಗೆತ್ಲ್ಯಾರಿಯ್ ಪಾಡ್ ಜಾವ್ನ್ ವಚಾತ್.ಪುಣ್ ಕಿತೆಯ್ ನಾತ್ಲ್ಯಾಂಕ್ ದೋನ್ ಹಜಾರ್ ರುಪಾಯ್ ಆಮೂಲ್ಯ್.ತ್ಯಾಚ್ ಅಮೂಲ್ಯ್ ರುಪಾಯಾಂಚೊ ವಾಂಟೊ ಅಪುಣ್ ಮ್ಹಣ್ತಾನಾ ಜಾಂವ್ಚಿ ಸಂತೃಪ್ತಿ-ಖುಶಿ ತಿಂ ವೆಗ್ಳಿಂ.ಮುಕ್ಲ್ಯಾ ಖಂಚಾಯ್ ದಿಸಾನಿಂ ಹಾಚೊ ಉಡಾಸ್ ಕಾಡ್ತಾನಾ ಖರ್ಚುನ್ ಗೆಲ್ಲ್ಯಾ ದೋನ್ ಹಜಾರ್ ರುಪಾಯ್ಚ್ಯಾಕಿಯ್ ಚಡ್ ಕೊಣಾಚ್ಯಾಯ್ ಸಂತೊಸಾನ್ ಅಪ್ಣಾಚೊ ವಾಂಟೊ ಆಸ್ಲೊ ಮ್ಹಳ್ಳೆಂ ಚಿಂತಪ್ ಉಭೆಂ ಜಾತಾನಾ ಜಾಂವ್ಚೊ ಸಂತೋಸ್ ಆಮರ್.

ತಸ್ವಿರೆ ಪಾಟ್ಲೊ ಏಕ್ ಲ್ಹಾನ್ ಉಡಾಸ್...

ಮ್ಹಜೆ ಥಾವ್ನ್ ಮ್ಹಾಕಾಚ್ ವೊಳೊಕ್ ಧರುಂಕ್ ಜಾಯ್ನಾತ್ಲಿ ತಸ್ವಿರ್ ಹಿ.ಸವ್ಯಾ ಕ್ಲಾಸಿಚಿ.ಪಾಟ್ಲ್ಯಾ ದಿಸಾನಿಂ ಮ್ಹಜ್ಯಾ ಎಕಾ ಇಷ್ಟಾನ್ ವಾಟ್ಸ್-ಅಫ’ರ್ ದಾಡ್’ಲ್ಲಿ.ಹ್ಯಾ ತಸ್ವೀರೆಂತ್ ಹಾಂವ್ ಖಂಯ್ ಆಸಾ ಮ್ಹಣುನ್ ಸೊಧುಂಕ್ ಮ್ಹಾಕಾಚ್ ಇಲ್ಲೊ ವೇಳ್ ಜಾಯ್ಜೆಯ್ ಪಡ್’ಲ್ಲೊ.ಹಾಂವೆ ಮ್ಹಾಕಾಚ್ ಸೊದ್ಲ್ಯಾ ಉಪ್ರಾಂತ್ ಉರ್ಲ್ಯಾಂಚಿ ತೊಂಡಾಂ ಪಳೆವ್ನ್ ನಾಂವಾಂ ಉಡಾಸಾಕ್ ಹಾಡ್’ಲಿಂ.ಆಮ್ಚೆ ಇಗರ್ಜೆಚೆ ಪ್ರಾಥಮಿಕ್ ಇಸ್ಕೊಲ್.ತವಳ್ ಪಾಂಚ್ ಜಣಾಂ ಶಿಕ್ಷಕಾಂ ಆಮ್ಕಾಂ.ತೀನ್ ಜಣಾಂ ಶಿಕ್ಷಕಿ.ಲಿಲ್ಲಿ ಟಿಚೆರ್,ಸೆಲಿನ್ ಟಿಚೆರ್ ಆನಿ ಮುಕೆಲ್ ಮೇಸ್ತ್ರಿಣ್ ಹಿಲ್ಡಾ ಟಿಚೆರ್.ಲಿಲ್ಲಿ ಟಿಚೆರಿನ್ ಪಯ್ಲ್ಯಾ ಆನಿಂ ದುಸ್ರ್ಯಾ ಕ್ಲಾಸಿಚೆ ಶಿಕಪ್ ದಿಲ್ಲೆಂ ತರ್,ಸೆಲಿನ್ ಟಿಚೆರಿನ್ ಶಿಕಯ್ಲೆಂ ತಿಸ್ರ್ಯಾ ಆನಿ ಚೊವ್ತ್ಯಾ ಕ್ಲಾಸಿಂತ್.ಲಿಲ್ಲಿ ಟೆಚೆರ್ ಆನಿ ಸೆಲಿನ್ ಟಿಚೆರ್ ಆಮ್ಚ್ಯಾ ಇಸ್ಕೊಲಾಕ್ ಯೆಂವ್ಚ್ಯಾ ಪುಡೆಂ ಮರಿಯಾ ಟಿಚೆರ್ ಆನಿ ಸಿ| ರೋಜಾ’ಯ್ ಆಮ್ಚ್ಯಾ ಇಸ್ಕೊಲಾಂತ್ ಶಿಕಯ್ತಾಲಿಂ.ಉಪ್ರಾಂತ್ ತಿಂ ವರ್ಗ್ ಜಾವ್ನ್ ಆಮ್ಚ್ಯಾಚ್ ಇಗರ್ಜೆಚ್ಯಾ ಆನಿಯೆಕ್ ಇಸ್ಕೊಲಾಕ್ ಗೆಲಿಂ ಮ್ಹಣ್ಯಾಂ.ತಿಂ ಸರ್ವ್ ಹ್ಯಾ ತಸ್ವೀರೆಂತ್ ನಾಂತ್.

ಪಾಂಚ್ವ್ಯಾ ಕ್ಲಾಸಿ ಥಾವ್ನ್ ಸಾತ್ವ್ಯಾ ಕ್ಲಾಸಿ ಪರ್ಯಾಂತ್ ದೋನ್ ವಿಷಯಾಂ ಲೇಕಾರ್ ಹ್ಯಾ ತಸ್ವಿರೆಂತ್ ಆಸ್ಲ್ಯಾ ತೇಗಾನಿಂ ಶಿಕಯ್ಲೆಂ.ತಸ್ವಿರೆಂತ್ ಮಧೆಂ ಬಸುನ್ ಆಸ್ಚೊ ಸವ್ಯಾ ಕ್ಲಾಸಿಚೊ ಕ್ಲಾಸ್ ಮಾಸ್ಟರ್ ದಿವಾಕರ ಮಾಸ್ಟರ್.ಕನ್ನಡ ಶಿಕಯ್ತಾಲೊ ಜಾಲ್ಲ್ಯಾನ್ ಎಕಾ ರೀತಿನ್ ಪಯ್ಲೆ ಸಾಹಿತ್ಯಾಚಿ ರೂಚ್ ಚಾಕಯ್ಲಿ ತಾಣೆಚ್ ಮ್ಹಣ್ಯೆತ್.ಸಾಂಗಾತಾಚ್ ತೊ ವಿಜ್ಞಾನ್ ಪಾಠ್’ಯಿ ಶಿಕಯ್ತಾಲೊ.ತುಮ್ಚ್ಯಾ ಧಾವ್ಯಾಕ್ ಬಸ್ಲೊ ಆಂತೋನ್ ಮಾಸ್ಟರ್.ಶಿಕಯ್ಲೆಂ ಲೆಕ್ಕ ಆನಿ ಹಿಂದಿ ಪಾಠ್.ಉಜ್ವ್ಯಾಕ್ ಬಸ್ಲಿಂ ಮುಕೆಲ್ ಮೇಸ್ತ್ರಿಣ್ ಹಿಲ್ಡಾ ಟಿಚೆರ್.ಇಂಗ್ಲಿಷ್ ಆನಿ ಸಮಾಜ್ ವಿಜ್ಞಾನ್ ಶಿಕಯ್ತಾಲಿಂ.ತಸ್ವಿರೆಂತ್ ದಿಸ್ಚೆಂ ಉರ್ಲೆಂ ಸರ್ವ್ ಎಕಾ ಕಾಳಾಚೆ ಮ್ಹಜೆ ದೊಸ್ತ್.ಹಾ... ಸಾಂಗ್ಲ್ಯಾಪರಿಂ ಹಾಂವೆಂ ಲಿಕ್ಲ್ಯಾ ಲಲಿತ್ ಪ್ರಬಂಧಾನಿಂ ಹಿಂ ಸರ್ವ್ ತಾಚ್ಯಾಚ್ ನಾಂವಾನ್ ಆನಿ ಥೊಡೆಂ ಪಾವ್ಟಿ ನಾಂವ್ ಬದ್ಲುನ್ ತವಳ್ ತವಳ್ ಆಯ್ಲ್ಯಾಂತ್.

ಆನ್ಯೇಕ್ ವಿಷಯ್ ಪಾಂಚ್ ಜಣಾಂ ಶಿಕ್ಷಕಾಂ ಆಸ್ಚ್ಯಾ ಆಮ್ಚ್ಯಾ ಹ್ಯಾ ಇಸ್ಕೊಲಾಂತ್ ಆತಾ ಆಸ್ಚೊ ಏಕ್ ಮಾಸ್ಟರ್ ಮಾತ್ರ್.ಮ್ಹಾಕಾ ಶಿಕಯ್ಲಿಂ ಸರ್ವ್ ಆಧ್ಯಾಪಕಾಂ ನಿವೃತ್ತ್ ಜಾಲ್ಯಾಂತ್.ಪುಣ್ ದಿವಾಕರ ಮಾಸ್ಟರ್ ರಿಟಾಯರ್ಡ್ ಜಾಲ್ಯಾರಿಯ್ ಭುರ್ಗ್ಯಾಂಕ್ ಶಿಕೊಂವ್ಕ್ ಯೆತಾ ಮ್ಹಣುನ್ ಆಯ್ಕಾಲಾಂ.

ಉತ್ರಾಂಚೊ ರತಿಖೆಳ್-ಸೆಕ್ಸ್ಟಿಂಗ್ (Sexting)

ಧಾ ಮಹಿನೆಂ ಸೊಂಪ್ಲ್ಯಾತ್ ಜಾಯ್ಜೆಯ್.ಎಕಾ ಹೈಸ್ಕೂಲಾಕ್ ಪ್ರೌಢ್ ಪ್ರಾಯೆಚ್ಯಾ (Teenage /Adolescents) ಭುರ್ಗ್ಯಾ ಥಂಯ್ ದಿಸೊನ್ ಯೆಂವ್ಚ್ಯಾ ಸಮಸ್ಯಾಂ ವಿಶ್ಯಾಂತ್ ಮಾಹೆತ್ ವಾಂಟುಕ್,ತ್ಯಾ ಹೈಸ್ಕೂಲಾಚ್ಯಾ ಮುಕೆಲ್‌ಮೇಸ್ತ್ರಿಣೆಚ್ಯಾ ಅಪೊವ್ಣ್ಯಾಕ್ ಪಾಳೊ ದೀವ್ನ್ ಗೆಲ್ಲೊ.ಮಾಹೆತ್ ದಿತಾನಾ ದೈಹಿಕ್,ಶೈಕ್ಷಣಿಕ್,ಸಮಾಜಿಕ್ ಆನಿಂ ಮಾನಸಿಕ್ ಸಮಸ್ಯೆಂ ವಿಂಗಡ್ ಕರುನ್ ಮಾನಸಿಕ್ ಸಮಸ್ಯೆವಿಶಿಂ ಉಲಯ್ತಾನಾ,ಆಜ್-ಕಾಲ್ ಮೊಬೈಲಾಂ ವಾಪಾರ್ತಾಸ್ತಾನಾ (ಆಶ್ಲೀಲ್ ಚಿತ್ರಾಂ,ಪಿಂತುರಾಂ ದೆಕ್ಚಿಂ)ದಾಟ್ವೊನ್ ಪಡ್ಚ್ಯಾ ಸಮಸ್ಯಾಂ ವಿಶಿಂ ಇಲ್ಲೇಶಿ ಮಾಹೆತ್ ಆನಿಂ ವಿವರುನ್ ಸಾಂಗ್ಲೆಂ.ತೆಂ ಮ್ಹಜೆಂ ಉಲವ್ಣೆಂ ಸೊಂಪ್ಲ್ಯಾ ಉಪ್ರಾಂತ್ ಮುಕೆಲ್ ಮೇಸ್ತ್ರಿಣೆನ್ ತಿಚ್ಯಾ ದಪ್ತರಾಕ್ ಅಪವ್ನ್ "ಹಾಂವೆ ಸಾಂಗಾನಾತ್ಲ್ಯಾರಿಯ್ ತುವೆಂ ಗರ್ಜೆಚ್ಯಾ ವಿಷಯ್‌ಚೆರ್ ಉಲಯ್ಲಾಯ್,ಆಮ್ಚ್ಯಾ ಇಸ್ಕೊಲಾಂತಿಯ್ ತಸ್ಲಿಂ ಘಡಿತಾಂ ಘಡ್ಲ್ಯಾಂತ್,ಪೋರ್ ಏಕ್ಲೊ ಚೆರ್ಕೊ ಮೊಬೈಲಾರ್ ಅಶ್ಲೀಲ್ ಪಿಂತುರ್ ಪಳೆವ್ನ್ ಮ್ಹಜೆಲಾಗಿಂ ಶಿರ್ಕಾಲಾಂ ಆನಿಂ ಹ್ಯಾ ದಿಸಾನಿಂ ಆಸ್ಲ್ಯಾ ಸಮಸ್ಯೆ ವಿಶಿಂ ಮಾಹೆತ್ ದಿಂವ್ಚಿ ಆಧಿಕ್ ಗರ್ಜ್ ಉಬ್ಜಾಲಾಂ" ಮ್ಹಣೊಂಕ್ ಲಾಗ್ಲಿಂ.ತಿಣೆಂ ಸಾಂಗ್ಚೆಂ ಸಾರ್ಕೆ ಮ್ಹಣ್ ಭೊಗ್ಲೆಂ.ಆಜ್-ಕಾಲ್ ನಿಜಾಯ್ಕಿ ಆಸ್ಲ್ಯಾ ಸಮಸ್ಯಾಂ ವಿಶಿಂ ಸವಿಸ್ತಾರ್ ಮಾಹೆತ್ ದಿಂವ್ಚಿಂ ಗರ್ಜ್ ಆಸಾ.ಪುಣ್ ಹಾಂಗಾಸರ್ ಗುಮಾನಾಕ್ ವ್ಹರಿಜೆಯ್ ಜಾಲ್ಲಿಂ ಪ್ರಮುಕ್ ಗಜಾಲ್ ಮ್ಹಳ್ಯಾರ್,'ಲೈಂಗಿಕತಾ' ಮ್ಹಳ್ಳೊಂ ವಿಷಯ್ ಇತ್ಲೊ ಸಂಕಿರ್ಣ್‌ಗಿ,ಫಕತ್ ಎಕಾ ಆಂಕ್ಯಾರ್ ಉಜ್ವಾಡ್ ಫಾಕೊಂವ್ಕ್  ಕಷ್ಟ್ ತರಿಯ್,ಹ್ಯಾ ಆಂಕ್ಯಾ ಮಾರಿಫಾತ್ ನ.ಬಾ.ಜೆ ಪತ್ರಾನ್ ಇಲ್ಲೇಶೆ ತರಿಯ್ ಪ್ರಯತನ್ ಕೆಲ್ಲೆಂ ಮೆಚ್ವೊಂಚಿ ಗಜಾಲ್‌ಚ್.

ವ್ಹಯ್...ಹ್ಯಾ ದಿಸಾನಿಂ ತಾಂತ್ರಿಕತಾ ವಾಡ್ಲಾ.ಜೆಂ ಕಿತೆಂ ಆಮ್ಕಾಂ ಜಾಯ್ ತೆಂ ಸರ್ವ್ ಹ್ಯಾ ದಿಸಾನಿಂ ಜಾಳಿಜಾಗ್ಯಾಂ ಮಾರಿಫಾತ್ ಫಾವೊ ಜಾತಾ.ಆಮಿಂ ಜಾಣಾಂವ್ ಆನಿಂ ವಾಂಚ್ಲಾ ಹ್ಯಾ ತಾಂತ್ರಿಕತೆ ವರ್ವಿ ಕಿತ್ಲೆಂ ಬರೆಂಪಣ್ ಆಸಾಗಿ ತಿತ್ಲೆಚ್ ವಾಯ್ಟ್ ಆಸಾ.ಲೈಂಗಿಕತೆಚ್ಯಾ ಆಶ್ಲೀಲ್ ಸಂಗ್ತೆಂ ವಿಶ್ಯಾಂತ್ ಉಲಯ್ತಾನಾ ಬರೆಂಪಣಾಚ್ಯಾಕಿಯ್ ವಾಯ್ಟ್‌ಚ್ ಚಡ್.ಆಶ್ಲೀಲ್ ಚಿತ್ರಾಂ ದೆಕ್ಚಿಂ,ಪಿಂತುರಾಂ ದೆಕ್ಚಿಂ ಆನಿಂ ತಾಕಾ ವ್ಯಸನಿತ್ ಜಾಂವ್ಚೆ ಆಜ್-ಕಾಲ್ ಸಾಮಾನ್ಯ್ ಸಮಸ್ಸೊ ಜಾವ್ನ್ ವಾಡೊನ್ ಆಸಾ ತಶೆಂ ಭೊಗ್ತಾ. ಹಾಚ್ಯಾ ಮಧೆಂ ಹ್ಯಾ ದಿಸಾನಿಂ ಸೆಕ್ಸ್ಟಿಂಗ್ ವಾ ಸೆಕ್ಸ್ ಚಾಟ್ ನಾಂವಾಚೊ ನವೊ ಏಕ್ ಸಮಸ್ಸೊ ಉದೆವ್ನ್ ಆಯ್ಲಾ.

'ಸೆಕ್ಸ್ಟಿಂಗ್' ಮ್ಹಳ್ಯಾರ್ ಕಿತೆಂ?

ಲೈಂಗಿಕ್ ಭಗ್ಣಾಂ ಉದ್ರೇಕಿತ್ ಕರ್ಚ್ಯಾ ತಸ್ಲೆಂ ಸಂದೇಶ್ (Text) ದೋಗ್ ವಾ ಚಡ್ ವ್ಯಕ್ತಿಂ (Group texting) ಎಕಾಮೆಕಾ ವಾಂಟುನ್ (ಆಶಾರ್-ಪಾಶಾರ್ ಕರ್ಚೆ) ಘೆಂವ್ಚೆಂ ಜಾವ್ನಾಸಾ 'ಸೆಕ್ಸ್ಟಿಂಗ್'. ಹಾಂಗಾಸರ್ ಆಶೆಂ ಕರುಂಕ್ ವಾಪಾರ್ಚಿಂ ಮುಳಾವಿಂ ಸಾಧನಾಂ ಮೊಬೈಲಾಂ.ದುಸ್ರ್ಯಾನ್ ಸಾಮಾಜಿಕ್ ಜಾಳಿಜಾಗೆಂ (Social Network) ಆನಿಂ ಲೈಂಗಿಕ್ ಸಂಗ್ತಿಂ ವಿಶ್ಯಾಂತ್ ಉಲೊಂವ್ಚೆಂ (Sex Chat) ಜಾಳಿಜಾಗೆಂ (ತಸ್ಲೆಂ ಜಾಯ್ತೆಂ ಜಾಳಿಜಾಗೆಂ ಆಸಾತ್).ಆಜ್-ಕಾಲ್ ಉದೇವ್ನ್ ಆಯ್ಲ್ಯಾ ಆಧುನಿಕ್ ಮೊಬೈಲಾಂ ವರ್ವಿ ಆನಿಂ ಥಂಯ್ಸರ್ ಮೆಳ್ಚ್ಯಾ ಆಪ್ಸಾಂ (Apps) ವರ್ವಿ ಹೆಂ ತಿಕ್ಕೆಶೆ ಚಡ್‌ಚ್ ಘಡ್ತಾ.ಹಾಂಗಾಸರ್ ಆಮಿಂ ಗುಮಾನಾಕ್ ವರಿಜೆಯ್ ಜಾಲ್ಲಿಂ ಆನ್ಯೇಕ್ ಭೋವ್ ಪ್ರಮುಕ್ ಗಜಾಲ್ ಮ್ಹಳ್ಯಾರ್ ಆಶೆಂ ಸಂದೇಶ್ ವಾಂಟುನ್ ಘೆಂವ್ಚೆ ವಿಂಗಡ್ ಲೈಂಗಿಕತೆಚ್ಯಾ (Opposite sex members) ಮ್ಹನ್ಶ್ಯಾಂ(ಚಲೊ-ಚಲಿ ವಾ ದಾದ್ಲೊ-ಸ್ತ್ರೀ)ಮಧೆಚ್ ಘಡಾಜೆಯ್ ಮ್ಹಣ್ ನಾ.ದೋಗ್ ಪುರುಷ್ ವಾ ದೊಗಾಯ್ ಚಲಿಯಾಂ(ಸ್ತ್ರೀಯಾಂ)ಮಧೆಯ್ ಅಶೆಂ ಘಡ್ತಾ.ದೋಗ್ ಚಲೆಂ(ವಾ ದಾದ್ಲೆಂ) ಸೆಕ್ಸ್ಟಿಂಗ್ ಕರ್ತಾನಾ ಸಾಮಾನ್ಯ್ ಜಾವ್ನ್ ಚಲಿಯೆ ವಾ ಸ್ತ್ರೀಯೆ ವಿಶ್ಯಾಂತ್ ಆಶ್ಲೀಲ್ (Forwarded Vulgar SMS ಆನಿಂ Romantic SMS ನ್ಹಯ್ ಮ್ಹಣೊನ್ ಸಮ್ಜೊಚೆಂ) Text ವಾಂಟುನ್ ಘೆಂವ್ಚೆಂ ಆನಿಂ ದೊಗ್ ಚಲಿಯಾಂ ವಾ ಸ್ತ್ರಿಯಾಂ ಆಶೆಂ ಕರ್ತಾನಾ ದಾದ್ಲೊ ವಾ ಚಲ್ಯಾಂ ವಿಶ್ಯಾಂತ್ ಆಶ್ಲೀಲ್ ಟೆಸ್ಟ್ ವಾಂಟುನ್ ಘೆಂವ್ಚೆಂ ಘಡ್ತಾ.ದೋನ್ ವಿಂಗಡ್ ಲೈಂಗಿಕತೆಚ್ಯಾ ವ್ಯಕ್ತಿಂ ಮಧೆಂ (ದಾದ್ಲೊ ಆನಿಂ ಸ್ತ್ರೀ) ಸೆಕ್ಸ್ಟಿಂಗ್ ಕರ್ತಾನಾ ಆಶ್ಲೀಲ್ ಉತ್ರಾಂ ಪಾಶಾರ್ ಕರ್ಚಿಂ ಆನಿಂ ದಾದ್ಲ್ಯಾ-ಸ್ತ್ರಿಯೆಂ ಮಧೆಂ ಸಂಭೋಗ್ ಘಡ್ಚ್ಯಾ ತಶೆಂ ಕಾಲ್ಪನಿಕ್ ಪಾತ್ರ್ ಖೆಳೊನ್ ಟೆಸ್ಟ್ ಏಕಾಮೆಕಾ ವಾಂಟುನ್ ಘೆಂವ್ಚೆಂ ಚಲ್ತಾಂ.ಆಜ್-ಕಾಲ್ ಆಯ್ಲ್ಯಾ ಆಧುನಿಕ್ ತಾಂತ್ರಿಕ್ ಮೊಬೈಲಾಂ ನಿಮ್ತಿಂ ಲೈಂಗಿಕ್ ಉದ್ವೇಗ್ ಕರ್ಚಿ ಚಿತ್ರಾಂ ಆನಿಂ ವಿಡಿಯೊ ಆಶಾರ್ ಪಾಶಾರ್ ಕರ್ಚೆಯ್ ಚಲ್ತಾ. ಹ್ಯಾ ಸರ್ವ್ ಗಜಾಲಿನಿಂ ಲೈಂಗಿಕ್ ವಿಶ್ವೆ ಸ್ವ-ಉದ್ವೇಕಿತ್ ಕರ್ನ್ ಸ್ಖಲನ್ ಸಂತೃಪ್ತಿ ಜೊಡ್ಚೆ ಸಾಮಾನ್ಯ್ ಜಾವ್ನಾಸಾ.

'ಸೆಕ್ಸ್ಟಿಂಗ್' ಕರ್ತಾನಾ ದೋಗ್ ವ್ಯಕ್ತಿಂ ಪರಿಚಯ್‌ಸ್ಥ್ ಆಸಾಜೆಯ್ ಮ್ಹಣುನ್ ನಾ.ಚಡಾವತ್ ಹೆಂ ಸರ್ವ್ ಘಡ್ಚೆಂ ಆಪರಿಚಿತ್ ವ್ಯಕ್ತಿಂ ಮಧೆಂ.ಜಾಯ್ತ್ಯಾ ಪಾವ್ಟಿಂ ಆಶೆಂ ಕರ್ಚೆ ದೋಗ್ ವ್ಯಕ್ತಿ ಎಕಾಮೆಕಾಚೆ ತಸ್ವೀರ್ ಸಮೇತ್ ಪಳೆವ್ನ್ ಆಸಾತ್.ಆನಿಂ ಥೊಡೆಂ ಪಾವ್ಟಿ ಮುಕ್ಲ್ಯಾನ್ ಟೆಸ್ಟ್ ಕರ್ಚೊ ವ್ಯಕ್ತಿ ಚಲೊ ವಾ ಚಲಿಂ ಮ್ಹಳ್ಳೆಯ್ ಜಾಣಾಂ ಜಾಂವ್ಕ್ ವ್ಹಚನಾಂತ್.ಮುಕ್ಲೊ ವ್ಯಕ್ತಿ ದಾದ್ಲೊ ತರ್ ಅಪುಣ್ ದಾದ್ಲೊ ಜಾಲ್ಯಾರಿಯ್ ಸ್ತ್ರೀ ಮ್ಹಣ್ ವಾ ಮುಕ್ಲೊ ವ್ಯಕ್ತಿ ಸ್ತ್ರೀ ತರ್ ಅಪುಣ್ ಸ್ತ್ರೀ ಜಾಲ್ಯಾರಿಯ್ ದಾದ್ಲೊ ಮ್ಹಣ್ ಕಾಲ್ಪನಿಕ್ ಪಾತ್ರ್ ಖೆಳೊನ್ (Trans-sexual ತಶೆಂ) ಸೆಕ್ಸ್ಟಿಂಗ್ ಕರ್ನ್ ಲೈಂಗಿಕ್ ವಿಶ್ವೆಂ ಸ್ವ-ಉದ್ವೇಕಿತ್ ಕರುನ್ ಸ್ಖಲನ್ ಸಂತೃಪ್ತಿ ಜೊಡ್ಚೆಯ್ ಆಸಾ.ಆಧುನಿಕ್ ತಾಂತ್ರಿಕ್ ಆಪ್ಸಾಂ (Apps)ವರ್ವಿ ಲೈಂಗಿಕ್ ವಿಶ್ವ್ಯಾಂಚಿಂ ಚಿತ್ರಾಂ( ಸ್ವಂತ್ ತರ್ ಮುಕಾಮುಳ್ ಸೊಡ್ನ್) ವಾ ವಿಡಿಯೊ ವಾಂಟುನ್ ಘೆಂವ್ಚೆ (ದಾದ್ಲೊ ತರ್ ಪೆಂಕ್ಟಾ ಸಕಯ್ಲೆಂ ವಿಣ್ಗೆ ಆಂಗ್ ಆನಿಂ ಸ್ತ್ರೀಯಾಂ ತರ್ ಥನಾಂ ಆನಿಂ ಪೆಂಕ್ಟಾ ಸಕಯ್ಲೆ ವಿಣ್ಗೆ ಆಂಗ್) ಘಡ್ತಾ.ಆಶೆಂ ವಾಂಟುನ್ ಘೆತ್ಲಿಂ ಚಿತ್ರಾಂ ವಾ ವಿಡಿಯೊ ಸ್ವಂತ್ ಜಾಂವ್ಕಿಯಿ ಪುರೊ ವಾ ಜಾಳಿಜಾಗ್ಯಾ ಥಾವ್ನ್ ಡೌನ್‌ಲೋಡ್ ಕೆಲ್ಲೆಲೆಯ್ ಆಸ್ತಿತ್.

ಕಿತ್ಯಾಕ್ ಆಶೆಂ ಘಡ್ತಾ?

ಭೋವ್ ಸಾಮಾನ್ಯ್ ಜಾವ್ನ್ 'ಸೆಕ್ಸ್ಟಿಂಗ್' ಸಮಸ್ಯಾಕ್ ಬಲಿ ಜಾಂವ್ಚೆ ಚಡಾವತ್ ಪೊಂದ್ರಾ ಥಾವ್ನ್ ತೀಸ್ ವರ್ಸಾ ಪರ್ಯಾಂತ್ಲೆ ತರ್ನಾಟೆ(ವ್ಹಡಾಂ ಥಂಯ್ ಆಶೆಂ ಚಲನಾ ಮ್ಹಣೊಂಕಿಯ್ ಜಾಯ್ನಾ). ಆಶೆಂ ತರ್ನಾಟ್ಯಾ ಪ್ರಾಯೆರ್ ಹೊ ಸಮಸ್ಸೊ ದಿಸುನ್ ಯೆತಾನಾ ಮುಕಾರ್ ಜಾಣ್ತೆಂ ಜಾತಾನಾಯ್ ಸಮಸ್ಸೊ ಮುಕಾರುನ್ ವೆಚಿ ಸಾಧ್ಯತಾ ಆಸಾ.ಆಶೆಂ ಆಸ್ತಾ ಹ್ಯಾ ಸಮಸ್ಯಾಕ್ ಕಾರಣ್ ಕಿತೆಂ? ಮ್ಹಳ್ಳ್ಯಾ ಸವಾಲಾಕ್ ಜಾಪ್ ಸಲೀಸಾಯೆಚಿ ನ್ಹಯ್ ತರಿಯ್ ವಾಡೊನ್ ಆಯ್ಲ್ಯಾ ತಾಂತ್ರಿಕ್ ಗಜಾಲೆಂ ಸಂಗಿಂ ಆಸ್ಕತ್ ವ ಬದ್ಲೊನ್ ಆಯ್ಲಿಂ ಸಮಾಜಿಕ್ ವ್ಯವಸ್ಥಾ ಮ್ಹಣ್ಯೆತ್ ಕೊಣ್ಣಾ. ಮ್ಹನ್ಶ್ಯಾ ಪ್ರಾಯ್ ಸಾಮಾನ್ಯ್ ಜಾವ್ನ್ ವಾಡುನ್ ಯೆತಾನಾ ಕುಡಿಚ್ಯಾ ವಾಡವಳೆ ಸಂಗಿಂ (ಲೈಂಗಿಕ್ ವಾಡಾವಳ್ ಅನಿಂ ಬದ್ಲಾವಣ್ ಧರ್ನ್) ಹೊರ್ಮೊನ್ (ಲೈಂಗಿಕ್ ಹೊರ್ಮೊನ್ ಧರುನ್) ಆನಿಂ ಮಾನಸಿಕ್ ವಾಡಾವಳ್‌ಯಿ ಘಡ್ತಾ. ಪುಡೆಂ ಆಮ್ಚಿಂ ಕುಟ್ಮಾಂ ವ್ಯವಸ್ಥಾ ಲಾಂಭಾಯೆಚಿ ಆನಿಂ ರೂಂಧಾಯೆಚಿ ಆಸ್ಲ್ಯಾನ್ ಚಡಾವತ್ ವೇಳ್ ಭುರ್ಗಿಂ ಖೆಳ್ಚ್ಯಾಂತ್ ಪಾಶಾರ್ ಕರ್ತೆಲಿಂ. ಆತಾಂ ಕುಟ್ಮಾಂ ವ್ಯವಸ್ಥಾ ಮಟ್ವಿ ಜಾಲಾಂ.ಇಷ್ಟಾಂ ಸಾಂಗಾತಾ ಭರ್ಸಣೆಂ ಭೋವ್ ಉಣೆಂ.ತ್ರಾಂತ್ರಿಕ್ ವಾಪಾರ್ ಪ್ರಮುಕ್ ಜಾವ್ನ್ ಜಾಳಿಜಾಗ್ಯಾಂಚೊ ವಾಪಾರ್ ಲ್ಹಾನ್‌ಪಣಾರ್‌ಚ್ ಶಿಕ್ತಾತ್.ವಿವಿಧ್ ರೀತಿಚ್ಯಾ ಜಾಳಿಜಾಗ್ಯಾಂಚೊ ವಾಪಾರ್ ಜಾತಾ.ಕುಡಿಚ್ಯಾ ಆನಿಂ ಲೈಂಗಿಕ್ ಬದ್ಲಾವಣೆ ವೆಳಾರ್ ಎಕ್ಸುರಿ ಚಿಂತ್ಪಾ(ಎಕ್ಸುರ್‌ಪಣಾಂತ್) ಮತಿಂತ್ ಉದೆತಾತ್ ತವಳ್ ಆಶ್ಲೀಲ್ ಪಿಂತುರಾಂ ದೆಕ್ಚೊ ಸಹವಾಸ್ ಜಾತಾ.ಏಕ್ ದೋನ್ ಪಾವ್ಟಿ ಕೊಣಾಚಾಯ್ ಗುಮಾನ ವಿಣೆಂ ತಾಚಿ ರೂಚ್ ಚಾಕ್ಲ್ಯಾ ಉಪ್ರಾಂತ್ ತಿಂ ಗಿರಾಂತ್ ಜಾವ್ನ್ ಮುಕಾರ್ಸುನ್ ವೆತಾ.

ಆಶೆಂ ಗಿರಾಂತ್ ಜಾವ್ನ್ ಮುಕಾರುನ್ ವೆತಾನಾ ಜೆಂ ಕಿತೆಂ ಪಿಂತುರಾಂನಿಂ ದೆಕ್ತಾಂ ತಶಿಂ ಕರ್ನಿ ಅಪ್ಣಾನಿಯ್ ಕರಿಜೆಯ್ ಮ್ಹಳಿಂ ಆಶಾ ಉಬ್ಜಾತಾ.ಪುಣ್ ವಾಸ್ತವಿಕ್ ಜಾವ್ನ್ ಆಶೆಂ ಮುಕಾರುಂಕ್ ಥೊಡ್ಯಾಂಕ್ ಆಂತಸ್ಕರ್ನ್ ಪರ್ವಣ್ಗಿ ದಿನಾ.ತ್ಯಾ ಪಾಸತ್ ಸೆಕ್ಸ್ಟಿಂಗ್'(ಕಲ್ಪನಾ)ಚೊ ಅಧಾರ್ ಘೆತಾತ್. ಪುಣ್ ಆಶೆಂ ಕಾಲ್ಪನಿಕ್ ಜಾವ್ನ್ ಸೆಕ್ಸ್ಟಿಂಗ್ ಸಂಭೋಗ್ ವೊಳ್ಕೆಚ್ಯಾ ವ್ಯಕ್ತಿ ಸಂಗಿಂ ಕರುಂಕ್ ವಿಸಾರುಂಕ್ ಲಜ್ ಆಡ್ಕಳ್ ಹಾಡ್ತಾನಾ ಆಪರಿಚಿತ್ ವ್ಯಕ್ತಿ ಸಂಗಿಂ ಹೆಂ ಸರ್ವ್ ಮುಕಾರುನ್ ವ್ಹರ್ತಾತ್.

ಹೊ ಏಕ್ ಮಾನಸಿಕ್ ಸಮಸ್ಸೊ?

ಎದೊಳ್ ಸೆಕ್ಸ್ಟಿಂಗ್ ಏಕ್ ಪರಿಪೂರ್ಣ್ ಸ್ವತಂತ್ರ್ ಮಾನಸಿಕ್ ಪಿಡಾ ಮ್ಹಣ್ ವೊಲೊಂವ್ಕ್ ನಾ ಜಾಲ್ಯಾರಿಯ್ ಹ್ಯಾ ಸಮಸ್ಯಾಂತ್ ದಿಸೊನ್ ಯೆಂವ್ಚಿಂ ಲಕ್ಷಣಾಂ ಮಾನಸಿಕ್ ಪಿಡೆಚಿ ಲಕ್ಷಣಾಂ ಜಾವ್ನ್ ಆಸಾತ್.ಜಶೆಂ ಆಲ್ಕೊಹೊಲ್ ಆನಿಂ ಮಾಧಕ್ ವೊಕ್ತಾಚೆಂ ವ್ಯಸನ್(ಆಡಿಕ್ಟ್) ಜಾಲ್ಯಾಪರಿಂ ಸೆಕ್ಸ್ಟಿಂಗ್ ಗಿರಾಂತ್ ವ್ಯಸನ್ ಜಾವ್ನ್ ಪರಿವರ್ತಿತ್ ಜಾತಾನಾ ಪಿಡಾಚ್ ಮ್ಹಣ್ಯೆತ್.ಲೈಂಗಿಕ್ ವಿಶ್ವೆಚೆಂ ವಿಣ್ಗಿ ತಸ್ವೀರ್ ಕಾಡ್ನ್ ಆಶಾರ್-ಪಾಶಾರ್ ಕರ್ಚೆ ಸೈಕೊ -ಸೆಕ್ಶುವಲ್ ಡಿಸ್‌ವೊರ್‍ಡರಾಂತ್(Paraphilias-ಆಸ್ವಾಭಾವಿಕ್ ಜಾವ್ನ್ ಲೈಂಗಿಕ್ ಸಂತೃಪ್ತಿ ಜೊಡ್ಚಿಂ)ಯೆಂವ್ಚ್ಯಾ ಎಗ್ಸಿಬಿಷನಿಸಮ್'(Exhibistionism-ಲೈಂಗಿಕ್ ವಿಶ್ವ್ಯಾಚೆಂ ಉಗ್ತೆಂ ಪ್ರದರ್‍ಶಾನ್ ಕರ್ನ್ ಲೈಂಗಿಕ್ ತೃಪ್ತಿ ಜೊಡ್ಚಿಂ ಪಿಡಾ)ಚೆಂ ಲಕ್ಷಣ್.ಹಾಚೆಂ ಶಿವಾಯ್ ಏಕ್ ಕರ್ನೆ ವಿಶ್ಯಾಂತ್ ಪರತ್-ಪರತ್ ಚಿಂತ್ಪಾ(Obsession) ಯೇವ್ನ್ (ತಶೆಂ ಕರ್ಚೆ ಚೂಕ್ ವಾ ವಾಯ್ಟ್ ಮ್ಹಣೊನ್ ಖಳಿತ್ ಆಸೊನಿಯ್) ತಿಂ ಕರ್ನಿ ಆನಿಂ ತಾಚೆಂ ಥಾವ್ನ್ ಮೆಳ್ಚಿಂ ಸುಕ್ ಪರತ್-ಪರತ್ ಜೊಡುಂಕ್ ಆಂವ್ಡೆವ್ಚೆಂ(Craving) ಜಶೆಂ ಮಾಧಕ್ ವೊಕ್ತಾಂ ವಾಯ್ಟ್ ಮ್ಹಣ್ ಖಳಿತ್ ಆಸೊನಿಯ್ ತಾಚೊ ವಾಪಾರ್ ಕರ್ಚೊ) ಮಾನಸಿಕ್ ಪಿಡೆಚಿ (Impulse control disorder) ಲಕ್ಷಣಾಂ ಜಾವ್ನಾಸಾತ್. ಲ್ಹಾನ್ ಪ್ರಾಯೆರ್ (ಪ್ರೌಡ್ ಪ್ರಾಯೆಚ್ಯಾ ಸುರ್ವೆರ್ ಅಪುಣ್ ವಿರೋಧ್ ಲೈಂಗಿಕತೆಚೊ (ಚಲೊ, ಚಲಿಂ ಆನಿಂ ಚಲಿಂ, ಚಲೊ) ಮ್ಹಣ್ ಕಲ್ಪನ್ ಕರ್ಚಿಂ ಗಿರಾಂತ್ ಮುಕಾರ್ ಸರೊನ್ ಟ್ರಾನ್ಸ್‌ಸೆಕ್ಶುವಲ್ ಜಾವ್ನ್ ಮುಕಾರುನ್ ಸಲಿಂಗ್‌ಕಾಮುಕ್ಪಣ್ (Homosexual) ಜಾವ್ನ್ ಪರಿವರ್ತಿತ್ ಜಾಂವ್ಚಿ ಸಾಧ್ಯತಾ ನೆಗಾರುಂಕ್ ಜಾಯ್ನಾ. ಹಿಂ ಸರ್ವ್ ಲಕ್ಷಣಾಂ ಸೆಕ್ಸ್ಟಿಂಗ್ ಸಮಸ್ಯಾಂತ್ ಮುಕೆಲ್ ರೀತಿನ್ ದಿಸೊನ್ ಯೆತಾ ಜಾಲ್ಲ್ಯಾ ಪುಡ್ಲ್ಯಾ ದಿಸಾನಿಂ ಹೊ ಏಕ್ ಪರಿಪೂರ್ಣ್ ಮಾನಸಿಕ್ ಸಮಸ್ಸೊಚ್ ಜಾಯ್ತ್.

ಕಶೆಂ ಪರ್ಯಾರ್ ಜೊಡ್ಯೆತ್?

ತುಮ್ಚ್ಯಾ ಭುರ್ಗ್ಯಾಂಚಿ ಜತನ್ ತುಮ್ಚ್ಯಾಚ್ ಹಾತಿಂ ಆಸಾ. ವ್ಹಡ್-ವ್ಹಡ್ ಮೊಬೈಲಾಂ ಭುರ್ಗ್ಯಾಂಚಾ ಹಾತಿಂತ್ ದಿಂವ್ಚ್ಯಾ ಪುಡೆಂ ಕಿತ್ಲ್ಯಾ ಮಾಫಾನ್ ತುಮ್ಚ್ಯಾ ಭುರ್ಗ್ಯಾಂಕ್ ತಾಂತ್ರಿಕ್ ಮೊಬೈಲಾಂಚಿ ಗರ್ಜ್ ಆಸಾ ಮ್ಹಳ್ಳೆಂ ಆವಯ್-ಬಾಪಾಯ್ಚಿನಿಂ ಸ್ವ-ವರೊವ್ಣಿ ಕರ್ಚೆಂ ಭೋವ್ ಗರ್ಜೆಚಿ. ಘರ್ಚೆ ಕಂಪ್ಯೂಟರ್ ಸಾಲಾಂತ್ ಸರ್ವಾಂಕ್ ದಿಸ್ಚ್ಯಾಪರಿಂ ಆಸ್ಲ್ಯಾರ್ ಭೋವ್ ಬರೆಂ.ಸಾಧ್ಯ್ ತರ್ ಮೊಬೈಲಾಂಚೆ ಪರಿಶೀಲನ್ ಕರಾ.ಖಂಚೆಂ ಸರ್ವ್ ಆಫ್ಸ್ ಆಸಾ ಮ್ಹಳ್ಳೆಂ ಪಳೆಯಾ.ಎಕ್ಸುರ್‌ಪಣಾಂತ್ ಭುರ್ಗ್ಯಾಂಕ್ ವಾ ಯುವಕಾಂಕ್ ಕುಸೊಂಕ್ ಸೊಡ್ಚ್ಯಾ ಪ್ರಾಸ್ ಖಂಚಿಯ್ ಭಲಾಯ್ಕೆಭರಿತ್ ಆಭ್ಯಾಸ್ (ಸಾಹಿತ್ ರಚ್ಚೆಂ-ವಾಂಚ್ಚೆಂ,ಸಂಗೀತ್,ಆಭಿನಯ್,ಡ್ಯಾನ್ಸ್,ಇಗರ್ಜಾಚ್ಯಾ ಯುವಚಟಿಕ್ಯೊ ಆನಿಂ ಭುರ್ಗ್ಯಾ ಚಟುವಟಿಕ್ಯೊಂ) ರುತಾ ಕರ್ಚೆ ಭೋವ್ ಬರೆಂ. ತುಮ್ಚ್ಯಾ ಥಂಯ್ ವಾ ತುಮ್ಚ್ಯಾ ಭುರ್ಗ್ಯಾ ಥಂಯ್ ಹೊ ಸಮೊಸ್ಸೊ ಆಸಾ ಮ್ಹಣ್ ಭೊಗ್ತಾ ತರ್ ಮಾನಸಿಕ್ ವಯ್ಜಾಲಾಗಿಂ ವಾ ಸಮಾಲೋಚಕಾಲಾಗಿಂ (ಹ್ಯಾ ದಿಸಾನಿಂ ಜಾಯ್ತೆ ಯಾಜಕ್ ಸಮಲೋಚಕ್ ಆಸಾತ್ ವಾ ದಿಯೆಸಿಜೆ ಹಂತಾರ್ ಸಮಾಲೋಚಕ್ ಕೇಂದ್ರಾಯ್ ಘಡ್ಲ್ಯಾಂತ್) ಮೆಳೊನ್ ವಿಚಾರ್ ವಿನಿಮಯ್ ಕರಾ.ಗರ್ಜ್ ಆಸಾ ತರ್ ಮಾನಸಿಕ್ ವಯ್ಜಾನಿಂ ನಿರ್ದೇಶಿತ್ ಕೆಲ್ಲಿಂ ಚಿಕಿತ್ಸಾ ಜೊಡ್ನ್ ಘೆಂವ್ಚೆ ಭೋವ್ ಬರೆಂ.

(2015 ನವೆಂಬರ್ ಮಹಿನ್ಯಾಚಾ ’ನಮಾನ್ ಬಾಳೊಕ್ ಜೆಜು’ ಮಹಿನ್ಯಾಳ್ಯಾಂತ್ ಪ್ರಕಟಿತ್ ಜಾಲ್ಲೆಂ ಲೇಖನ್)

'ಆಶಿರ್ವಾದ್' ಥಿಯೆಟರ್ ಆನಿಂ 'ನಶಿಬಾಚೊ ಖೆಳ್' ಕೊಂಕ್ಣಿ ಫಿಲ್ಮ್

'ಆಶಿರ್ವಾದ್' ಥಿಯೆಟರವಿಶಿಂ ಹಾಂವೆ ಸಾಂಗಾಜೆಯ್‌ಚ್.ಹೆಂ ಥಿಯೆಟರ್ ಉಡುಪಿ ಶ್ಹೆರಾ ಥಾವ್ನ್ ಭಾಯ್ರ್ ಆಸ್ಚ್ಯಾ ಕಲ್ಯಾನ್ಪುರ್'ಚ್ಯಾ 'ಸಂತೆಕಟ್ಟೆ' ಮ್ಹಳ್ಳ್ಯಾಲಾಗಿಂ, ಉಡುಪಿ ಥಾವ್ನ್ ಕುಂದಾಪುರ್ ಪಾಂವ್ಚ್ಯಾ ನ್ಯಾಶನಲ್ ಹೈವೆ 66'ಚ್ಯಾ ಉಜ್ವ್ಯಾ ಬಗ್ಲೆಕ್ ಆಸಾ.ಪುಡೆಂ ಹ್ಯಾ ಥಿಯೆಟರಲಾಗಿಚ್ ಟೈಲ್ಸ್ ಕಾರ್ಖಾನೊ ಏಕ್ ಆಸ್ಲೊ.ಆತಾ ನಾ. ಆತಾ ತೊ ಕಾರ್ಖಾನೊ ಆಸ್ಚ್ಯಾ ಸುವಾತೆರ್‌ಚ್ 'ರೊಬೊಸೊಪ್ಟ್' ಮ್ಹಳ್ಳೊ ಏಕ್ ಸೊಪ್ಟ್‌ವೆರ್ ಕಂಪೆನಿ ಉಭಿ ಜಾಲಾ. ಕಲ್ಯಾನ್ಪುರ್ ಶ್ಹೆರ್ ಪಾಂವ್ಚ್ಯಾ ಪುಡೆಚ್ ಮೆಳ್ಚ್ಯಾ ಹ್ಯಾ ಬಸ್‌ಸ್ಟೋಪಾಕ್, ಥಿಯೆಟರ ಲಾಗುನ್ 'ಆಶಿರ್ವಾದ್' ಸ್ಟೋಪ್ ವಾ ಜಾಂಗ್ಶನ್ ಮ್ಹಳ್ಳೆಂ ನಾಂವ್ ಆಯ್ಲ್ಯಾ.

ಪುಡೆಂ ಹ್ಯಾ ಥಿಯೆಟರಾಂತ್ ದೈವಿಕ್(ಭಕ್ತಿಕ್) ಪ್ರಧಾನ್ ಫಿಲ್ಮಾಂ ಜಾತ್,ಮತ್ ಭೇದ್ ನಾಸ್ತಾನಾ ಪ್ರದರ್ಶಿತ್ ಜಾತೆಲಿಂ ಖಂಯ್. ಕನ್ನಡ 'ಭುವನ ಜ್ಯೋತಿ' ಫಿಲ್ಮ್ ಸಮೇತ್ ಆಮ್ಚ್ಯಾ ಗಾಂವ್ಚ್ಯಾ ತಿಶಿಲ್ಯಾ ಲೋಕಾನಿಂ ಹಾಂಗಾಸರ್ ಪಳೆಯ್ಲೆ ಮ್ಹಣುನ್ ತಾಣಿ ಸಾಂಗ್ತಾನಾ ಹಾಂವೆ ಆಯ್ಕಾಲ್ಲೊ ಉಡಾಸ್.ಪುಣ್ ಹಾಂವೆ ಹ್ಯಾ ಥಿಯೆಟರಕ್ ಪಳೆಯ್ಲೆ ಕಲ್ಯಾನ್ಪುರ್ ಮಿಲಾರ್ ಹೈಸ್ಕೂಲಾಕ್ ವೆತಾನಾ. ಆಮ್ಚ್ಯಾ ಕೊಳಲ್‌ಗಿರಿಕ್ ಪಾಂವ್ಚೆ ಬಸ್ಸ್ ಕಲ್ಯಾನ್ಪುರ್ ಜಾಂಗ್ಶನಾಕ್ ಪಾವ್ತೆಚ್ ಗಡ್ದೆನ್ ಭರ್ತಾ,ಆನಿ ಆಮ್ಕಾಂ ಬಸ್ಸಾಕ್ ಚಡುಂಕ್ ಜಾಯ್ನಾ ಮ್ಹಳ್ಳ್ಯಾ ಕಾರಣಾ ನಿಮ್ತಿಂ ಆಮಿಂ ಏಕ್ ಸ್ಟಾಪ್ ಪಯ್ಲೆಚ್ ಮೆಳ್ಚ್ಯಾ ಹ್ಯಾ ಆಶಿರ್ವಾದ್ ಸ್ಟೋಪಾಲಾಗಿಂ ಯೇವ್ನ್ ಬಸ್ಸ್ ಧರ್ತೆಲ್ಯಾಂವ್.ಪುಣ್ ಹಾಂವೆ ಮ್ಹಜ್ಯಾ ಹೈಸ್ಕೂಲಾಚ್ಯಾ ದಿಸಾನಿಂ ಆನಿಂ ಆತಾಂ ಪಳೆವ್ಚ್ಯಾ ಆಶಿರ್ವಾದ್ ಥಿಯೆಟರ್ ಮೊಸ್ತು ಫರಕ್ ಆಸಾ.

ಎಕಾ ಕಾಳಾರ್ ಭಕ್ತಿಕ್ ಪ್ರಧಾನ್ ಫಿಲ್ಮಾಂ'ಚ್ ದಾಕೊವ್ಚ್ಯಾಂ ಆಶಿರ್ವಾದ್ ಥಿಯೆಟರಕ್ ಕೊಣಾಚೆ ಗ್ರಹಣ್ ಲಾಗ್ಲೆಯ್ ಕೊಣ್ ಜಾಣಾಂ? ಹಾಂವ್ ಹೈಸ್ಕೂಲಾಕ್ ವೆತಾನಾ ಮಾತ್ರ್ ಹ್ಯಾ ಥಿಯೆಟರಾ'ತ್ ಭಕ್ತಿಕ್ ಪ್ರಧಾನ್ ಪಿಂತುರಾಂಚ್ಯಾ ಜಾಗ್ಯಾರ್ ಆಶ್ಲೀಲ್ ಫಿಲ್ಮಾಂ ಪ್ರದರ್ಶಿತ್ ಜಾವ್ನ್ ಆಸ್ತೆಲಿಂ,ತೆಂಯ್ ನಾಂವ್ ಆಯ್ಕೊಂಕ್ ನಾತ್ಲಿಂ ಆನಿಂ ಖಂಚ್ಯಾ-ಖಂಚ್ಯಾ ಭಾಷೆಚಿ.ಮ್ಹಜೆ ಹೈಸ್ಕೂಲ್ ಶಿಕಪ್,ಉಪ್ರಾಂತ್ ಪಿಯುಸಿ-ಕಾಲೇಜ್ ನಂತರ್ ಕಾಮಾಕ್ ಲಾಗ್ಚ್ಯಾ ಮ್ಹಣಾಸರ್ ಆಸ್ಲ್ಯಾಚ್ ಫಿಲ್ಮಾಂಚಿ ಸ್ಪೊಸ್ಟರಾಂ ಥಂಯ್ಸರ್ ಚಿಡ್ಕೊನ್ ಆಸ್ತೆಲಿಂ ತಿಂ ನದ್ರೆಕ್ ಪಡ್ತೆಲಿಂ.ಆನಿ ಹಾಚೊ ಪ್ರಭಾವ್ ಇತ್ಲೊ ಆಸ್ಲೊಗಿ ಕೊಣಾಕಿಯ್ 'ಆಶಿರ್ವಾದ್' ಮ್ಹಳ್ಯಾ ತ್ಯಾ ಜಾಗ್ಯಾರ್ ಬಸ್ಸಾ ಥಾವ್ನ್ ದೆಂವೊಂಕ್ ಆಸಾ ತಾಂಕಾಂ ಥಂಯ್ಸರ್'ಚಿ ಟಿಕೆಟಿಯ್ ಕಾಡುಂಕಿಯ್ ಲಜೆತಾಲಿಂ.ಕೊಣಿಯ್ ವೊಳ್ಕಿಚೊ ಥಂಯ್ಸರ್ ದೆಂವುನ್ ಹೆರ್ ಸುವಾತೆಕ್ ಚಲ್ಲ್ಯಾರಿಯ್  "ತೂಲೆ ತೂಲೆ ಆಯೆ 'ಆಶಿರ್ವಾದ್'ಥಿಯೆಟರ್‌ಗ್ ಪೊಯೆ" ಮ್ಹಣುನ್ ಕಮೆಂಟ್ ಕರ್ತೆಲೆಂ.ತಸ್‌ಲೊ ನಾಲೀಸಾಯೆಚೊ ಬಿಲ್ಲೊ ಆಶಿರ್ವಾದ್ ಥಿಯೆಟರಕ್ ಲಾಗುನ್ ಆಸ್ಲೊ.

ಪುಣ್‌ ಆತಾಂ? ವ್ಹಯ್ ಸಗ್ಳೆಂ ಬದಲ್ಲಾ. ಕಾಳ್ ಏಕ್‌ಚ್ ಲೇಕ್ ಆಸಾನಾ ಮ್ಹಣ್ಚ್ಯಾಕ್ 'ಆಶಿರ್ವಾದ್' ಥಿಯೆಟರ್ ಏಕ್ ದಾಕ್ಲೊ. ಥಂಯ್ಸರ್ ಉಭಿಂ ಜಾಲ್ಲಿಂ 'ರೋಬೊಸೊಪ್ಟ್'ಕಂಪೆನಿ ಆನಿ ಆಶಿರ್ವಾದ್ ಥಿಯೆಟರಕ್ ಕಸ್ಲೊ ಸಂಬಂಧ್ ಕಳಿತ್ ನಾ. ಕೆದಳಾ 'ರೋಬೊಸೊಪ್ಟ್' ಉಭೆಂ ಜಾಂವ್ಕ್ ಸುರು ಜಾಲೆಂಗಿ ತವಳ್ ಥಾವ್ನ್ 'ಆಶಿರ್ವಾದ್' ಥಿಯೆಟರಕ್ ಲಾಗ್ಲೆಂ ಗ್ರಹಣ್ ಸುಟೊಂಕ್ ಲಾಗ್ಲೆಂ.ಮ್ಯಾನೆಜ್‌ಮೆಂಟ್ ವಾ ಗುರ್ಕಾರ್‌ಪಣ್ ಬದಾಲ್ಲೆಗಿ? ವಾ ನಾ? ತೆಂ ಖಳಿತ್ ನಾ.ಪುಣ್ ಆಶಿರ್ವಾದ್ ಥಿಯೆಟರಚೆ ಸ್ಟ್ರಾಕ್ಚರ್ ಬದಲ್ಲೆಂ.ನವ್ಯಾನ್ 'ಆಶಿರ್ವಾದ್' ಥಿಯೆಟರ್ ಪುರ್ನರಚಿತ್ ಜಾಲೆಂ.ಆತಾಂ ಪಾಟ್ಲ್ಯಾ ಸಾತಾಟ್ ವರ್ಸಾ ಥಾವ್ನ್ ಹಾಂಗಾಸರ್ ಪ್ರದರ್ಶಿತ್ ಜಾಂವ್ಚಿ ಫಿಲ್ಮಾಂ ನಾಮ್ಣೆಚ್ಯಾ ಫಿಲ್ಮಿಂ ಕಲಾಕರಾಂಚಿ.ತೆಯ್ ರಿಲೀಸ್ ಜಾತಾನಾ ಆವಾಜ್ ಕರ್ನ್ ರಿಲೀಜ್ ಜಾಂವ್ಚಿ ನವಿಂ ಫಿಲ್ಮಾಂ.ಸಲ್ಮಾನ್,ಶಾರೂಕ್,ಆಮಿರ್ ಖಾನ್,ಆಕ್ಷಯ್,ರಜನಿಕಾಂತ್ ತಸ್ಲ್ಯಾ ಫಿಲ್ಮ್ ಕಲಾಕರಾಂಚಿ ಫಿಲ್ಮಾಂ ಉಡುಪಿ'ತ್ ಪಯ್ಲೆ ಪ್ರದರ್ಶಿತ್ ಜಾಂವ್ಚಿಚ್ ಹ್ಯಾ ಆಶಿರ್ವಾದ್ ಥಿಯೆಟರಾಂತ್.ಉಡುಪಿಚ್ಯಾ ಸುತ್ತೂರ್ಚೊ ಲೋಕ್ ಸೊಡ್ಯಾಂ,ಆಜ್-ಕಾಲ್ ಹಾಂಗಾಸರ್ ಮೂಲ್ಕಿಂ,ಹಳೆಯಂಗಡಿಚೊ ಲೋಕಿಯ್ ಫಿಲ್ಮಾಕ್ ಸಾಕ್ಸ್ ಜಾಂವ್ಕ್ ಯೆತಾ.ದೆಕುನ್ ಹ್ಯಾ ದಿಸಾನಿಂ 'ಆಶಿರ್ವಾದ್' ಥಿಯೆಟರ್ ಉಡುಪಿಚೆ ಉಂಚ್ಲೆ ಥಿಯೆಟರ್ ಮ್ಹಳ್ಯಾರಿಯ್ ಚೂಕ್ ಜಾಂವ್ಚಿ ನಾ.ಎಕಾ ಕಾಳಾರ್ ನಾಲೀಸಾಯೆಚೆ ಥಿಯೆಟರ್ ಜಾವ್ನ್ ಆಸ್ಲೆಂ ಹ್ಯೆಂ ಥಿಯೆಟರ್ ಆತಾಂ ಉಡುಪಿಚೆ ಆಭಿಮಾನಾಚೆ ಥಿಯೆಟರ್.ಆತಾಂ "ಆಶಿರ್ವಾದ್ ಥಿಯೆಟರ್‌ಡ್ ವೊವ್ ಫಿಲ್ಮ್?" ಮ್ಹಣುನ್ ಉಡುಪಿಚ್ಯಾ ಖಂಚ್ಯಾಯ್ ಫಿಲ್ಮ್ ರಸಿಕಾನಿಂ ಆಜ್-ಕಾಲ್ ವಿಚಾರ್ಚೆ ಸಾಮಾನ್ಯ್ ಸವಾಲ್.ತಿತ್ಲೆಂ ಆಜ್ 'ಆಶಿರ್ವಾದ್' ಥಿಯೆಟರ್ ಲೋಕಾಮೊಗಾಳ್.

****

ಆನಿಂ ಥೊಡ್ಯಾಚ್ (ಆಗಸ್ಟ್ 19 ಥಾವ್ನ್) ದಿಸಾನಿಂ ಹ್ಯಾಚ್ ಥಿಯೆಟರಾಂತ್ ಕೊಂಕ್ಣೆಚೆ ಫಿಲ್ಮ್ ಪ್ರದರ್ಶಿತ್ ಜಾಂವ್ಚ್ಯಾರ್ ಆಸಾ.ಮ್ಹಜೊ ಉಡಾಸ್ ಸಾರ್ಕೊ ತರ್ ಪಾಟ್ಲ್ಯಾ ಸಾತಾಟ್ ವರ್ಸಾನಿಂ ಚಡ್ ಆನಿ ಚಡ್ ತುಳು ಫಿಲ್ಮಾಂ ಉಜ್ವಾಡಾಕ್ ಆಯ್ಲ್ಯಾರಿಯ್ 'ಆಶಿರ್ವಾದ್' ಥಿಯೆಟರ್ ಪ್ರದರ್ಶಿತ್ ಜಾಲ್ಲಿಂ ಏಕ್ ವಾ ದೋನ್ ಮಾತ್ರ್.ಪುಣ್ ಸಭಾರ್ ವರ್ಸಾಂ ಉಪ್ರಾಂತ್ ಕರ್ನಾಟಕ್ ಕರಾವಳೆ ಮೂಳ್ ಥಾವ್ನ್ (ಉಡುಪಿ, ಮಂಗ್ಳುರ್ ಆನಿ ಕಾರವಾರ್)ಉಜ್ವಾಡಾಕ್ ಯೆಂವ್ಚೆ ಕೊಂಕ್ಣಿ ಫಿಲ್ಮ್ 'ನಶಿಬಾಚೊ ಖೆಳ್' ಉಡುಪಿಂತ್ 'ಆಶಿರ್ವಾದ್' ಥಿಯೆಟರಾಂತ್ ಪ್ರದರ್ಶಿತ್ ಜಾತಾ ಮ್ಹಣ್ತಾನಾ ನಿಜಾಯ್ಕಿ ಫಿಲ್ಮ್ ರಚ್ಪ್ಯಾ ಸಾಂಗಾತಾ ಕೊಂಕ್ಣಿ ಲೋಕಾಂಕಿಯ್ ಏಕ್ ಆಭಿಮಾನಾಚಿ ಖಬರ್‌ಚ್ ಸಯ್.

-ಮೆಲ್ವಿನ್ ಕೊಳಲ್‌ಗಿರಿ

ಎರಡು ಕಿರು ಕಥೆಗಳು

ತಾಯಿ ಗುಬ್ಬಿ ಮತ್ತು ಮರಿ ಗುಬ್ಬಿ

ಮನೆಯ ಮುಂದಿನ ಹಲಸಿನ ಮರದ ಮೇಲೆ ಕುಳಿತು ಏನೊ ಯೋಚಿಸುತ್ತಿದ್ದ ತಾಯಿ ಗುಬ್ಬಿಯ ಬಳಿ ಎಲ್ಲಿಂದಲೊ ಹಾರಿ ಬಂದ ಮರಿ ಗುಬ್ಬಿಯೊಂದು ಬಂದು ಹೀಗೆ ಹೇಳಿತು;
"ಆಮ್ಮ ಆಮ್ಮ"
"ಏನು ಮಗು?"
"ಅಲ್ಲಿ ಏನೋ ತುಂಬಾ ಗಿಡಗಳನ್ನು ನೇಡುತ್ತಿದ್ದರೆ ಆಮ್ಮ.ತುಂಬಾ ಜನ ಸೇರಿದ್ದಾರೆ.ಭಾಷಣ ಬೇರೆ ಮಾಡ್ತಿದ್ದರೆ.ಇನ್ನೇನು ಗಿಡಗಳು ಬೆಳೆದು ಮರಗಳಾಗುತ್ತವೆ.ನಾವಿನ್ನೂ ಆ ಹೊಸ ಮರಗಳಿಗೆ ಶಿಫ್ಟ್ ಆಗೋಣ ಆಮ್ಮ"

ಮರಿಗುಬ್ಬಿಯ ಹುಮ್ಮಸ್ಸು ಕಂಡು ತಾಯಿ ಗುಬ್ಬಿ ಹೇಳಿತು; "ಆಯ್ಯೊ ಮಗನೇ,ಹೆಚ್ಚು ಹಾರಾಡಬೇಡ.ನಮ್ಮ ಆಜ್ಜನ ಕಾಲದಿಂದಲೂ ಆವರು ಹೀಗೆಯೆ ಮಾಡುತ್ತಿದ್ದಾರೆ.ಆದೇನೊ ವನಮಹೋತ್ಸವ ಆಂತೆ.ವರ್ಷ ವರ್ಷ ಜನ ಸೇರುತ್ತಾರೆ,ಗಿಡಗಳನ್ನು ನೇಡುತ್ತಾರೆ.ಆದರೆ ಒಂದೂ ಗಿಡ ಮರವಾದದ್ದನ್ನು ನನ್ನ ಆಜ್ಜನು ನೋಡಿಲ್ಲ.ನಾನು ಕಂಡಿಲ್ಲ"

ಸಾಮೂಹಿಕ ವ್ಯವಸಾಯ

ಸಂಘಟನೆಯ ಆಧ್ಯಕ್ಷನೊಬ್ಬನು ಒಂದು ಪತ್ರಿಕೆಯ ಸಂಪದಾಕರ ಬಳಿ ಬಂದು ಹೀಗೆ ಹೇಳುತ್ತಾನೆ;
"ಸರ್ ನಾವು ನಮ್ಮ ಸಂಘಟನೆಯ ಮುಖಾಂತರ ನಮ್ಮೂರಿನಲ್ಲಿ ಈ ಬಾರಿ ಸಾಮೂಹಿಕ ವ್ಯವಸಾಯವನ್ನು ಹಮ್ಮಿಕೊಂಡಿದ್ದೆವು.ದಯವಿಟ್ಟು ಆ ಕಾರ್ಯಕ್ರಮದ ಪೋಟೊ ಹಾಗೂ ವರದಿಯನ್ನು ತಮ್ಮ ಪತ್ರಿಕೆಯಲ್ಲಿ ಪ್ರಕಟಿಸ ಬೇಕಾಗಿ ನಮ್ಮ ಕೋರಿಕೆ"
"ಸಾಮೂಹಿಕ ವ್ಯವಸಾಯ? ಆದರಲ್ಲಿ ಏನು ವಿಶೇಷ?" ಆಧ್ಯಕ್ಷನ ಮಾತನ್ನು ಆಲಿಸಿದ ಸಂಪಾದಕರ ಪ್ರಶ್ನೆ.
"ಇಲ್ಲಾ ಸರ್,ಈವರೆಗೆ ಯಾರೂ ಮಾಡದಿದ್ದ ಕಾರ್ಯಕ್ರಮವನ್ನು ನಾವು ಹಮ್ಮಿಕೊಂಡಿದ್ದೇವೆ ಸರ್.ಇದು ವಿಶೇಷ ಕಾರ್ಯಕ್ರಮ"
ಸಂಪಾದಕರು ಆಧ್ಯಕ್ಷರಿಗೆ ಸಮಜಾಯಿಸಿ "ಇಲ್ಲಾ ಸರ್, ನೀವು ತಪ್ಪು ತೀಳಿದುಕೊಂಡಿದ್ದಿರಿ.ನಿಮಗೆ ತಿಳಿದಿಲ್ಲ.ನಮ್ಮೂರಿನ ಐತ್ತಪ್ಪಣ್ಣ ಸುಮಾರು ಇಪ್ಪತ್ತು-ಮೂವತ್ತು ವರ್ಷಗಳಿಂದ ವ್ಯವಸಾಯ ಮಾಡುತ್ತಿದ್ದರೆ.ಅದೂ ಆವರು ಏಕಾಂಗಿಯಾಗಿಯೆ"

-ಮೆಲ್ವಿನ್ ಕೊಳಲಗಿರಿ

ಪಪ್ಪನ್ ಲಿಕ್ಲೆಲಿ ಏಕ್ ಪರ್ನಿ ಕಾಣಿ

ಹಾಂವ್ ಆನಿ ತೆಂ

                                                  

                                                                    -ಮಾವ್ರಿಸ್ ಮಸ್ಕರೇನ್ಹಸ್,ಕೊಳಲ್‌ಗಿರಿ 
                                                                                  (ಮಾಮಾ ಕೊಳಲ್‌ಗಿರಿ )

ಹಾಂವ್! ವ್ಹಯ್,ಹಾಂವ್ ಮ್ಹಳ್ಯಾರ್ ಹಿ ಕಥಾ ಸಾಂಗ್ತಾಲೊ ಕಾಣಿಯೆಚೊ ನಾಯಕ್.ಎಕಾ ಖಾಸ್ಗಿ ಬೆಂಕಾಂತ್ ಹಾಂವ್ ಕಾಮ್ ಕರ್ತಾಂ.ಆನಿ ತೆಂ!ಮ್ಹಳ್ಯಾರ್ ಹಾಂವೆಂ ಮೋಗ್ ಕೆಲ್ಲಿ ಚಲಿ ಲೀನಾ.’ತೆಂ’ಮ್ಹಣ್ಚ್ಯಾಕಿಯ್ ’ತಿ’ ಮ್ಹಣ್ಚೆಂಚ್ ಮ್ಹಾಕಾ ಪಸಂಧ್ ಜಾತಾ ಆನಿಂ ತೃಪ್ತಿ ದಿತಾ.ಕಿತ್ಯಾಕ್,ತಿ ಏಕ್ ಶಿಕ್ಷಕಿ ವ ಟೀಚರ್ ಜಾಲ್ಯಾ ಆತಾಂ.ಫಿರ್ಗಜೆಚ್ಯಾ ಇಸ್ಕೊಲಾಂತ್ ಕಾಮ್ ಕರ್ತಾ.ಹಾಂವ್ ಏಕ್ ಸಾದೊ ಕ್ಲಾರ್ಕ್ ಗುಮಾಸ್ತ್ ಆನಿಂ ತೆಂ ಟೀಚರ್.

*****

ಹಾಂವ್ ಉಡ್ಪಿಂತ್ ಕೊಲೆಜ್ ಶಿಕ್ಚೊ ತೊ ವೇಳ್ ಆನಿ ತೆಂ ಉಡ್ಪಿಂತ್ ಆಸ್ಚ್ಯಾ ಮಾದ್ರಿಚ್ಯಾ ಟೀಚರ್ಸ್ ಟ್ರೈನಿಂಗ್ ಸ್ಕೂಲಾಂತ್ ತರ್ಭೆತಿ ಜೊಡ್ತಾಲೆಂ.ಹಾಂವ್ ಸದಾಂಯ್ ಘರಾ ವೆತಾಲೊ.ತೆಂ ಥಂಯ್ಚ್ ರಾವ್ತಾಲೆಂ.ಹಪ್ತ್ಯಾಕ್ ಏಕ್’ಗಿ ದೋನ್ ಪಾವ್ಟಿ ಹಾಂವ್ ತಾಕಾ ಮೆಳುಂಕ್ ವೆತಾಲೊಂ.ಆಮಿ ಎಕಾಚ್ ಫಿರ್ಗಜೆಚಿ ಜಾಲ್ಲ್ಯಾ ವರ್ವಿ ಉಲಂವ್ಕ್ ಸಂದ್ರಾಪ್ ಆಮ್ಕಾಂ ಮೆಳ್ತಾಲೊ.ನಾ ಜಾಲ್ಯಾರ್ ಹ್ಯೊ ಮಾದ್ರಿ ಖಂಯ್ ಉಲಂವ್ಕ್ ಸೊಡ್ತಿತ್? ಆಮ್ಚಿ ಹಿಂ ಮಿಲಾಕತ್ ಮೊಗಾಂತ್ ಪರಿವರ್ತನ್ ಜಾಲ್ಲಿ ಹಾಂವ್ ನೆಣಾಂಚ್ ಜಾಲ್ಲೊಂ.ಖಂಚಾಯ್ ಚಲಿಯಾಂಚ್ಯಾ ಆಕರ್ಷಣೆಕ್ ಬಲಿ ಜಾಯ್ನಾ’ಸ್ಲೊ ಹಾಂವ್ ಲೀನಾಚ್ಯಾ ಮೋಗಾರ್ ಪಡ್ಲೊ.

ಲೀನಾ ಥಂಯ್ ಚಡಾವತ್ ಚಲಿಯಾಂ ಥಂಯ್ ಅಸ್ಚೆಂ ಆವ್ಗುಣ್ ನಾತ್ಲೆಂ.ಫೇಶನಾಂ,ಆಟ್ ನೇಟ್ ತೆಂ ಕರಿನಾತ್ಲೆಂ.ಅಪುಣ್ ಸೊಭಿತ್ ಮ್ಹಣ್ಚೊ ರುಭಾವ್ ತಾಕಾ ನಾಸ್’ಲ್ಲೊ.ನಾಜೂಕ್ ಗೊರ್ಶಿ ಕೂಡ್ ತಾಚಿ,ಲಾಂಭಾಯೆ ತೆಕಿದ್ ಮೊಟಾಯ್,ಪೆಂಕಾಟ್ ಮ್ಹಣಾಸರ್ ದೆಂವೊನ್ ಆಯಿಲ್ಲ್ಯಾ ಕಾಳ್ಶ್ಯಾ ಕೆಸಾಂಚಿ ಪಾಂತಿ,ಪುಸುನ್ ದವರ್ಲ್ಯಾಬರಿ ಆಸ್ಲೊ ತೊ ನಾಕ್,ಕಾಳ್ಶೆಚ್ ದೊಳೆಂ,ಗುಲೊಬಿ ರಂಗಾಚೆ ಪುಡ್ಪುಡಿತ್ ಗಾಲ್ ಆನಿ ತಾಂಬ್ಶೆ ವೊಂಟ್ ಮ್ಹಾಕಾ ಪಿಶ್ಯಾರ್ ಗಾಲುಂಕ್ ಪಾವುಲ್ಲೆಂ.ಹಾಂವ್ ತಾಕಾ ಸಗ್ಳೊಚ್ ಭುಲ್’ಲ್ಲೊಂ.

ಮ್ಹಜೆ ಫೈನಲ್ ಬಿ.ಕೊಮ್ ಜಾತಚ್ ಹಾಂವ್ ಕೊಲೆಜಿ ಥಾವ್ನ್ ಭಾಯ್ರ್ ಆಯಿಲ್ಲೊ.ಆನಿ ತಾಣೆ ತಾಚೆ ಟ್ರೈನಿಂಗ್ ಸಂಪಯ್ಲೆ.ತೆದಳಾ ಮ್ಹಾಕಾ 22 ವರ್ಸಾಚಿ ಪ್ರಾಯ್.ತಾಕಾ 18 ವರ್ಸಾಂ.ತಾಚೊ ಬಾಪುಯ್ ಬೊಂಬಯ್’ತ್ ಲ್ಹಾನ್ ಕಾಮಾರ್ ಆಸ್ಲೊ.ಸಾಧರಣ್ ಜೊಡ್ತಾಲೊ.

ಆಮ್ಚ್ಯಾ ಶಿಕ್ಪಾಚ್ಯಾ ವೇಳಾರ್ ಆಮ್ಕಾಂ ವೇಳ್ ಎಕೊಡ್ಯಾನ್ ಖರ್ಚುಂಕ್ ಸಂದ್ರಾಪ್ ಮೆಳೊಂಕ್ ನಾ.ತರಿಯ್ ಆಮಿ ಎಕಾಮೆಕಾ ಏಕ್ ಘಡಿ ತರಿಯ್ ಭೆಟ್ತಾಲ್ಯಾಂವ್.ಮತಿಂತ್ಲಿ ಭೊಗ್ಣಾಂ ದೊಳ್ಯಾಂ ಮಾರಿಫಾತ್ ಆಮಿ ಉಲಯ್ತೆಲ್ಯಾಂವ್.ಆಮ್ಚ್ಯಾ ವೊಂಟಾಂನಿ ಹಳ್ತಾಚೊ ಹಾಸೊ ಉದೆವ್ನ್ ಮಾಯಾಗ್ ಜಾತೆಲ್ಯೊ.

ಟ್ರೈನಿಂಗ್ ಸ್ಕೂಲಾ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ತಾಕಾ ಕುಟ್ಮಾಚ್ಯಾ ವೊಜ್ಯಾಕ್ ಖಾಂದ್ ದಿಂವ್ಕ್ ಆಸ್ಲೊ.ತ್ಯಾ ದೆಕುನ್ ಕಾಮಾಚ್ಯಾ ಬೊಂಟೆಕ್ ಲಾಗ್ಲೆಂ.ತವಳ್ ಚ್ ಆಮ್ಚ್ಯಾಚ್ ಫಿರ್ಗಜೆಚ್ಯಾ ಇಸ್ಕೊಲಾಂತ್ ಏಕ್ ವೆಕೆನ್ಸಿ ಉದೆಲಿ.ತೆಂ ಕಾಮ್ ತಾಕಾಚ್ ಜಾಲೆಂ.

ಪುಣ್ ಹಾಂವ್ ಶಿಕಪ್ ಸೊಂಪವ್ನ್ ಭಾಯ್ರ್ ಯೆತಾನಾ ಬೆಕಾರ್’ಪಣಾಚೊ ಸಮಸ್ಸೊ ರಾಕೊನ್ ಆಸ್ಲೊ.ತಾಚ್ಯಾ ದವ್ಲತ್ಯಾನ್ ಹಾಂವ್ ಸಗ್ಳೊಚ್ ಚಿರ್ಡಾಲೊ ಆನಿಂ ವ್ಹಳ್ವಳ್ಳೊಂ.ಮ್ಹಜ್ಯಾ ಮಾಂಯ್-ಪಾಯ್’ಕ್ ಹಾಂವ್ ಮಾಲ್ಗಡೊ ಜಾಲ್ಲ್ಯಾ ವರ್ವಿ ಕುಟಾಮ್ ಮ್ಹಳ್ಯಾ ಜೊತಾಚೆ ಜೂಂ’ವ್ ಹಾಂವೆ ಖಾಂದಾರ್ ಘೆಂವ್ಕ್ ಆಸ್ಲೆಂ.ಕೊಲೇಜಿ ಥಾವ್ನ್ ಭಾಯ್ರ್ ಯೆತಾನಾ ಹಾಂವ್ ನೆಣಾಂ’ಸ್ಲೊ ಪರಿಸ್ಥಿತಿ ಇತ್ಲಿ ಭೀಕರ್ ರಾವ್ಲ್ಯಾ ಮ್ಹಣುನ್.ವಶಾಲಿ ಆಸ್ಲ್ಯಾಂಕ್,ದುಡು ಆಸ್ಲ್ಯಾಂಕ್ ಕಾಮಾಂ ಲಾಭ್ತಾಲಿಂ.ದುರ್ಬಳೊ ಮ್ಹಳ್ಯಾಂಚೆರ್ ದೊಳೆಂ ಉಗ್ಡುನ್ ಕೊಣ್’ಚ್ ಪಳೆನಾತ್ಲೆಂ.ನಿರುದ್ಯೋಗ್ ಸಮಸ್ಯಾಂತ್ ಹಾಂವ್ ಏಕ್ ವರ್ಸ್ ಭರ್ ವ್ಹಳ್ವಳ್ಳೊಂ ಆನಿಂ ಕಳ್ವಳ್ಳೊಂ.

ಮುಕ್ಲಿ ವಾಟ್ ಮ್ಹಾಕಾ ದಿಸುಂಕ್ ನಾ.ಎಕಾ ವಾಟೆನ್ ಕುಟ್ಮಾಚೆ ವೊಜೆಂ ಮ್ಹಾಕಾ ದೊಸ್ತಾಲೆಂ.ದುಸ್ರ್ಯಾ ವಾಟೆನ್ ಹಾಂವೆಂ ಮೋಗ್ ಕೆಲ್ಲೆಂ ಲೀನಾ ಕಾಮಾರ್ ಆನಿಂ ಹಾಂವ್ ಬೇಕಾರ್ ಮ್ಹಣ್ಚೆಂ ಉಣೆಂಪಣ್.ಲೀನಾಕ್ ಆತಾಂ 19 ವರ್ಸಾಂ ಭರುಲ್ಲಿ ಆನಿ ಮ್ಹಾಕಾ 23.ಏಕ್ ದೋನ್ ವರ್ಸಾನಿಂ ತಾಚೆಂ ಕಾಜಾರ್ ಆಸ್ತೆಲೆಂ.ತೆದಾಳಾ ತಾಚಿ ಮಾಂಯ್-ಪಾಯ್ ಮ್ಹಜ್ಯಾ ತಸ್ಲ್ಯಾ ಬೇಕಾರಿ ತರ್ನ್ಯಾಟ್ಯಾಕ್ ತಾಕಾ ದಿತಿತ್’ಗಿ? ಮ್ಹಳ್ಳೆಂ ಸವಾಲ್ ಮ್ಹಜಿ ತಕ್ಲಿ ತವಳ್-ತವಳ್ ಕಾಂತಾಯ್ತಾಲೆಂ.ನಾ ಕೊಣ್’ಚ್ ವ್ಹಡಿಲಾಂ ಎಕಾ ಬೇಕಾರಿ ತರ್ನ್ಯಾಟ್ಯಾಕ್ ಆಪ್ಲ್ಯಾ ಧುವೆಕ್ ಲಗೀನ್ ಕರ್ನ್ ದಿಂವ್ಚಿ ನಾಂತ್ ಆನಿಂ ಲೀನಾ ಜಾಲ್ಯಾರಿಯ್ ಖಂಚಾ ಭದ್ರತೆಚೆರ್ ಮ್ಹಜೆಲಾಗಿಂ ಕಾಜಾರ್ ಜಾಯ್ತ್? ಆನಿಂ ಹಾಂವ್ ಏಕ್ಲೊ ಬೇಕಾರಿ,ಕಾಜಾರಿ ಜಿವಿತ್ ಸಾರುಂಕ್ ಫಾವೊ ಗಿ? ತರಿಯ್ ಲೀನಾಚೆರ್ ಮ್ಹಾಕಾ ಖೂಬ್ ಭರ್ವಸೊ ತೆಂ ಮ್ಹಾಕಾ ರಾಕ್ತಾಲೆಂ ಮ್ಹಣುನ್.

ಬೊಂಬಯ್ ವೆತಾ,ಥಂಯ್ ಕಾಮ್ ಸೊಧ್ತಾ ಮ್ಹಳ್ಯಾರ್ ಥಂಯ್ ವೊಳ್ಕೆಚೆ ವ್ಹಡ್ಲೆಂ ಮಾಂಡೆ ಝಳ್ಕಲೆಂ ನಾಂತ್.ಲ್ಹಾನ್-ಲ್ಹಾನ್ ಕಾಮಾರ್ ಆಸ್ಲೆಂ ಮ್ಹಜೆ ಸಯ್ರೆಂ ಮ್ಹಾಕಾ ಫಾವೊ ಜಾಲ್ಲೆಂ ಕಾಮ್ ಸೊಧುನ್ ದಿತಿತ್’ಗಿ? ತೆಂ ತಾಂಕಾಂ ಸಾಧ್ಯ್ ನಾತ್ಲೆಂ.ಬೆಂಗ್ಳುರ್ ತೆವ್ಶಿನ್ ಯಾ ಮ್ಹಳ್ಯಾರ್ ಥಂಯ್ಸರ್ ಆಮ್ಚೆಂ ಕ್ರಿಸ್ತಾಂವ್ ಮ್ಹನ್ಶ್ಯಾಂ ಆಸಾತ್’ಗಿ ಮ್ಹಳ್ಳೊ ದುಬಾವ್ ಉದೆಲೊ.ಕ್ರಿಸ್ತಾನ್ ಸಾಂಗ್ಲ್ಯಾ "ಬಡಯ್,ಉಗ್ತೆಂ ಜಾತೆಲೆಂ ಆನಿಂ ಸೊಧ್ ತುಕಾ ಮೆಳ್ತೆಲೆಂ"ಉತ್ರಾಂಚೊ ಉಡಾಸ್ ಆಯಿಲೊ ತರಿಯ್ ಮ್ಹಾಕಾ ಮಾತ್ರ್ ಕಿತೆಚ್ ಉಗ್ತೆಂ ಜಾಲೆಂ ನಾ ಆನಿಂ ಮೆಳ್ಳೆಂ’ಯ್ ನಾ.ಬೆಕಾರ್ಪಣಾಚೊ ಸಮಸ್ಸೊ ಉಬ್ಜೊನ್ ಲಾಗಿಂ-ಲಾಗಿಂ ದೇಡ್ ವರಸ್ ಜಾವ್ನ್ ಗೆಲೆಂ.

ಮ್ಹಾಕಾ ಲೀನಾಚೆರ್ ಆಸ್ಲೊ ಮೋಗ್’ಚ್ ಕಾಮಾಚ್ಯಾ ಸೊದ್ನೆಕ್ ಪ್ರೋತ್ಸಾಹ್ ದಿಂವ್ಕ್ ಲಾಗ್ಲೊ.ಎಕಾದಾವೆಳಾರ್ ಲೀನಾ ಮ್ಹಜ್ಯಾ ಜಿಣಿಯೆಂತ್ ನಾತ್’ಲೆಂ ತರ್ ಹ್ಯಾ ಪಾಂಯ್ ಧರ್ಚ್ಯಾ ವ್ಯಾಪ್ತೆಕ್ ಹಾಂವ್ ಕೆದಿಂಚ್ ಬಾಗ್ವಾತೊ ನಾ.ಹ್ಯಾ ಖೊಟ್ಯಾ ಸಮಾಜೆಕ್ ಖೊಟ್ ಮಾರುನ್ ಖಂಯ್ ಪುಣಿ ದೇಶಾಂತರ್ ವ್ಹೆತೊ ವ ಮ್ಹಜ್ಯಾ ವ್ಹಡಿಲಾನಿಂ ಕರ್ನ್ ಗಾಲ್ಲ್ಯಾ ಗಾದ್ಯಾನಿಂ ಮ್ಹಜ್ಯಾ ಬಳ್ವಂತ್ ಭುಜಾಜೆರ್ ತ್ರಾಣ್ ಆಸ್ತಾ ಪರ್ಯಾಂತ್ ಘೊಳ್ತೊಂ ಆಸ್ಲೊ.ಪುಣ್ ಹಾಂವ್ ಏಕ್ ಸ್ವತಂತ್ರ್ ಜಿಣಿ ಜಿಯೆಂವ್ಕ್ ಆಶೆತಾಲೊ.ಲೀನಾ ಮ್ಹಾಕಾ ಕಾಮಾಚ್ಯಾ ಸೊಧ್ನೆಕ್ ವ್ಹಸುಂಕ್ ಉತ್ತೇಜನ್ ದಿತಾಲೆಂ.ಉತ್ರಾನಿಂ ಮಾತ್ರ್ ನ್ಹಯ್ ಪಯ್ಶ್ಯಾನಿಂ ಸಮೇತ್ ಉಪ್ಕಾರ್ ಕರ್ತಾಲೆಂ.ಕೊಣ್ ತರಿಯ್ ಚಲಿ ತಶೆಂ ಅಪ್ಲ್ಯಾ ಪ್ರೇಮಿಕ್ ಪಯ್ಶ್ಯಾನಿಂ ಕುಮೊಕ್ ಕರಿತ್? ಆತಾಂಚ್ಯೊ ಚಡ್ತಾವ್ ಚಲಿಯಾಂ ಪ್ರೇಮಿಚ್ಯಾ ಬೊಲ್ಸಾಂತ್ ಕಿತೆಂ ಭರುನ್ ಆಸಾ? ಮ್ಹಣ್ ಪಳೆವ್ಚ್ಯೊಂ.ಹ್ಯಾ ವರ್ವಿ ಲೀನಾಚೆರ್ ಆಸ್ಲೊ ಆಭಿಮಾನ್ ಮ್ಹಾಕಾ ದೊಡ್ತೊ ಜಾಲ್ಲೊ.

ಹ್ಯಾ ಮಧೆಂ ಮ್ಹಜ್ಯಾ ಘರ್ಚ್ಯಾಂಕಿಯ್ ಹಾಂವ್ ಏಕ್ ವೊಜೆಂ ಜಾಲ್ಲೊ.ಮ್ಹಜಿ ಮತ್ ಥಿರಾಸಾಣೆನ್ ಉರಾನಾತ್ಲಿಂ.ಸಾಂತಾ ಭಕ್ತಾಂಕ್ ಹಾಂವೆಂ ಅಂಗಯಿಲ್ಲೆಂ.ಜೆಜುಚ್ಯಾ ಪವಿತ್ರ್ ಕಾಳ್ಜಾಲಾಗಿಂ ಆನಿಂ ತಾಚ್ಯಾ ಮಾಯೆಲಾಗಿಯ್  ಹಾಂವೆಂ ಮಾಗ್ಲೆಂ.ಪುಣ್ ವ್ಯರ್ಥ್.ಎಕ್’ಯಿ ಸಾಂತ್ ಮ್ಹಜ್ಯಾ ಮಜಾತೆಕ್ ಯೆಂವ್ಕ್ ನಾತ್ಲೊ.ಕೊಂಕ್ಣಿ ಪತ್ರಾನಿಂ ಛಾಪ್ಲಿಂ ಆರ್ಗಾ ಪಳೆತಾನಾ ಸಕ್ಕಡ್ ನಕ್ಲಿಂ ಮ್ಹಣುನ್ ಚಿಂತ್ತಾಲೊ.ಸಾಂತಾ ಭಕ್ತಾಂಕ್ ಆಂಗವ್ಣ್ಯೊ ಘಾಲ್ಚೆಂ ಪಿಶೆಪಣ್ ಮ್ಹಣ್ ಭೊಗ್ಲೆಂ.ಅಂತಸ್ಕರ್ನ್ ಮಾತ್ರ್ ರಚ್ಲಲೊ ದೇವ್ ಸಾಂಡಿಸೊನಾ ಮ್ಹಣ್ ಜಾಗಯ್ತಾಲೆಂ.

ಮ್ಹಜ್ಯಾ ಸ್ವಾಭಿಮಾನಾಕ್ ಕುರಾಡ್ ಪಡ್’ಲಿ. ’ಜೀವನ್ ಇತ್ಲ್ಯಾರ್ ಆಕೇರ್’ಗಿ?’ ಮ್ಹಣ್ ಚಿಂತ್ತಾಲೊ.ಪುಣ್ ಏಕ್ ದೀಸ್ ಏಕಾ ದೈನಿಕ್ ಪತ್ರಾರ್ ಏಕ್ ಇಸ್ತಿಹಾರ್ ಹಾಂವೆಂ ವಾಂಚ್ಲೆಂ.ಎಕಾ ಬೆಂಕಾಕ್ ಆರ್ಜಿ ಪಾಟಯ್ಲಿ.ದೇವಾನ್ ತಾಚೆ ದೊಳೆಂ ಉಗಡ್’ಲೆಂ ಆನಿಂ ಮ್ಹಜ್ಯಾ ನಶಿಬಾಚೆ ದಾರ್ ಉಗ್ತೆಂ ಜಾಲ್ಲೆಂ.ರಿಟನ್ ಟೆಸ್ಟ್ ಆನಿಂ ಇಂಟರ್-ವ್ಯೂ ಸಂಪ್ತಚ್ ಮ್ಹಾಕಾ ಬ್ಯಾಂಕಾಂತ್ ಕಾಮ್’ಯಿ ಜಾಲೆಂ.

ಕಾಮ್ ಮೆಳ್ತಚ್ ಮ್ಹಾಕಾ ಜಾಲ್ಲೊ ಸಂತೊಸ್ ಇತ್ಲೊ ತಿತ್ಲೊ ನ್ಹಯ್.ಮ್ಹಜೆ ಕಾಳಿಚ್ ಸ್ಥಬ್ದ್ ಜಾಯ್ನಾತ್ಲೆಚ್ ದೇವಾಚೊ ಭೋಬ್ ಉಪ್ಕಾರ್ ಮ್ಹಣ್ಯೆತ್ ತಿತ್ಲೊ ಸಂತೋಸ್ ಮ್ಹಾಕಾ ಜಾಲ್ಲೊ.ದೋನ್ ವರ್ಸಾ ಬೇಕಾರ್ಪಣಾಚ್ಯಾ ಸಾಗೊರಾಂತ್ ಹಾಂವ್ ಉಪ್ಯೆವ್ನ್ ಥಕ್’ಲ್ಲೊ.

ಕಾಮ್ ಮೆಳ್ಳಿಂ ಗಜಾಲ್ ಹಾಂವೆ ಘರ್ಚ್ಯಾಂಕ್ ಆನಿಂ ಲೀನಾಕ್ ಕಳಿತ್ ಕೆಲೆಂ.ತಶೆ ಗಾಂವಾತ್’ಯಿ ಪ್ರಚಾರ್ ಜಾಲಿಂ.ಗಾಂವಾಂತ್ ವ್ಹಳಕ್ ನಾತ್ಲೆಲೆಂ ಸಮೇತ್ ಅಪವ್ನ್ ಉಲಂವ್ಕ್ ಲಾಗ್ಲೆಂ.ಥೊಡ್ಯಾನಿಂ ಕಾಫಿಯೆಚ್ಯಾ ಹೊಟೇಲಾಕಿಯ್ ಅಪವ್ನ್ ವ್ಹೆಲೆಂ.ಆಂಕ್ವಾರ್ ಚಲಿಯೊ ಆಸ್ಲ್ಯಾ ವ್ಹಡಿಲಾಂಚಿ ದೀಷ್ಟ್ ಮ್ಹಜೆರ್ ಪಡ್ಲಿಂ.ಎದೊಳ್ ಮ್ಹಾಕಾ ಪಳೆವ್ನ್ ಲೆಪಿಚಿ ಸೊಂಡಿ ಕರ್ಚ್ಯೊ ಬಾಯೊ ಆಮ್ರುಕೊ ಹಾಸೊಂಕ್ ಲಾಗ್ಲ್ಯೊ.ಹಾಂವೆ ಕೊಣಾಕಿಯ್ ಗಣ್ಣೆ ಕರುಂಕ್’ಚ್ ನಾ.

ಕಾಮ್ ಲಾಬ್ತೆಚ್ ಮ್ಹಜ್ಯಾ ಆನಿಂ ಲೀನಾಚ್ಯಾ ಮೋಗಾಕ್ ತಡ್ ನಾ ಜಾಲಿಂ.ಎಕಾಮೆಕಾ ಆಮಿ ಭೆಟುಂಕ್ ಲಾಗ್ಲ್ಯಾಂವ್.ತ್ಯಾ ವೆಳಾ ತಾಚೆ ನಾಜೂಕ್ ಬಾವ್ಳೆಂ ಮ್ಹಜ್ಯಾ ಗಳ್ಯಾ ಭಂವ್ತಣಿ ರೆವಾಡ್ತಾಲೆಂ.ಕುಡಿಕ್ ಕೂಡ್ ಲಾಗ್ತಾಲಿಂ.ಮ್ಹಜೆ ಭಳ್ವಂತ್ ರಟ್ಟೆಂ ತಾಚ್ಯಾ ಭಂವ್ತಿ ಆರ್ನಾತಾಲೆ ಆನಿ ಪಾಟಿಕ್ ಸಾಸ್ಪಾತಾಲೆಂ.

ವರ್ಸ್ ಏಕ್ ಪಾಶಾರ್ ಜಾವ್ನ್ ಗೆಲೆಂ.ಮೋಗಾಂತ್ ಹಾಂವ್ ಧಾದೊಶಿ ಜಾಲ್ಲೊ.ತರೀಯ್ ಕಾಮಾಂತ್ ಧಾದೊಸ್ಕಾಯ್ ನಾತ್ಲಿಂ.ಗ್ರೇಸ್ ಪಯ್ಶ್ಯಾಂಚೆ ಕಟ್ ಘವ್ನ್ ಡೆಫಾಸಿಟ್ಟ್ ದವರುಂಕ್ ಯೆತಾನಾ ಮ್ಹಜ್ಯಾಲಾಗಿಯ್ ತಸ್ಲೆಂ ಕಟ್ ಕೆದಳಾ ಜಾಂವ್ಚೆ ಮ್ಹಣುನ್ ಭೊಗ್ತಾಲೆಂ.ದುಬ್ಳೆಂ ಥೊಡೆಂ ಅಪ್ಲ್ಯಾ ಸ್ತ್ರಿಯೆಚಿ ಕರಿಮಣಿ ಸಮೇತ್ ಆಡವ ದವರುಂಕ್ ಯೆತಾನಾ ಕರಿಯಮಣಿ’ಕ್ ಪಯ್ಶ್ಯಾಂಚೆ ಮೋಲ್ ಗಿ? ಮ್ಹಳ್ಳೆಂ ಸವಾಲ್ ದೊಸ್ತಾಲೆಂ.

ಕಾಮಾಕ್ ಲಾಗುನ್ ಏಕ್ ವರ್ಸ್ ಸಂಪ್ತಚ್ ಹಾಂವೆ ಘರಾಂತ್ ಕಾಜಾರಾಚೊ ಪ್ರಸ್ತಾಪ್ ದವರ್ಲೊ.ಘರ‍್ಚಿಯ್ ಖುಷ್ ಜಾಲಿಂ.ಪುಣ್ ಚಲಿ ಲೀನಾ ಮ್ಹಣ್ತೆಚ್ ತಿಂ ಭಿಗಡ್ಲಿಂ."ತೆಂ ಟೀಚರ್,ಮಿರಿಯೊ ಸೊಡವ್ನ್ ಆಟ್-ನೆಟ್ ಕರ್ಚೆ ಚೆಡುಂ,ಮಾಸ್ಟರಾಂ ಲಾಗಿಂ ಮಿರಂವ್ಚೆ,ಆಮ್ಚ್ಯಾ ಘರಾ ಸೊಬ್ಚೆಂ ನಾ,ಆಮ್ಕಾಂ ಜಾಯ್ ಆಶಿಕ್ಪಿ,ಪುಣ್ ಬರ್ಯಾ ಗುಣಾಂಚೆಂ,ಬರ್ಯಾ ಘರಾಣ್ಯಾಂತ್ಲೆಂ,ಘರ್ಚೆ ಕಾಮ್ ಜಾಣಾ ಆಸ್ಲೆಂ ಚೆಡುಂ" ಮ್ಹಣ್ ಆಡ್ಕಳ್ ಉಲಯ್ಲಿಂ.ಘರ್ಚ್ಯಾಂಚಾ ಹ್ಯಾ ಉಲೊವ್ಣ್ಯಾ ವರ್ವಿ ಲೀನಾಕ್ ಆಕ್ಮಾನ್ ಜಾಲೊ ಮ್ಹಣುನ್ ಹಾಂವ್ ಖೂಬ್ ದುಕ್ ಪಾವ್ಲೊಂ ಆನಿಂ ತಾಂಕಾಂ ಸಮ್ಜಯ್ಲೆಂ,ಬಳಾಯ್ಲೆಂ.ಉಪ್ರಾಂತ್ ಕಶೆಯ್ ತಾಂಕಾಂ ಪುಸ್ಲಯ್ತೆಚ್ ಉದೆಲೆಂ ಏಕ್ ಮಾರೆಕಾರ್ ಸವಾಲ್!! ದೋತ್ ಉಣಿ ಮ್ಹಳ್ಯಾರ್ ತೀನ್ ಹಜಾರ್ ರುಪಯ್ ಮ್ಹಣಿ ದಿಜೆಯ್’ಚ್!!.

ದೋತ್? ತೆಯ್ ತೀನ್ ಹಜಾರ್? ಮ್ಹಜೊ ಮೆಂದು ಗಿರ್ಗಿರ್ಲೊ.ವ್ಹಯ್,ಮ್ಹಜಿ ವ್ಹಡಿಲಾಂ ಆಶಿಕ್ಪಿ.ತಿಂ ಕಾಂಯ್ ನೆಣಾಂತ್.ತೀನ್ ಹಜಾರ್ ದೋತ್ ಘೆಂವ್ಚೆ ಅಪ್ಲ್ಯಾ ಬೆಂಕಾಂತ್ ಆಸ್ಲ್ಯಾ ಪುತಾಕ್ ಕಾಂಯ್’ಚ್ ಚಡ್ ನ್ಹಯ್ ಮ್ಹಣ್ ತಾಂಚೊ ಆಂದಾಜ್.ಪುಣ್ ೩,೦೦೦ ದಿಂವ್ಚೆಂ ಎಕಾ ಎಲಿಮೆಂಟರಿ ಇಸ್ಕೊಲಾಂತ್ ಶಿಕ್ಷಕಿ ಜಾವ್ನ್,ಶೆಂಬೊರ್-ದೆಡ್ಶೆಂ ರುಪಯ್ ಜೊಡ್ಚ್ಯಾ ಎಕಾ ಚಲಿಯೆನ್ ಮ್ಹಣ್ ತಿಂ ನೆಣಾಂ ಜಾಲಿಂ.ಅವಯ್ ಮ್ಹಜಿ ಕಾಜಾರ್ ಜಾವ್ನ್ ಯೆತಾನಾ ಶೆಂಬೊರ್ ರುಪಾಯ್ ದೋತ್ ಘೇವ್ನ್ ಆಯಿಲ್ಲಿ ಖಂಯ್ ಆನಿ ಹೆಚ್ ಶೆಂಭೊರ್ ರುಪಾಯ್  ದಿಂವ್ಕ್ ತಿಚ್ಯಾ ವ್ಹಡಿಲಾಂನಿಂ ಕಿತ್ಲೆಂ ಕಷ್ಟ್ ಕಾಡ್ಲ್ಯಾತ್ ಮ್ಹಣುನ್ ತಿಯ್ ಜಾಣಾಂ.ತಶೆಂ ಜಾಲ್ಯಾರಿಯ್ ಏಕ್ ಸ್ತ್ರಿ ಆನ್ಯೇಕಾ ಸ್ತ್ರಿಯೆ ಥಾವ್ನ್ ದೋತ್ ಅಪೇಕ್ಷಿತಾ ಸ್ತ್ರೀಯಾಂಚೊ ಸಮಸ್ಯೊ ಸ್ತ್ರಿಯೊಚ್ ನೆಣಾಂತ್!ಜಾಣಾ  ಹ್ಯಾ ಸಮಾಜೆಂತ್ ಹ್ಯಾ ದೊತಿ ಲಾಗುನ್ ಕಿತ್ಲೆಶ್ಯೊ ಚಲಿಯೊ ಆಂಕ್ವಾರ್ ಉರ್ಲ್ಯಾಂತ್.ಮ್ಹಾಂಯ್ನ್ ಆಪ್ಲ್ಯಾ ಜಾಳಾಂತ್ ಪಾಯ್’ಕಿಯ್ ಸಾಂಪ್ಡಾಯ್ಲೊ.ಪಾಯ್ ಮ್ಹಜೊ ದೊತಿ ವಿಶಿ ಆಯ್ಕೊನ್ ಮಾಂಯ್ಚ್ಯಾ ಜಾಳಾಂತ್ ಶಿರ್ಕಾಲೊ.ವ್ಹಯ್ ಸಹಜ್’ಚ್!ಅಪ್ಣೆಂಯ್ ಆಡ್ವಾರ್ಲೆಲೆಂ ಫಳ್ ಖಾವ್ನ್ ಆನಿಂ ಅಪ್ಲ್ಯಾ ದಾದ್ಲ್ಯಾಕಿಯ್ ಖಾವಯಿಲ್ಲೆಂ ಸ್ತ್ರಿಯೆನ್’ಚ್ ನ್ಹಯ್ಗಿ? ಹ್ಯಾ ಗೊಂದೊಳಾಂತ್ ಮ್ಹಾಕಾ ಏಕ್ ಉಪಾಯ್ ಸುಸ್ತಾಲೊ.ತ್ಯಾ ಪರಿಂ ಬೆಂಕಾಕ್ ವ್ಹಚುನ್ ಮ್ಹಜ್ಯಾ ಕಾಮಾಚ್ಯಾ ಭದ್ರತೆಚೆರ್ ತೀನ್ ಹಜಾರ್ ರುಪಾಯ್ ರೀಣ್ ಘೆತ್ಲೆಂ ಆನಿಂ ಗೂಟಾನ್ ಲೀನಾಕ್ ದಿಲೆಂ."ಲೀನಾ,ಧರ್ ಘೆ ಹೆಂ ಪಯ್ಶೆಂ ಆನಿ ಮ್ಹಜ್ಯಾ ವ್ಹಡಿಲಾಂಕ್ ದೊತಿ ರುಪಾರ್ ದಿ"ಮ್ಹಳ್ಳೆಂ ಹಾಂವೆಂ.

"ಹೆಂ ಕಿತೆಂ?" ಮ್ಹಣ್ ವಿಚಾರಿ ತೆಂ.

"ನ್ಹೆಣಾಯ್’ಗಿ ಲೀನಾ ತುಂ ಕಿತೆಂ ಚಲ್ತಾಂ ಹ್ಯಾ ಸಮಾಜೆಂತ್ ಮ್ಹಣುನ್.ಮಾದ್ರಿ ಲೆಗುನ್ ಧಾರ್ಮಿಕ್ ಮೆಳಾಂತ್ ರಿಗ್ಚ್ಯಾ ಚಲಿಯಾಂ ಥಾವ್ನ್ ದೋತ್ ವಿಚಾರ್ಚ್ಯಾ ಹ್ಯಾ ಕಾಳಾರ್ ಮ್ಹಜ್ಯಾ ಆಶಿಕ್ಪಿ,ಮ್ಹಾಕಾ ಲ್ಹಾನ್ ವ್ಹಡ್ ಕೆಲ್ಲ್ಯಾ ಮಾಂಯ್-ಪಾಯ್’ನ್ ದೋತ್ ವಿಚಾರ್ಚ್ಯಾಂತ್ ಕಿತೆಚ್ ಚೂಕ್ ನಾ.ಆಮ್ಚ್ಯಾ ಸಮಾಜೆಂತ್ ಹಿಚ್ ಭೋವ್ ವ್ಹಡ್ ಆಯ್ಚಿ ಸಮಸ್ಸ್ಯಾ"

ಗಾಂವಾ ಥಾವ್ನ್ ಆಯ್ಲಿ ಅಪ್ಲ್ಯಾ ಧುವೆಚಿ ಚೀಟ್ ಪಳೆವ್ನ್ ಲೀನಾಚೊ ಬಾಪುಯ್ ಗಾಂವಾಕ್ ಆಯಿಲ್ಲೊ.ನಮಿಯಾರ್ಲ್ಯಾ ದಿಸಾ ಖರಾರ್ ಜಾಲೆಂ.ದೋತ್’ಯಿ ಮೆಜುನ್ ದಿಲಿಂ.ತೀನ್ ಚಿಟಿಯೊಯ್ ವಾಂಚ್ಲ್ಯೊ.ಗಾಂವ್ಚ್ಯಾ ರಿತಿ ರಿವಾಜೆ ಪ್ರಕಾರ್ ಆಮ್ಚೆಂ ಕಾಜಾರಿಯ್ ಜಾಲೆಂ.

(ಸಾಹಿತ್ ಕೇವಲ್ ಏಕ್ ಬರಪ್ ನ್ಹಯ್.ಬರಪ್ ಬರಯಿಲ್ಲ್ಯಾ ಕಾಳಾಚೆ ಪರಿಗತ್’ಗಿ ಏಕ್ ಸಾಹಿತ್ ಸಾಂಗ್ತಾ. 1975 ಜೂನಾಚ್ಯಾ 29 ತಾರೀಕೆರ್ ’ಪಯ್ಣಾರಿ’ ಪತ್ರಾರ್ ಪ್ರಕಟಿತ್ ಜಾಲ್ಲಿ ಪಪ್ಪನ್ ಲಿಕ್ಲೆಲಿಂ ಸಾಧಿ ಕಾಣಿ ಹಿಂ.ತ್ಯಾ ವೇಳಾರ್ ತೀನ್ ಹಜಾರ್ ರುಪಾಯ್ಚೆ ಮೂಲ್ಯ್,ಬೆಕಾರ್ಪಣ್ ಆನಿಂ ದೋತಿಚಿ ಸಮಸ್ಯಾ ಹ್ಯಾ  ಕಾಣಿಯೆಂತ್ ಪಳುವ್ಯೆತಾ)